Македонија
Царовска на конференција за холокаустот: Од најрана возраст да се научи какви последици може да создадат предрасудите

Сеќавањата за холокаустот создаваат голем немир и болка, особено помеѓу потомците на жртвите и хероите, за болната идеја да се истреби цел еден народ, како и кај секој друг човек со нормален разум и развиени емоции. Но, токму таа болка создава и сплотеност и ја одржува борбата за ова зло никогаш да не се повтори. Република Северна Македонија е активен учесник во таа борба, истакна министерката за образование и наука, Мила Царовска, за време на онлајн-работилницата „Справување со антисемитизмот преку образование“, во организација на ОБСЕ-ОДИХР и УНЕСКО, а со поддршка на Министерството за образование и наука и Меморијалниот центар на холокаустот на Евреите од Македонија.
„Верувам, сите ќе се согласиме дека образованието е најмоќната алатка за справување со антисемитизмот и воопшто со дискриминацијата, насилството и нетолеранцијата. Само преку едукација на граѓаните може да се спречи уништувањето на демократските вредности во секое општество“, рече Царовска додавајќи дека токму поради тоа, образовниот систем ги насочува учениците да стекнуваат сеопфатни знаења и да влечат поуки од вакви историски случувања.
Министерката потенцира дека секој човек мора да сфати уште од најрана возраст колку е лоша злоупотребата на моќта, какви последици може да создадат нетрпеливоста, предрасудите, нетолеранцијата по која било основа, но исто така какви последици може да создаде и индиферентноста на поединци, групи или воопшто на општеството кон таквите појави.
Младите, како што рече таа, мора да научат да препознаваат негативни појави и опасности и да стекнат чувство на лична одговорност дека и од нив зависи какво општество ќе создаваме.
„Во нашите училишта се учи за холокаустот. Тој е интегриран во дел од наставните програми во предметите, а има и навистина доста материјали, но и прирачници како да се организира наставата на оваа тема. И тие постојано се надополнуваат со поддршка на низа партнерски организации и институции. Во оваа пригода сакам да им се заблагодарам на ОДИХР и УНЕСКО и за новите изработени едукативни материјали, кои верувам ќе бидат исклучително важни за надополнување на фондот на знаења на учениците и корисни за целта што ја остваруваме“, потенцира Царовска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Денес и утре ќе се прска против комарци во Скопје

Од Град Скопје известија дека викендов (26.07 и на 27.07.2025 година), во раните утрински часови ќе се реализира авионска дезинсекција на подрачјето на градот Скопје, против возрасни форми на комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин, дополнуваат надлежните.
Македонија
Денес пеколно топло со температури од 43 степени

Времето денеска ќе биде сончево и многу топло со мала до умерена локална облачност. Ќе дува слаб до умерен ветер од јужен правец. Минималната температура ќе биде во интервал од 14 до 22, а максималната ќе достигне од 36 до 43 степени Целзиусови.
И во Скопје че биде сончево и многу топло, попладне со мала до умерена облачност. Ќе дува слаб до умерен јужен ветер. Минималната температура ќе се спушти до 20, а максималната ќе достигне до 43 степени Целзиусови.
Според најавите од Управата за хидрометеоролошки работи (УХМР), утре и во првата половина од следната седмица ќе има промена на временската состојба. Во попладневните часови ќе има услови за локална појава на нестабилност со пороен дожд и грмежи. Ветерот ќе го промени правецот во северен, а дневната температурата ќе биде во опаѓање.
Македонија
62 години од катастрофалниот земјотрес во Скопје во кој животот го загубија 1.070 лица

Скопје денеска ја одбележува 62. годишнина од катастрофалниот земјотрес што се случи на 26 јули 1963 година, кога животот го загубија 1.070 лица, а 3.000 беа повредени.
Во знак на почит и сеќавање на жртвите во катастрофалниот земјотрес, денеска во 10 часот делегации од Собранието и од Градот Скопје ќе положат цвеќе пред Споменикот на загинатите во земјотресот на градските гробишта Бутел.
Во Музејот на град Скопје, вечер во 20 часот, ќе биде отворена изложбата „Скопје за време на земјотресот и потоа”. Поставката ќе биде од траен карактер достапна за секој посетител во музејот. Градот како и секоја претходна година се сеќава на катастрофалниот земјотрес во 1963 година кој засекогаш го промени.
Скопскиот земјотрес во 1963 година е познат како една од најголемите трагедии кои се случиле во историјата на градот, но истовремено и шанса светот да ја покаже својата солидарност и да помогне во опоравувањето на заедницата.
Катастрофалниот земјотрес во Скопје се случи во пет часот и 17 минути, а помали потреси имаше до пет часот и 43 минути. Беа урнати 15.800 станови, а оштетени 28.000. Над 200.000 луѓе остана без покрив над главата.