Македонија
Шекеринска во Брисел на состаноци посветени на буџетирањето на одбраната и мисијата во Авганистан
Министерскиот состанок на Северноатлантскиот совет на Алијансата на кој учествува министерката за одбрана Радмила Шекеринска, продолжи денеска со две сесии, посветени на буџетирањето на одбраната и на мисијата на Алијансата во Авганистан, „Одлучна поддршка“.
Шекеринска информираше дека буџетот за одбраната во последните две години расте, а државата е на одличен пат зацртаните 2 посто од бруто-домашниот производ, алоцирани за одбрана, да бидат постигнати до 2024 година.
На состанокот посветен на мисијата „Одлучна поддршка“ во Авганистан, министерката ги поздрави и поддржа напорите на НАТО за воспоставување на стабилност, безбедност, мир, слобода и демократија во оваа земја. Истакна дека нашата земја ќе продолжи да придонесува со свои припадници во оваа мисија во која сега имаме 47 војници, подофицери и офицери. Тоа е факт кој покажува дека Северна Македонија не отстапува од своите позиции и секогаш носи одлуки кои се за доброто на регионот, на Алијансата, и на глобално ниво.
Денеска, Шекеринска имаше и две одвоени средби со министрите за одбрана на Италија, Елизабета Трента и на Полска, Мариус Бласчзак.

View of the room
На средбата со министерката Трента, Шекеринска ги повтори позициите на Северна Македонија дека Италија беше и останува исклучително значаен партнер и набрзо сојузник на нашата земја и дека ние ја цениме сета досегашна италијанска поддршка, особено во изминатиот клучен период за нашата држава. Министерката Трента рече дека поддршката продолжува и дека во Италија во тек е процесот на ратификација на Протоколот за пристапување на Северна Македонија во НАТО.
На средбата Шекеринска – Бласчзак, беше потврдена исклучително добрата билатерална соработка меѓу Северна Македонија и Полска, која беше крунисана со ратификацијата на пристапниот протокол за членство на нашата земја во Алијансата, во април годинава. Министерот Бласчзак порача дека одбранбената соработка е одлична и дека таа во иднина ќе се продлабочи уште повеќе.
По завршувањето на состанокот на Северноатлатнскиот совет, министерката Шекеринска ќе учествува на Бриселскиот самит на Германскиот Маршалов Фонд, каде ќе говори на тема иновациите и новиот пристап кон безбедноста.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Комунална хигиена-Скопје: Најголемо количество непрописно одложен отпад во февруари, 600 кубни метри, е подигнато во општината Центар
Во текот на месецот февруари 2026 година, екипите на ЈП Комунална хигиена-Скопје подигнаа и транспортираа приближно 11 000 тони мешан комунален отпад од домаќинствата на територијата на градот Скопје, извести ЈП Комунална хигиена-Скопје.
„Отстранети се и 2505 кубни метри отпад од диви депонии лоцирани во сите скопски општини, а најголемо количество непрописно одложен отпад – 600 кубни метри – е подигнато во општината Центар.

Еко-патролата при ЈП Комунална хигиена-Скопје во текот на месец февруари изготви вкупно 100 записници за претставници на стопанските субјекти и физички лица коишто биле затекнати при неправилно одлагање на отпадот. Записниците за прекршителите на Законот за јавна чистота беа врачени во следните општини:
1. Општина Чаир – 54 записници
2. Општина Карпош – 18 записници
3. Општина Аеродром – 11 записници
4. Општина Центар – 9 записници
4. Општина Ѓорче Петров – 6 записници
5. Општина Гази Баба – 2 записника
ЈП Комунална хигиена-Скопје продолжува со реализација на еко-предавања и работилници во скопските основни училишта и предучилишни установи. Преку еко-едукацијата најмладите жители на нашиот град се запознаваат со активностите на Претпријатието, се едуцираат како правилно и совесно да постапуваат со својот комунален отпад, на кој начин се врши примарната селекција на отпадот и како се одвива процесот на рециклирање.

Во текот на минатиот месец, 253 ученици и 64 дечиња од основните училишта и градинките во општините Аеродром, Центар и Чаир имаа можност да ги проследат едукативните предавања за правилно постапување со отпадот и заштита на животната средина. Предавањата се одвиваа на македонски, албански и турски јазик“, соопшти ЈП Комунална хигиена-Скопје.
Македонија
Посебен режим на сообраќај денеска во Скопје
Денеска, во официјална посета на Република Северна Македонија ќе престојува генералниот секретар на НАТО, Н.Е. Марк Руте.
Поради посетата, Единицата за безбедност на патниот сообраќај ќе преземе мерки за воспоставување посебен режим на сообраќај во централното градско подрачје на Град Скопје.
СВР Скопје апелира до сите граѓани учесници во сообраќајот да ги почитуваат наредбите и насоките што ќе ги даваат полициските службеници, со цел безбедно и непречено одвивање на сообраќајот.
Македонија
Без вода делови од Центар и Сарај
Од ЈП Водовод и канализација – Скопје, известуваат дека денеска:
· Поради дефект на водоводна цевка со пречник од Ф-2 цол на улицата Св. Кирил и Методија 38 (на паркингот кај Трготекстил), 09:00 часот до санирање на дефектот, прекинато водоснабдување ќе имаат корисниците на дел од ул. Св. Кирил и Методија, општина Центар;
· Поради чистење и дезинфекција на двете комори во резервоарот за питка вода во село Бојане, во наредните 4 дена (03.03 до 06.03.2026 година) помеѓу 08:00 и 13:00 часот, можно е да има намален притисок и краткотрајни прекини на водоснабдувањето во село Бојане, општина Сарај.

