Македонија
Царовска: Младите се интересираат за развој на бизнис-идеи и иновации

Младите сакаат предизвици. Сакаат да стекнуваат знаења, особено од областа на претприемаштвото и потоа да ги искористат паметно за создавање креативни бизнис-идеи и идеи за иновации. Остварувањето, пак, на тие идеи, всушност значи исполнување големи детски соништа и создавање идни креатори и двигатели на процесите и позитивните промени во општеството. Ова го истакна министерката за образование и наука, Мила Царовска, за време на денешниот завршен настан во рамките на Националниот натпревар на ученички компании, што веќе неколку години го организира „Јуниор ачивмент, на кој беа прогласени победниците за учебната 2020/2021 година.
Царовска изрази задоволство што вторпат има можност да учествува на прогласување победници на натпреварот и додаде дека ваквите натпревари го развиваат индивидуалниот и колективниот натпреварувачки дух, истрајноста, личната свест и одговорност, како и способноста за тимска работа, што, како што посочи, се особено важни вредности што треба да се втемелат при изградбата на секој карактер бидејќи се основа за поставување и остварување цели и добри резултати на приватен и професионален план.
„Ова е еден од моментите низ кои се гледа дека Северна Македонија има голем кадровски потенцијал. Во државата има млади што се гарант за нејзина добра иднина и тие треба да бидат поддржани, нивниот труд и желба за развој да бидат стимулирани. А како институции на системот во соработка со граѓанскиот сектор, но и нашите меѓународни партнери што работат на остварување на глобалните цели за одржлив развој, токму тоа и го правиме“, рече Царовска додавајќи дека е убедена оти младите ги препознаваат сите нови можности што државата ги креира за ни,в особено во последните 3-4 години.
Министерката ги поздрави сите учесници на натпреварот, а им честита на успехот на оние што стигнаа до финалето.
„Верувам дека секој очекува да го чуе своето име меѓу победниците. Но, запомнете – сите сте вие победници и гордост со која можеме да му се пофалиме на светот. Продолжете да се натпреварувате и во иднина, во границите на сопствената земја, но и надвор од неа покажете дека нашата татковина го има највредното – паметна и перспективна младина“, потенцира Царовска.
На Националниот натпревар на ученички компании годинава учествуваа 23 ученички компании од 14 средни училишта од земјава. Првото место го освои ученичката компанија LifePal“од гимназијата „Никола Карев“ од Скопје, која нуди интересно и практично решение за непредвидливи ситуации од секојдневниот живот на училиште, работа или при рекреација. Неопходните сетови претставуваат мали пакетчиња составени од неколку производи, кои ќе бидат лесно достапни преку поставени вендинг-машини. Второто место го освои ученичката компанија TechBook од гимназијата „Јосип Броз Тито“ од Скопје, која понуди паметна тетратка и веб-страница, а третото место го освои ученичката компанија Grow Green од СУГС „Кочо Рацин“ од Скопје, која разви идеја за екокафетерија, чии производи се биоразградливи и еколошки.
Победничката компанија ќе има можност да се претстави на Европскиот натпревар на ученички компании, што го организираат „Јуниор ачивмент Европа“ и „Јуниор ачивмент Литванија“.
Организаторот на натпреварот оваа година додели и награда за најдобра презентација на производот или услугата преку социјалните мрежи, на ученичката компанија Health Activity Providers од ССОУ „Димитрија Чуповски“ од Велес. За посветеноста во работењето во програмата беа доделени и наградите за најдобар наставник на Снежана Бошковска од гимназијата „Никола Карев“ од Скопје и најпретприемничко училиште СОЕПТУ „Кузман Јосифовски – Питу“ од Прилеп. Првпат „Јуниор ачивмент Македонија“ додели и награда за најдобар есеј за етичка дилема во бизнис на ученикот Давид Арсовски од СЕПУГС „Васил Антевски – Дрен“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ: Новото раководство во Еразмус е во целосна координација со канцеларијата на ЕУ

СДС нека провери во своите редови пред да зборува следен пат, Лидија Димова беше разрешена од Агенцијата заради злоупотреба на финансиски средства, не постои институција во која СДС нема направено криминал, реагираат од ВМРО-ДПМНЕ во врска со обвинувањата од СДСМ за новото раководство на „Еразмус“.
„Актуелното решение е во целосна координација со канцеларијата на Европската Унија. Истите забелешки, СДС нека ги сподели и со канцеларијата на ЕУ. Во меѓувреме, пред да излезат со прес-конференции и соопштенија, СДС прво да си го погледнат својот двор. Впрочем, нивниот „двор’’ е полн со луѓе кои обавувале јавни функции и скоро па да нема некој кој не бил поврзан со некаков сомнеж или сторен криминал. Таков случај беше и оној, кога Лидија Димова како директорка на Агенцијата за европски образовни програми и мобилност, ја злоупотребила службената положба и проневерила заедно со уште две лица, околу 20 милиони денари. Димова предизвикала шета на други средства во државата со кои управува Европската заедница во вкупен износ од околу 20 милиони денари, со коишто Димова направиле две кривични дела. За конкретниот случај, таа беше и обвинета од страна на ОЈО ГОКК.
Да потсетиме, тогашниот премиер Заев ја присили Димова да не ја поднесува пријавата за сторен криминал од 2,2 милиони евра, кој потоа Европската заедница си ги бараше назад. Овие пари завршиле кај исти луѓе и тендерите ги добиле исти две фирми поврзани со овие луѓе. Оваа мрежа имала своја логистика во Националната агенција, а првопријавеното лице и во кабинетот на премиерот, како близок пријател на еден од националните координатори во Владата.
Затоа, СДС нека си ги проверува своите редови и криминалите што ги има направено. Знаеме дека се многу и понекогаш можеби ги забораваат, но затоа тука сме ние да ги потсетиме и да го повикаме ЈО да си ја извршува работата“ пишува во реакцијата.
Македонија
ЗНМ и ССНМ бараат итна проверка на околностите со случајот со новинарите во Демир Хисар

Здружението на новинари на Македонија (ЗНМ) и Самостојниот синдикат на новинари и медиумски работници (ССНМ) изразуваат сериозна загриженост поради начинoт на постапување на полициски службеници кон новинари од пелагонискиот регион.
„Случајот за кој веќе испративме официјален допис до Министерството за внатрешни работи, се однесува на известување за разрешувањето на директорка на училиште во Демир Хисар, кога полициски службеници им пристапиле на новинарите додека тие известувале од настан од висок јавен интерес, барајќи нивно легитимирање, иако било очигледно дека се работи за медиумски работници со професионална опрема. Настанот се случил на јавна површина – двор на училиште. Сметаме дека вакви ситуации може да се протолкуваат како обид за вршење притисок врз новинарите, што е недозволиво мешање во нивната работа и нарушување на медиумските слободи“, соопштија ЗНМ и ССНМ.
Од таму велат дека во дописот до МВР бараат итна и сеопфатна проверка на околностите, утврдување на законската основа за ваквиот вид постапување и одговорност доколку се потврди дека полициските службеници ги пречекориле своите овластувања.
„Очекуваме МВР и Секторот за внатрешна контрола во најкус можен рок да информира за утврдените околности и доколку се потврди прекршување на овластувањата, да преземе соодветни мерки против одговорните службеници“, се наведува во заедничкото соопштение.
Македонија
Ана Михајлов нова в.д. директорка на „Еразмус“

Националната агенција за европски образовни програми и мобилност има ново раководство кое ќе ја продолжи имплементацијата на „Еразмус“ и „Европски солидарен корпус“ во Македонија, како и на неколку други европски програми и мрежи за образование и мобилност. За в.д. директорка на институцијата е избрана Ана Михајлов, која доаѓа од редот на вработените и има искуство во областа повеќе од 15 години, соопшти Министерството за образование.
Министерката Весна Јаневска на денешната средба со Михајлов и’ посака успех во спроведување на програмските определби, посочувајќи дека активностите на Националната агенција се исклучително важен дел од напорите на државата за интегрирање на македонскиот образовен систем во европскиот образовен простор.
„Михајлов изрази уверување дека институцијата ќе продолжи доследно да ги почитува европските начела за работа при спроведување на програмите за образование и мобилност и придобивките од истите да ги доближува до што повеќе ученици, наставници, граѓански здруженија и други чинители на образовниот систем.
Како национален авторитет, Министерството за образование и наука продолжува да ја следи работата на Агенцијата и преку редовна комуникација со образовните и научните институции и тела во рамки на Европската комисија да гарантира правилно и оптимално работење, како и континуирана надградба на капацитетите на институцијата“, се наведува во соопштението.