По изјавите на лицето Орце Ѓорѓиевски каде вчера коментира за некакви автобуси од Белград, не ни е јасно дали некој го мести да делува недоветно или самиот си верува во лагите кои ги кажува и со кои редовно се бламира пред јавноста, реагираат од Град Скопје во нивното соопштение.

„Имено, од информации пласирани во јавноста автобусите „Соларис“ за кои раководството на градот Белград најавило дека ќе ги донира во Македонија се наменети за сите градови во земјава. Ако ја следиме логиката на Орце Ѓорѓиевски, тогаш, сите градоначалници во земјава според него се неспособни да си ја вршат работата, а особено градоначалниците од редовите на ВМРО-ДПМНЕ каде се обавува јавен превоз.

Глупоста во изјавата на Ѓорѓиевски дотолку повеќе излегува на виделина, ако во предвид земеме дека Владата до овој момент не е способна со сопствени средства да набави автобуси за општините и градот Скопје, иако ние понудивме средствата за набавката да ги префрлиме на сметка на Владата а тие да ја спроведат набавката.

Дополнително, со оваа изјава на Ѓорѓиевски се потврдува информацијата пласирана во јавноста во изминатите денови од лице блиско до руските структури во земјава и истовремено блиско до ВМРО-ДПМНЕ, на кое пред две години му беше оневозможено да врши дејност во Скопје поради сомнеж за финансиски малверзации, кое изјави дека планира со 100 автобуси да отпочне повторно со вршење на оваа дејност“, дополнуваат од оваа институција.

Прашуваат, дали со оваа донација од Белград се подготвува ова лице, „блиско до ВМРО-ДПМНЕ и руските безбедносни служби“, повторно да влезе во дејноста со јавен превоз и со помош на ВМРО-ДПМНЕ да го приватизира ЈСП. Дали оваа најавена бизнис зделка е причината зошто Советот на Град Скопје раководен од ВМРО-ДПМНЕ системски го уништува ЈСП Скопје, не дозволува набавка на нови автобуси и зошто не се исплаќа Владиниот долг од 8 милиони евра кон ЈСП за превозот на студентите?

Лицето Орце Ѓорѓиевски, според Град Скопје, треба посериозно да се посвети на својата работа, а помалку да се грижи за работата на другите градоначалници. Ова лице како претседател на ЗЕЛС, како што истакнуваат, целосно ја киднапираше и политизираше институцијата, поради што за прв пат по 50 години постоење градоначалници ја напуштаат оваа сега партизирана организација.

Како што нагласуваат од Град Скопје, Ѓорѓиевски треба да одговори, не со празни флоскули туку со докази и бројки, колку од проектите од неговата предизборна програма реализирал и дали е вистина дека реализацијата е под 15% од ветените проекти.

Министерот за европски прашања, Орхан Муртезани, утрово одржа тематски работен појадок со новинари, на кој ја презентираше Реформската агенда на Северна Македонија, која вчера беше и официјално одобрена од страна на Европската комисија.

Овој настан беше можност за информирање на медиумите за клучните аспекти на Агендата, која се фокусира на спроведувањето на суштински социо-економски и фундаментални реформи во периодот 2024-2027 година, во согласност со Планот за раст на Европската комисија за Западен Балкан.

Муртезани ги претстави главните елементи на Реформската агенда, вклучувајќи ја правната основа, структурата на реформите и индикаторите за нивно следење. Посебен акцент беше ставен на чекорите и условите за плаќање според Инструментот за реформи и раст за Западен Балкан, кој предвидува исплати врз основа на задоволително исполнување на реформските чекори. Преку оваа Агенда, земјата ќе добие пристап до финансиската помош на Европската Унија, со што се овозможува значително економско интегрирање и усогласување со европските стандарди.

Муртезани истакна дека соработката со Европската комисија продолжува преку постојано следење на напредокот и исполнувањето на договорените реформи, со посебен фокус на владеењето на правото, борбата против корупцијата, развојот на пазарната економија и зајакнувањето на институциите.

Посетата на претседателката на Европската комисија, Фон дер Лајен, беше можност Владата, конечно, да ја презентира стратегијата за излез од сегашните позиции и отварање на кластерите, со што можеме да фатиме чекор со Албанија. За жал, тоа не го направија, оцени портпаролката на СДСМ, Богданка Кузеска.

„Од друга страна, пораките на Фон дер Лајен беа јасни како за уставните измени така и за Коридорот 8. Ја повикуваме Владата на одговорно однесување, да не ги толкуваат, туку да ги спроведуваат пораките во интерес на граѓаните. Сите други толкувања власта се обидува да ги наметне се замајување на јавноста на штета на напредокот на државата.
Стратегијата треба да ни биде да стекнуваме поддршка во Брисел и кај државите членки, а не да се измислуваат изговори, кои се само за внатрешна политичка употреба. Тоа не го решава проблемот, туку го одлага“, додава таа.

Истовремено, според неа, конфузни се и изјавите на партнерите на Мицкоски во Владата.

„Од една страна, Таравари вели дека пораките се јасни од ЕУ и дека нема можност за измени, но од друга, Муртезани тврди дека има поддршка од земји членки за ставот за одложено дејство на уставните измени.

Прашањето е: ќе се консолидира ли, конечно, владиниот тим или ќе продолжиме да живееме во паралелен свет, а државата да ја водат паралелни влади? Ова е сериозен проблем, кој ги држи и земјата и граѓаните во заложништо и хаос што го создава Владата на Мицкоски. Токму затоа СДСМ бараше да се свика затворена седница на Владата за кончено да слушнеме дали има и кој е планот на Владата за ова прашање.

Над 75 % од граѓаните сакаат влез во ЕУ. СДСМ ќе продолжи да дејствува конструктивно, но нема да бидеме дел од манипулации и одлагања како алатка за кочење на иднината на младите. Ние сме на чекор пред целта, Владата треба да се охрабри и да го нарпави тој последен чекор“, вели Кузеска.

Ја повика Владата на одговорно однесување, да не ги толкуваат, туку да ги спроведуваат пораките во интерес на граѓаните.

„Од нас ќе имаат поддршка доколку го променат досегашното однесување и доколку почнат да дејствуваат на конструктивен начин“, нагласи Кузеска.