Македонија
Шекеринска на 10-годишнината на Албанија во НАТО: Непријателставата ги заменивме со сојузништво

Регионот научи од своите грешки, непријателствата ги заменивме со сојузништво, изјави министерката за одбрана, Радмила Шекеринска, која денеска присуствуваше на прославата по повод 10-годишнината од влегувањето на Република Албанија во НАТО, што се одржа во Тирана.
Во рамките на прославата министерката Шекеринска учествуваше на конференцијата „10 години Албанија во НАТО – посигурен регион“, при што се осврна на нашето членство во НАТО и политиката на Владата за реализирањето на оваа стратешка цел за нашата држава.
Шекеринска рече дека во 2008 и 2009 нашата држава заедно со Албанија се движеше кон НАТО, но дека тогаш патиштата ни се разделија. „Тоа ни испрати два сигнала: првин дека стратешките цели се остварливи и дека политиката на отворени врати е реална, но, од друга страна, нè потсети дека ако се пропушти шансата, може да се случи да се пропушти една деценија, а тоа е токму она што ни се случи нам“, рече министерката.
Таа додаде дека сепак земјата направи извонреден напредок што нè доведе до исполнување на една од стратешките цели – членството во НАТО.
„За една и пол година Владата успешно ја врати земјата на евро-атлантскиот пат, направи сериозни реформи во одбраната, како и уште потешки политички реформи, што подразбира значителна инвестиција во добрите меѓуетнички односи. Се справивме со најтешките проблеми, а во минатото тоа беа односите со нашите соседи – првин со Бугарија, а потоа и со Грција. Вреди да се спомне фактот дека успеавме да пронајдеме решенија за долгогодишниот спор со Грција, а ова покажува дека во регионот не само што можеме да гледаме напред, туку можеме да бидеме креативни за изнаоѓање решенија за дури и најтешките проблеми“, рече Шекеринска.
Министерката се заблагодари за силната поддршка од Албанија во процесот на пристапување, како и за брзата ратификација на пристапниот протокол за членство на Северна Македонија во алијансата.
„Најпозитивно беше тоа дека соседните земји во многу брзи и ефикасни процедури го ратификуваа пристапниот договор, а тоа кажува дека регионот научил од своите грешки. Повеќе не се гледаме себеси како непријатели, туку како најблиски сојузници. Вчера ја добивме и добрата вест од Вашингтон дека Белата куќа ги доставила предлогот и извештајот за ратификација на пристапниот протокол во Сенатот на САД“, истакна министерката.
Шекеринска рече дека членството во НАТО отвора нови перспективи, но и одговорности, кои сме подготвени да ги преземеме. „Нашата Влада одлучи да го зголемува буџетот за одбрана секоја година 0,2 проценти до 2024 година. Во минатото ние бевме дел од мисиите на НАТО заедно со Италија и со претставници од земјите од групата А5 во регионот. Повеќе од 4.000 наши војници инвестираа во глобалната безбедност во операциите предводени од алијансата“, додаде министерката.
Во однос на економскиот ефект од членството во алијансата, министерката истакна дека како и искуствата на земјите што веќе се членки на НАТО, и во нашата земја минатата година кога беше потпишан пристапниот протокол, странските директни инвестиции се зголемија четири пати во споредба со 2017 година, односно тие се двапати поголеми од досега најдобрите години според прилив на странски директни инвестиции.
Честитајќи ѝ уште еднаш на Албанија, Шекеринска рече дека регионалната стабилност и безбедност се во преден план на НАТО и изрази задоволство што и нашата земја станува контрибутор во мирот и просперитетот на Балканот.
На конференцијата, покрај домаќинот, албанската министерка Ољта Џачка, учествуваше и италијанската министерка за одбрана, Елизабета Трента.
Во рамките на прославата, албанското Министерство за одбрана за многубројните гости приреди воена парада и други свечени активности по повод десетгодишното членство во алијансата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Движењето ЗНАМ со панел-дискусии одбележа една година дел од Владата

Во полна сала, со силна енергија и инспиративни пораки, Движењето ЗНАМ –за наша Македонија, одржа панел дискусија под мотото „Посветеност –Отчетност – Резултати“. Во фокусот на настанот беше една година учество на Движењето ЗНАМ – за наша Македонија во Владата и што е направено досега.
Настанот беше поделен во два тематски панели, кои отворија прашања за реформите во јавната администрација, енергетиката, животната средина, правосудството, дигитализацијата, пензискиот систем, односите со верските заедници и здравството.
Во рамки на првиот панел „Јавната администрација и зелената иднина“,
каде панелисти беа министерот за јавна администрација Горан Минчев,
заменик-министерот за енергетика, рударство и минерална суровина
Мирослав Лабудовиќ, државниот секретар во министерството за
земјоделство, шумарство и водостопанство Борче Серафимовски,
директорите на Државниот инспекторат за животна средина Ивана Гиновска и Институтот за Акредитација Нико Берберу. Се говореше за реформските закони, енергетиката, земјоделието, животната средина и европската акредитација. Во него беше потенцирано дека реформите во државната служба се движат кон поефикасен, инклузивен и модерен јавен сектор кој е во служба на граѓаните. Истакнати беа стратешките вложувања во енергетиката и поддршката за земјоделците, особено младите, со фокус на дигитализација,
задругарство и климатска отпорност.
Дополнително, беа презентирани политики за заштита на животната средина засновани на превенција и одговорност на сите општествени чинители, како и значењето на европската акредитација за конкурентноста на македонската економија.
Низ вториот панел „Силни институции – стабилно општество“, министерот за правда Игор Филков, заменик министерот за дигитална трансформација Радослав Настасијевиќ Варџиски, директорот на Фондот за ПИОМ Никола Мемов, претседателката Комисијата за односи верските заедници и директорот на Клиниката за физикална медицина Злате Мехмедовиќ.
Во дискусиите панелистите истакнаа дека реформата започнува со
транспарентна комуникација, дигитална достапност, правна сигурност и
социјална инклузивност.
Вториот панел ја нагласи клучната улога на транспарентноста и реформите во правосудството, при што беа презентирани системски закони насочени кон зајакнување на интегритетот, професионалноста и независноста на судството, како и целосно нов Закон за Судски совет.
Панелистите дискутираа и за стабилизацијата на пензискиот систем,
дигиталната трансформација на институциите, унапредувањето на
здравството и важноста од градење на општество засновано на меѓусебна почит и верски дијалог.
Движењето ЗНАМ уште еднаш покажа дека со интегритет, стручност и
посветеност, Македонија може да чекори напред – обединета, сигурна и достојна, со најава дека настани од ваков тип ќе следат низ целата
држава.
Македонија
Директорот на БЈБ на планинарски марш од пет километри во тетовско: Службата не е само униформа – таа е братство

Директорот на Бирото за јавна безбедност во Министесрвтвото за внатрешни работи (МВР), Александар Јанев, денеска учествуваше на планинарски марш со полициски службеници од СВР Тетово, извести МВР. Досега вакви маршови се пдржаа во Велес, Струмица и Битола.
„Во духот на соработката, заедништвото и искрената комуникација, заедно го градиме оној полициски идентитет кој значи блискост со граѓаните, одговорност кон задачата и сила која извира од заедничките вредности. Надвор од канцелариите и рутините, утрово низ заедничка активност со пешачење од околу 5 км низ тетовскиот регион имавме можност да го јакнеме тимскиот дух, но и – што е најважно – подлабоко да се дозапознаеме, да зборуваме отворено за предизвиците на теренот, за реалните проблеми со кои се соочуваме, и за начинот како уште повеќе да се доближиме до граѓаните од Тетовскиот регион. Полицијата не се мери само со акции и бројки. Таа се мери со довербата што ја има кај народот. А таа доверба се гради со постојано присуство, искрен дијалог и подготвеност да се биде со граѓаните – и кога е тешко, и кога е мирно.“, кажа на маршот директорот Јанев.
Директорот Јанев потенцираше дека градиме полиција која не се плаши да ги погледне проблемите во очи и што чекори напред со дигната глава – за стабилноста на државата, за безбедноста на граѓаните, и за достоинството на полициската професија.
„Македонија има полиција што се движи напред – тим по тим, регион по регион – со срце за народот и со сила за предизвиците. Градиме тимови што се потпираат еден на друг – мотивирани, дисциплинирани и посветени на заштита на секој граѓанин. Затоа што секоја лична победа е колективна сила, а секој ден е нова можност да станеме подобри – за себе, за колегите, и за Македонија.“, истакна на крај Јанев.
Македонија
Средба Филипче-Клингбајл во Берлин: Македонија мора да продолжи по европскиот пат

Претседателот на Социјалдемократскиот сојуз на Македонија, Венко Филипче, денеска во Берлин, Сојузна Република Германија, во рамки на Конгресот на германската Социјалдемократска партија (СПД), се сретна со актуелниот вицеканцелар на Германија и сојузен министер за финансии, Ларс Клингбајл, кој воедно е и ко-претседател на СПД.
Од СДСМ известија дека на средбата, претседателот Филипче изразил благодарност до вицеканцеларот Клингбајл, за континуираната и силна поддршката на СПД за евроинтеграцискиот процес на Македонија, посочувајќи дека како сестрински партии, ја споделуваат истата визија за праведна, обединета и солидарна Европа.
„Филипче и Клингбајл разговараа за забрзувањето на евроинтеграцискиот процес на Македонија, како и на земјите од регионот и Западен Балкан, оценувајќи го како клучен процес за стабилизација, развој и напредок на државите-кандидатки за членство во Европската Унија. Беше посочено дека само со вистинска интеграција во ЕУ може да се обезбеди одржлив напредок – и економски и институционален, особено во однос на владеењето на правото и борбата против корупцијата.
Заеднички беше ставот дека Македонија мора да продолжи по европскиот пат, како единствена алтернатива за напредок и подобра иднина на државата“, извести СДСМ за средбата на лидерот во Берлин.
Филипче го потсетил Клингбајл дека во периодот на Владата предводена од СДСМ беа реализирани клучните стратешки цели – Македонија стана членка на НАТО и ги отпочна преговорите за членство во ЕУ.
Обајцата на средбата ја нагласиле потребата од натамошно унапредување на меѓупартиската соработка и размена на искуства меѓу СДСМ и СПД, како сестрински партии кои делат заеднички социјалдемократски вредности, базирани на солидарност, еднаквост, владеење на правото и социјална сигурност.