Македонија
Честитки од Трамп, кралицата Елизабета, Путин, Си Џинпинг, Ердоган за Денот на независноста
По повод 8 Септември, Денот на независноста на Република Северна Македонија, писма со честитки до претседателот Пендаровски испратија повеќе светски лидери, меѓу кои и претседателот на САД, Доналд Трамп, кралицата на Обединетото кралство, како и претседателите на Русија и Турција, Владимир Путин и Реџеп Тајип Ердоган.
Претседателот на САД, Доналд Трамп во име на американскиот народ, честитајќи го Денот на независноста, 8 Септември, вели дека оваа година одбележувањето е во околности кога сме соочени со глобалната пандемија, но и покрај овој огромен предизвик, Северна Македонија безбедно и транспарентно одржа демократски избори во јули, а нашата земја останува посветена на унапредување на безбедноста, стабилноста и просперитетот во регионот.
„Во прилог на позитивниот исчекор со зачленувањето во НАТО, Северна Македонија веќе придонесува кон Алијансата, како домаќин на големи вежби на воениот полигон Криволак. Соединетите Држави се горди што се ваш сојузник и ги поддржуваме аспирациите на Северна Македонија за понатамошна европска интеграција и вашиот пат кон членство во Европската Унија“, стои во честитката од американскиот претседател.
Кралицата на Обединетото Кралство на Велика Британија и Северна Ирска, Елизабета II со посебно задоволство го честита државниот празник, Денот на независноста, со најискрени желби и честитки за среќа и просперитет на народот на Република Северна Македонија.
Кралот на Холандија, Вилем Александер, во честитката упатува желби за благосостојба на граѓаните на Северна Македонија. „Додека ја одбележуваме оваа пригода, сакам да истакнам дека пандемијата на КОВИД-19 претставува невиден предизвик за сите нас. Ви посакувам вам, на вашата влада и на граѓаните на Северна Македонија сила, храброст и здравје, бидејќи заедно ги продолжуваме напорите за надминување на коронавирусот, стои во честитката од холандскиот крал.
Претседателот на Руската Федерација, Владимир Путин во честитката посакува добро здравје и успеси, а на сите наши граѓани мир и добробит.
„Уверен сум дека унапредување на конструктивна билатерална соработка меѓу Руската Федерација и Република Северна Македонија би им одговарало на интересите на нашите народи, би придонесувало за зацврстување на безбедноста и стабилноста на Балканот“, пишува во честитката од рускиот претседател.
Претседателот на Народна Република Кина, Си Џипинг, упатувајќи честитки по повод Денот на независноста, истакнува дека односите меѓу двете држави се стабилни и со практична соработка во различни области се движат во нагорна линија.
„Од појавувањето на КОВИД-19, нашите две земји и два народа се поддржаа едни со други за да се борат против епидемијата солидарно и го продлабочија нашето традиционално пријателство. Јас придавам големо значење на развојот на односите Кина – Северна Македонија и подготвен сум да соработувам со вас, да промовирам билатерални размени и да ја збогатам суштината на нашите односи со заедничка надградба на „Еден појас – еден пат“ и соработката меѓу Kина и земјите од Централна и Источна Европа како платформа, со цел да се постигне поголем развој на нашата пријателска соработка во новиот историски период, а за бенефит на нашите две земји и два народа“, пишува во честитката кинескиот претседател.
Претседателот на Република Франција, Емануел Макрон, честитајќи го Денот на независноста, во честитката ја искажува неговата, како и солидарноста на францускиот народ кон македонското население кое, исто така, е погодено од пандемијата со Ковид-19.
„Ви ја упатувам и мојата срдечна благодарност за помошта при репатријација на француски и европски државјани на почетокот на кризата. Европската Унија, одобрувајќи повеќе од 3 милијарди евра за помош на земјите од Западен Балкан со соочувањето со оваа криза без преседан, ја покажа својата целосна посветеност за овој регион“, пишува францускиот претседател. Претседателот Макрон во честитката посакува билатералните односи да продолжат да се зајакнуваат, додека француската стратегија за Балканот предвидува засилена поддршка на Франција за економски и социјален развој на регионот, благодарение на претстојните активности на Француската агенција за развој во Северна Македонија на поле на трајниот развој. „Оваа 2020 година беше важна етапа во евро-атлантското приближување на Северна Македонија, која стана 30-та членка на Атлантската Алијанса, на 27 март 2020 година. Ја поздравувам одлуката од 25 март на Советот на Европската Унија за отворање на преговорите за членство на вашата земја. Бидете убеден дека ја имате целата моја поддршка за европската перспектива на Северна Македонија. По одлуката на Советот од 25 март, посакувам што побрзо да се утврди преговарачката рамка. Франција ќе следи дали истата сооодветно ја одразува новата методологија за проширување и ќе продолжи да ги поддржува неопходните реформи за постигнување напредок на Северна Македонија кон Европската Унија, особено на поле на владеењето на правото кое е во сржта на европските вредности“, пишува во честитката од францускиот претседател.
Претседателот на Република Турција, Реџеп Таип Ердоган, во честитката вели дека блиската соработка и пријателските односи меѓу двете држави, кои се засноваат на моќните заеднички историски, општествени и културни вредности, со официјализирањето на членството во НАТО на Северна Македонија се зајакнати и со односот на сојузништво.
„Се надевам дека досегашните ваши успеси во насока на интеграција во ЕУ, во најскоро време ќе резултираат со членство во Европската Унија. Нашата земја која уште од самиот почеток ја поддржуваше Северна Македонија во интеграцијата со Европа и евроатлантските структури, за време на тешкиот период од соочувањето со пандемијата на КОВИД-19 низ кој минуваме, искажа напори за доставување на максимално возможна медицинска помош до нашата пријателска Северна Македонија“, пишува во честитката турскиот претседател, уверувајќи дека ефикасната соработка на билатерално ниво и на ниво на мултилатерални платформи и во следниот период ќе продолжи.
Претседателката на Република Грција, Катерина Сакеларопулу упати искрени честитки и срдечни желби за напредок, развој и просперитет на Република Северна Македонија и нејзините граѓани. „Нашите билатерални односи влегоа во нова ера. Со нетрпение очекувам постојано проширување и продлабочување на тесната соработка и синергијата помеѓу нашите две земји во сите области од заеднички интерес, согласно Договорот од Преспа“. Грчката претседателка во честитката пишува за важноста од целосна и систематска имплементација на Договорот од Преспа што е во заеднички интерес на двете земји, како и во интерес на стабилноста и развојот на регионот, што сè уште се соочува со важни предизвици. „Би сакала да истакнам дека Грција цврсто го поддржува курсот за пристапување на Северна Македонија во ЕУ, во согласност со правилата што важат за пристапувањето на секоја нова членка во Европската Унија и за добрососедските односи, пишува грчката претседателка изразувајќи очекување за конструктивна и тесна соработка за проширување и продлабочување на билатералните односи и партнерството, како што доликува на две соседни и пријателски земји.
Претседателот на Република Унгарија, Јанош Адер, во честитката пишува дека нашата земја може да биде горда што постигна важни пресвртници на патот на евроатлантските интеграции, како што се членството во НАТО и одлуката за започнување на преговори за пристапување во ЕУ. „Ве уверувам дека Унгарија ќе продолжи да ја поддржува Република Северна Македонија на нејзиниот пат кон европската интеграција“, пишува во честитката унгарскиот претседател и додава дека односите меѓу Унгарија и Северна Макеедонија се одлични и изразува надеж дека и понатаму ќе се зајакнуваат политичката, економската и културната соработка меѓу двете држави во иднина.
Претседателката на Швајцарската Конфедерација, Симонета Сомаруга во честитката по повод 8 Септември, Денот на независноста на Република Северна Македонија, вели дека добрите односи базирани на доверба меѓу двете држави овозможуваат заедничко справување со големите глобални предизвици. „Со нетрпение очекувам да работам со вас за да ги надминеме овие предизвици. Вам и на граѓаните на Република Северна Македонија им посакувам среќа, просперитет и успех во иднината“, пишува во честитката швајцарската претседателка.
Честитка по повод 8 Септември, Денот на независноста на Република Северна Македонија, пристигна и од претседателот на Романија, Клаус Јоханис.
Украинскиот претседател Володимир Зеленскиј во честитката пишува дека ги цени традиционално пријателските односи меѓу двете држави и изразува благодарност за поддршката на Северна Македонија на суверенитетот и територијалниот интегритет на Украина.
„Убеден сум дека заедничките приоритети на европската и евроатлантската интеграција се солидна основа за ефективно реализирање на постојниот потенцијал на нашата билатерална соработка. Користејќи ја оваа пријатна прилика, Ви посакувам, Ваша Екселенцијо, добро здравје и успеси во одговорните државни активности, а на пријателскиот народ на Северна Македонија – мир и хармонија“, се вели во честитката од украинскиот претседател.
Претседателот на Република Молдавија, Игор Додон, во честитката изразува задоволство од пријателските односи и соработка меѓу двете држави што динамично се развиваат, како и силната желба на неговата земја за развивање и јакнење на билатералните односи. „Мое убедување е дека успесите на вашата земја ќе станат важни одредници за продлабочена билатерална соработка“ пишува во честитката претседателот на Молдавија.
Генералната Гувернерка на Канада, Џули Пајет, во честитката по повод Денот на независноста, пишува дека и двете земји се посветени на евро-атлантските вредности коишто беа истакнати за време на средбата меѓу претседателот Пендаровски и премиерот на Канада, Џастин Трудо. „Канада ја поздрави Северна Македонија во НАТО во март, како 30-та членка на Алијансата и ние продолжуваме да ги поддржуваме вашите напори за напредок во процесот на пристапување во Европската Унија. Уверена сум дека ќе продолжиме да се придржуваме кон заедничките цели и наредната година, водени од нашите заеднички идеали и заеднички интереси“, пишува во честитката Генералната Гувернерка на Канада.
Генералниот Гувернер на Австралија, Дејвид Харли, во честитката изразува доверба дека пријателските односи меѓу двете држави ќе продолжат да просперираат во годината што следува. „Солидарноста на меѓународната заедница е поважна од кога и да било, за светските нации да работат заедно во справувањето со предизвиците од вирусот КОВИД-19“, стои во честитката од Генералниот Гувернер на Австралија.
По повод 8 Септември, Денот на независноста на Република Северна Македонија, писма со честитки до претседателот Пендаровски испратија и Неговото Кралско Височество Мохамед бин Салман бин Абдулазиз Ал Сауд, Престолонаследник, Заменик премиер и министер за одбрана на Кралството Саудиска Арабија, Кралот на Мароко, Мохамед VI, претседателот на Египет, Абдел Фатах Ал Сиси, претседателот на Палестина, Махмуд Абас, претседателот на Авганистан, Ашраф Гани, претседателот на Индонезија, Џоко Видодо, претседателот на Монголија, Халтмагин Батулга, како и генералната секретарка на Меѓународната организација на франкофонијата, Луиз Мушикивабо.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Центар наскоро ќе стане првата општина во земјава со систем за мерење на бучава, рече Герасимовски
Општина Центар наскоро ќе стане првата општина во земјава со систем за мерење на бучава во реално време, најави градоначалникот Горан Герасимовски. Според него, јавната набавка е завршена, а веднаш по изборите ќе бидат поставени 30 мерни единици на различни локации.
„Заврши јавната набавка, чекаме да поминат изборите за да ги поставиме мерните единици – првично 30. Преку мобилна апликација, секој граѓанин ќе може да провери каква е фреквенцијата на бучава на одредена локација“, изјави Герасимовски.
Системот, како што објасни, ќе им овозможи на граѓаните докази при пријавување во Министерството за внатрешни работи или до општинските инспекциски служби. Целта е брза и ефикасна реакција на прекршителите, особено во зони каде што постојат проблеми со прекумерна бучава од угостителски објекти и сообраќај.
Во вториот дел од изјавата, Герасимовски зборуваше за следниот голем проект на општината – постепено затворање на Дебар Маало за моторен сообраќај, со што ќе се намали хаосот со паркирањето и ќе се создаде подобар квалитет на живот за жителите.
„Имаме ревидиран проект за затворање на Дебар Маало. Тој е доставен до Министерството за внатрешни работи и веќе имавме два состанока со МВР за да го подобриме и да добиеме одобрување. Така и беше договорено на последниот состанок“, рече Герасимовски.
Планот е Дебар Маало да се затвора дел по дел, почнувајќи веднаш по завршувањето на изборниот процес, а првата рампа веќе е поставена.
„Веќе поставивме рампа на почетокот на Боемска улица. Разговараме за начинот на кој таа зона ќе функционира, и тоа ќе биде пример за затворање и на други населби каде што сообраќајот и паркирањето се хаотични“, додаде градоначалникот.
Македонија
Николоски го претстави планот за Николиќ во Дојран: Уредена плажа, патека и подобро електроснабдување
Потпретседателот на ВМРО-ДПМНЕ, Александар Николоски, при посетата на дојранското место Николиќ, најави повеќе инфраструктурни и развојни проекти за локалното население и туристите.
Николоски посочи дека приоритет е решавањето на проблемот со снабдувањето со електрична енергија, бидејќи местото брзо се шири со нови куќи и викендици.
Како втор проект го најави уредувањето и осветлувањето на пешачката патека што ќе води од населбата до плажата, која, според него, ќе стане туристичка атракција.
Трет приоритет е уредувањето на плажата Николиќ, која ќе добие концесионер со обврска да ја трансформира во современо туристичко место.
Николоски додаде дека се разговара и за изградба на културен дом и решенија за предучилишно згрижување на децата.
„Убеден сум дека Илија Николиќ ќе биде новиот градоначалник на Дојран и дека заедно ќе ги реализираме овие проекти со поддршка од Владата“, изјави Николоски.
Македонија
Мицкоски од Пробиштип повика на масовна излезност во вториот круг
Во првиот круг коалицијата којашто ја предводи ВМРО-ДПМНЕ освои 33 градоначалници. Двајца во меѓу време, помеѓу првиот и вториот круг, против кандидати на нашите кандидати се откажаа, што значи дека сега веќе се 35 градоначалници и во уште 24 општини сме во вториот круг. Во недела ќе се одлучува кој ќе биде градоначалник во тие 24 општини. Во 6 од тие 26 општини сме второпласирани, со тенденција и со голема шанса, бидејќи разликата е премногу мала, да бидеме првопласирани, рече претседателот на ВМРО-ДПМНЕ, Христијан Мицкоски на вечерашниот мини митинг во Пробиштип во рамките на изборната кампања под слоган „Вистинскиот избор! Твојот човек! Твоето место! За твојата иднина!“ за вториот круг од локалните избори во недела на 2 ноември.
Мицкоски изрази убедување дека коалицијата предводена од ВМРО-ДПМНЕ, после овие локални избори ќе има 59 градоначалници.
„Истовремено, дозволете ми да информирам дека во 58 општини советничките листи ан коалицијата предводена од ВМРО-ДПМНЕ победија и имаат убедливо мнозинство во Советот. Кога на сето тоа ќе се додаде и резултатот во Градот Скопје, односно убедливото водство на идниот градоначалник на Градот Скопје, Орце Ѓорѓиевски, 90 илјади наспроти 30 илјади, отприлика нешто повеќе од 3 спрема 1, очекуваме во вториот круг таа бројка да дојде до 120 можеби 125 илјади гласа. И убедливата победа на советничката листа на коалицијата предводена од ВМРО-ДПМНЕ за Град Скопје, доаѓаме до фантастична бројка од 60 општини во кои што се состои и Градот Скопје, нешто што до сега на ниту една политичка коалиција во независна Македонија не и се случило“, истакна Мицкоски.
Втората крупна политичка порака, вели Мицкоски, која сакам денес од Пробиштип да ја испратам, е дека конечно, партијата која повеќе од 20 години беше дел од сите влади во Македонија, Демократската унија за интеграција, на овие локални избори е поразена.
„Ние велевме на парламентарните избори пред година и половина ги развластивме и дека ќе дојде време, кога на локалните избори, тие ќе бидат поразени. И тие практично се поразени на овие локални избори“, рече Мицкоски.
Додаде дека во вториот круг имаме три опции, од кои првата е да се гласа за коалицијата која ја претставува ВМРО-ДПМНЕ, која е победничката коалиција, додека втората опција е поранешната владина коалиција предводена од СДСМ, која е опција која не враќа назад во времето и која ја ограбуваше, понижуваше и распродаваше Македонија.
„И третата опција, по мене, најкатастрофални е да останеме дома и да не излеземе на изборите и да дозволиме некој друг да одлучува во наше име“, дециден беше Мицкоски додавајќи дека со седењето дома никој не се казнува, туку со тоа се казнуваат самите граѓани кои не излегле на гласање.
Затоа, Мицкоски ги повика граѓаните на Пробиштип, но и на цела Македонија во недела на 2 ноември да излезат на гласање што е можно помасовно и да го дадат својот глас онака како што тие мислат дека е најдобро.
„Но, убеден сум дека кога ќе застанете позади параванот, со пенкалото во рака и со гласачкото ливче пред вас, ако го слушате разумот и вашето срце, и длабоко погледате во вашата душа, ќе видите и ќе препознаете дека таму извира бројот 9 и името на Тони Тоневски. И јас сум убеден дека тоа ќе биде вашата опција за следните четири години“, посочи Мицкоски.

