Македонија
ЦУК: Повеќе пожари и едно починато лице за 24 часа

Од Центарот за управување со кризи (ЦУК) информираат дека изминатото деноноќие, покрај снегот и студеното време, имало повеќе пожари и едно починато лице.
Според податоците од Регионалниот ЦУК Куманово, пожарникарите од Територијалната противпожарна единица (ТППЕ) Ранковце, околу 04:20 часот интервенирале на опожарена куќа во село Отошница. Во пожарот имало и починато лице.
– За да може побезбедно да се интервенира, околу 04:45 часот било побарано и „ЕВН“ да ја исклучи струјата во тој реон. За настанот, покрај Итната медицинска помош, се известени и МВР и СВР Куманово, се појаснува во соопштението на ЦУК.
Пожарникарите од ТППЕ Куманово од 04:25 до 05:45 часот, со седум пожарникари и едно возило интервенирале и на опожарена куќа на улицата „716“ број 9 во населбата „Баново Трло“.
– Пожарникарите од БППЗ на градот Скопје имале една интервенција, поради запален оџак. ТППЕ Охрид, во текот на денот имала четири интервенции поради запалени оџаци. ТППЕ Кичево имала една интервенција поради запален оџак. ТППЕ Прилеп од 20:12 до 21:35 часот, со четири пожарникари и едно возило, гаснела опожарен дел од мотор на автобус на патниот правец село Беловодица – Прилеп. Имало и една помала интервенција поради запален оџак, додаваат од ЦУК.
За 24 часа имало вкупно 1.891 повик на Единствениот број за итни случаи 112, од кои „реални“ повици биле 41,41 отсто, а 58,59 проценти биле за други потреби на граѓаните, што не биле итни.
Кон полиција биле упатени 55,03 отсто, кон Итната медицинска помош 30,47 проценти, кон пожарникарите 0,89 отсто, а кон АМСМ 1,18 проценти од реалните повици.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ниту еден сектор не напредува, погрешните политики на власта ги плаќаат граѓаните, вели Филипче

Претседателот на СДСМ, Венко Филипче од струмичкиот регион истакна дека само СДСМ е тој кој ќе може да се спротивстави на ВМРО–ДПМНЕ.
„Само ние сме организирана структура, која што сега треба да ги научи грешките од лани, за да излезе на терен и да покаже сила, и енергија, и волја, дека сме ние тука и сме подготвени да се бориме” рече Филипче.
На средбите со граѓаните во Ново Село, Василево и Босилово, Филипче посочи дека во ниту еден сектор нема никакви резултати, што е показател за погрешните политики на ВМРО-ДПМНЕ.
„Една работа да најдеме, нема. Во земјоделството? Ништо. Ниту поддршка, ниту зголемени субвенции. Плачат лозари, плачат сточари, производителите на оризот, тутунарите. Во здравството да не зборам. Во образование? Ништо. Какви плати, ги лажат луѓето – ќе биде до година. Работниците? Ништо. Даваме предлог за платите? Ништо. Цените до плафон. Не можат луѓето да живеат повеќе. За европското прашање да не збориме, рече Филипче.
Во периодот на СДСМ, како што кажа, немаше ниту една лоша политика, мерките се креираа за граѓаните.
„Ние немаме лоша политика во ниту еден сектор. Зашто сакате ќе збориме? 300% социјална помош, платите ги зголемивме, дуплирана минималната платата. Во здравство, во образование во стопанството, со цените имавме контрола, кризите ги пребродивме. Ние бевме тука за луѓето, а Владата на ВМРО-ДПМНЕ не е за луѓето тука, не ги интересира“.
Македонија
Нов урбан парк во Марино, унапредување на јавната инфрастуктура во Општина Илинден, најави Георгиевски

Општина Илинден континуирано вложува во уредување и модернизација на јавниот простор во сите населени места, создавајќи современи и пријатни локации за квалитетно поминување на слободното време на граѓаните. Во таа насока, во населеното место Марино е изграден нов урбан парк со повеќе содржини, информираат од таму.
Паркот се наоѓа меѓу улиците „531“, „532“ и „534“ и зафаќа површина од околу 6.000 м². Просторот е партерно уреден, поставено е улично осветлување, чешми, клупи, корпи за отпадоци, паркинг простор, пешачки патеки и пристапна сервисна улица. Паркот е збогатен и со зелени површини, отворен плоштад наменет за јавни настани, централна фонтана, жардињери со декоративни растенија, како и детско игралиште опремено со современи реквизити за најмладите.
Градоначалникот на општина Илинден, Александар Георгиевски, при увидот на плоштадот истакна дека уредувањето на јавните простори е од суштинско значење за подобрување на условите за одмор и рекреација на граѓаните.
„Општина Илинден и понатаму ќе продолжи со активности за унапредување на јавната инфраструктура и создавање урбано уредени простори во сите населени места низ општината“.
Македонија
Вандализирани новото катче за вежбање и фудбалското игралиште во Паркот на франкофонијата

Катчето за рекреација, направено на барање на жителите во рамки на маалските средби, со новата современа теретана во Паркот на франкофонија, утрово беше затекнато уништено.
Уште недовршена, теретаната веќе е вандализирана. Некој преку ноќ се обидел да ги запали реквизитите, а вреќата за бокс ја исекле со нож и целосно ја уништиле.
Случајот е пријавен во МВР.
„Наместо простор за рекреација, некој избрал деструкција. Покрај тоа, искршено е и фудбалското игралиште во овој парк. Ова, за жал, не е прв ваков случај на вандализам во нашата општина. Апелирам до сите граѓани да го чуваат јавниот простор и заедничките содржини создадени за спорт, рекреација и дружење“, порача Герасимовски .
Новата теретана се состои од 17 справи, а овие денови требаше да се постави и специјална тревна подлога за поголема безбедност при користење.