Државата и граѓаните не може да ја платат цената на стравот и калкулациите на ВМРО-ДПМНЕ, изјави Радмила Шекеринска запрашана од новинарите во Битола дали се знае кога ќе продолжат преговорите со ВМРО-ДПМНЕ и дали воопшто ќе продолжат.

„Вие знаете дека направивме се да постигнеме договор и да испратиме порака и до нашите институции за спроведување на изборите и до фирмите, и до државните институции но пред се до граѓаните, дека како држава знаеме да носиме одлуки и да создаваме една предвидлива клима. За жал во последниот период и ВМРО-ДПМНЕ избегнуваше средби на којшто работите ќе се пресечат и ќе се договорат. Ние никогаш нема да бидеме таква партија, секогаш ќе го бираме разговорот и секогаш ќе даваме предност на консензусот, меѓутоа консензус не може да значи запирање на се во државата, консензус не може да значи да се држат граѓаните и државата во заложништво“, рече Шекеринска.

Додаде дека со ВМРО-ДПМНЕ ќе имаат средби и ќе разговараат секојпат кога ќе постои за тоа потреба и иницијатива, меѓутоа за СДСМ е јасно дека целта е на најголем можен број на граѓани да им биде шанса да гласаат, а од друга страна целта е на сите овие граѓани, дел којшто очекуваат финансиска помош од државата, дел којшто очекуваат помош за фирмите, да им биде дадена шанса државата да функционира во полн капацитет.

„Јас се сеќавам на многу средби со претставници на граѓаните, невладини организации особено бизнисот, прва порака која ни ја упатуваат секогаш е: ‘Аман кога ги правите изборите нека биде кратко, ефикасно оти се запира’. Кај нас, ние сме во таква атмосфера и во пред изборно расположение уште од февруари. Ниту една држава ова не може да си го дозволи финансиски, економски и социјално, а особено не во сред на пандемија светска. Затоа направивме се, ќе разговараме ама државата не смее да ја плати цената на стравот и калкулациите на ВМРО-ДПМНЕ“, рече Шекеринска.