Македонија
Шаќири: Градиме образовен систем што поттикнува развој на дигиталните вештини кај учениците

Трета година по ред Северна Македонија е дел регионалната програма „Училишта на 21 век“, финансирана од Владата на Обединетото Кралство, која има за цел да го развива критичкото размислување, дигиталните и вештините за кодирање кај учениците на возраст од 10 до 15 години. Во рамки на програмата се организираат обуки за наставници околу начинот на нејзина реализација, но и натпревари за учениците на национално, а потоа и на регионално ниво, на кои тие го презентираат стекнатото знаење преку креирање на проект за надминување на одреден предизвик од секојдневието, со примена на уред за кодирање: микробит.
На ученичкиот натпревар во тековната учебна година кој се одржува денес, учествуваат 10 тимови на ученици чии предлог проекти, односно решенија за одредени општествени предизвици, ги минаа претходните фази на евалуација и беа оценети како најкорисни и иновативни.
Пред почетокот на натпреварот свое поздравно обраќање до учесниците имаше министерот за образование и наука Јетон Шаќири, кој рече дека дигиталните вештини се веројатно најпотребните во денешно време, а тоа се должи на брзиот развој на технологијата и нејзиниот продор во сите општествени сфери.
„Нивното поседување е предуслов за извршување на бројни професии и занимања, а дефакто, во најмала рака неопходни се и заради секојдневна комуникација, информираност и одржување врски преку светот на интернетот. Токму и во таа насока го позиционираме националниот образовен систем, односно го насочуваме неговиот иден развој – градиме модел преку кој сите нови генерации на ученици, меѓу повеќе други вредности ќе стекнуваат и сé понапредни и понапредни дигитални вештини“, рече Шаќири, додавајќи дека се работи на осовременување на наставните планови, програми и материјали за учење, како и на опремување на училиштата со модерна ИТ-технологија.
Министерот изрази задоволство што во напорите за модернизација на националниот образовен систем, земјата има голема поддршка од низа вистински и долгогодишни партнери меѓу кои и Обединетото Кралство преку Британскиот совет и амбасадата во Скопје.
„Благодарение на програмата „Училишта на 21 век“, микробит уредот кој пред 4 години беше сосема непознат за нашите ученици на возраст до 15 години, денес таа технологија е совладана и успешно се применува во наставата и во изнаоѓање решенија за предизвици од секојдневието“, истакна Шаќири, потенцирајќи дека е воодушевен од проектите кои со помош на овој уред ги креирале учениците, со што докажале дека иако се релативно млади, како што рече, доколку од нив се побара да дадат предлог за надминување на одреден предизвик, ќе се потрудат и ќе предложат одлично решение.
Посакувајќи им успех на натпреварот, истакна дека сите ученици кои се дел од финалната фаза на натпреварот се гордост не само на нивните семејства, туку и национална гордост, затоа што, потврдуваат дека државата има млади кои ќе бидат предводници на промените и двигатели на општеството.
„Овде првото место е само за еден тим, но во светот и секојдневието ќе имате толку многу можности за натпревар и за докажување, што верувам дека поради вашиот голем натпреварувачки дух нема да сакате да ги пропуштите“, реше Шаќири.
Стручно жири составено од претставници на Бирото за развој на образованието и професори од ФИНКИ, ќе ги оценува презентираните ученички проекти, по што, точно на пладне ќе бидат прогласени победниците, односно најдобрите три проекти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Почна акцијата за чистење на депонијата во Никуштак, ќе бидат потрошени пет милиони денари

Министерството за животна средина и просторно планирање денес ја започна акцијата за санација на дивата депонија во селото Никуштак, општина Липково.
Оваа депонија, идентификувана како една од најопасните во Националниот план за управување со отпад, претставува сериозна закана за здравјето и животната средина, како за жителите на Липково, така и за соседните општини. Честите пожари и постојаното загадување се голема загриженост за граѓаните од регионот.
Од Буџетот за 2025 година за овој проект се обезбедени околу 5 милиони денари, како и механичка опрема за безбедно управување со отпад. По завршувањето на техничките подготовки, денес започнаа градежните работи на терен.
Меџити рече дека санацијата на оваа депонија е голем чекор кон заштита на здравјето на граѓаните и подобрување на условите за живот во општина Ликове и околниот регион. Тој нагласи дека нема повеќе време за чекање и дека институциите имаат обврска конкретно да дејствуваат на терен.
Македонија
Предложен притвор за таткото што тепаше играчи на фудбалскиот натпревар во Штип

Основното јавно обвинителство Штип денеска поведе итна постапка против едно лице за кривично дело – Насилство.
Осомничениот извршил грубо насилство на 24 август на стадионот „Бело Брдо“ во Штип, за време на фудбалски натпревар меѓу младинските екипи на фудбалските клубови „Брегалница“ и „Шкупи“.
Со дејствијата тој ја загрозил сигурноста на две деца родени 2010 година, играчи за тимот на „Беласица“, нанесувајќи им телесни повреди. Освен тоа, кај оштетените, останатата присутна публика и во јавноста предизвикал чувство на несигурност, загрозување и страв.
Настанот се случил во 89-тата минута од натпреварот, која судијата поради прекршок (фаул) доделил втор жолт картон со што го исклучил од игра синот на осомничениот, кој играл за „Шкупи“.
Незадоволен од одлуката, најпрво синот се однесувал неспортски и со тупаници и со удар со нога се обидел да се пресмета со еден од фудбалерите на „Брегалница“. Тогаш на теренот влегол таткото и со тупаници и клоци започнал да ги удира двете деца, нанесувајќи им телесни повреди – повеќе набиеници и скршеница на нос без дислокација. На игралиштето влегле и други лица од публиката, кои спречиле натамошна ескалација на настанот.
Јавниот обвинител до судијата на претходна постапка од Основниот суд во Штип поднесе предлог за определување мерка притвор за осомничениот, имајќи го предвид видот и сериозноста на кривичното дело против јавниот ред, опасноста од бегство на осомничениот и можноста за повторување на делото.
Македонија
Седум пожари денеска во Македонија, три изгаснати

На територијата на Македонија имаше вкупно седум пожари на отворен простор, од кои два се активни, два се под контрола и изгаснати се три пожари, информира Центарот за управување со кризи.
Активни се еден пожар во Општина Долнени, во село Долгаец каде гори мешана шума и еден пожар на влезот на Крушево каде гори депонија.
Под контрола е пожарот во Јасен, и еден пожар на планината Кожуф каде гори висока шума.
Изгаснати се пожари во Општина Штип: с. Судик (стрниште); Општина Дебар: с. Елевци (ниска вегетација) и во Општина Куманово: нас. Гоце Делчев (ниска вегетација).