Министерката за образование и наука, Мила Царовска, денес учествуваше на онлајн-дебата за дигитализацијата на образовниот процес, која е неопходна во време на пандемијата на Ковид 19. На дебатата учествуваше и претседателот на државата, Стево Пендаровски.

„Можеби процесот на дигитализација кај нас е почнат, но треба да се интензивира. Затоа што времето бргу истекува и доколку не го фатиме чекорот со овој глобален процес, тогаш многу ќе заостанеме во трката по квалитетно образование за нашите сегашни и идни генерации ученици“, рече Царовска.

Министерката истакна дека основната нејзина цел, но и на Владата, е да изгради современ и конкурентен образовен систем на среден рок, кој ќе биде флексибилен и лесно приспособлив на секоја нова промена со која се соочува општество или воопшто светот.

„Во таа насока сакам да информирам дека покрај низата реформи што ги предвидува новата 4-годишна програма за работа на Владата која, пак, веќе се детализира од страна на секоја институција, вклучително и од страна на институцијата за која добив мандат да ја раководам во делот на образованието и науката, еден од приоритетите е и дигитализацијата на образованието за што ќе се изготви и национална стратегија за дигитализација на образовниот систем“, рече Царовска.

Царовска рече дека креираат единствена национална платформа за далечинско учење. И со задоволство може да кажам дека веќе ја имаме првичната нацрт-верзија на оваа платформа, која можеби со мали дополнувања и минимални корекции врз база на сугестии од крајните корисници, ќе стане конечна и применлива до почетокот на учебната година. Јас веќе ја разгледав, лично ми се допаѓа и сметам дека ќе биде лесна за употреба и ќе ги задоволи очекувањата и потребите на сите што ќе треба да бидат поврзани со неа, првенствено на учениците и наставниците.

„Многу важно во овој процес е и обезбедувањето дигитални учебници. Во заеднички дијалог со издавачките куќи и авторите на учебниците ќе работиме на што поголема застапеност на учебниците во електронска форма“, рече Царовска.
Трибината на тема „Дигитализација и образование“ ја организира Здружението за едукација, комуникации и консалтинг ОХО од Битола.