Македонија
Штедачите на Еуростандард банка: Пет години нема ниедно обвинение, ниеден обвинет, ниедно рочиште

Пет години по затворањето на „Еуростандард банка“, оштетените штедачи повторно јавно реагираат дека истрагата на Основното јавно обвинителство за гонење организиран криминал стагнира – без обвиненија, без обвинети и без рочишта. „Само молк, само време што истекува, само надеж што бледнее,“ велат од Здружението.
„Не го забораваме јавното признание на Трифун Костовски за сторен криминал – незаконското префрлање на 3 милиони евра депозити во Комерцијална банка. Не ги забораваме фирмите поврзани со директори, роднини и бизнис-кругови, кои добиле кредити без реални гаранции. Не ги забораваме погледите на нашите најмили кога сфатија дека нивната макотрпна заштеда исчезнала преку ноќ поради недомаќинско работење на поедини криминогени умови. Не забораваме дека според извештајот за стечајот, 149 фирми не вратиле ниту една рата, а 58 од нив добиле кредити вредни 16,8 милиони евра, обезбедени само со обични меници“, велат штедачите.
Истакнуваат дека голем дел од оштетените се пензионери, работници и мали бизниси. Тие обвинуваат за „внимателно испланиран криминал“ во кој се вклучени лица од бизнис и семејни кругови на поранешни директори.
„Ќе постоиме додека последниот денар не биде вратен и додека последниот одговорен не биде изведен пред лицето на правдата. Во целиот овој план единственото нешто што не го планирале е дека ние – оштетените – ќе се обединиме и нема да замолчиме,“ порачаа од Здружението, прашувајќи дали побрзо ќе се изгради пругата Скопје–Солун отколку што ќе се поднесе обвинение за криминал тежок над 50 милиони евра.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Тошковски: Граѓаните заслужуваат полиција која ќе се грижи за нивната безбедност и благосостојба

Министерот за внатрешни работи Панче Тошковски заедно со раководството на министерството и полицијата учествуваше на семинар за професионалност и оперативна независност во рамки на проектот „Промоција на интегритет и добро управување во земјите на Западен Балкан“ под покровителство на Центарот за интегритет во одбранбениот сектор на Кралството Норвешка (CIDS).
Главна цел е унапредување во менаџирањето на полицијата и безбедноста на граѓаните во насока на балансирање на професионализмот и оперативната независност со политичкото влијание и пристапи кои не се засновани на заслуги. Главната цел е дефинирање на стратешки комуникациски модел кој ја исполнува улогата на политички надзор на МВР врз полицијата, почитувајќи на нејзината независност.
„Секојдневно треба да се реформираме и унапредуваме со една јасна цел, градење на модерна европска полиција која ќе ја гарантира безбедноста и благосостојбата на сите свои граѓани, ќе се бори со сите видови криминал ослободена од било какви притисоци и влијанија.“, потенцираше министерот Тошковски.
Македонија
Претседателката со остри критики: По толку бели линии апсурдно е да се зборува за црвени линии, ние и референдумски резултат не почитувавме

Претседателката Гордана Сиљановска – Давкова вели дека не го разбира предлогот на СДСМ за изготвување резолуција со црвени линии. Таа додава дека Собранието до сега донело повеќе декларации кои не биле почитувани.
Ваквата изјава доаѓа по најавата на опозициската СДСМ дека ќе изготви предлог резолуција за евроинтегративните процеси на земјата за поставување на црвени линии, а ќе се однесува и на отворените прашања со Бугарија како и внесувањето на бугарите во уставот.
„Не го разбирам предлогот, да бидам искрена. По толку бели линии да зборувате за црвени линии е апсурдно. Ние имаме декларација и тоа не само една, неколку декларации сме донеле во Собранието и не беа почитувани. Ние дури и референдумски резултат не почитувавме, а камо ли црвени линии. Не разбирам што значи црвена линија во овој поглед, особено не ја разбирам аргументацијата дека доколку сепак соседот посегне по вето ние тогаш ќе ги прекинеме преговорите. Да, ќе ги прекинеме преговорите и тоа му одговара на соседот ама ќе го смениме Уставот по 37. Пат. Апсолутно нема потреба. Нека седнат во Собранието нека се договорат пред да даваат изјави во Брисел да постигнат консензус за тоа како ќе се однесуваме. Ако така се однесуваа по средбата на која сите и се израдувавме во Владата, мислам дека и ЕУ поинаку ќе се однесуваше“, рече Сиљановска – Давкова.
Таа смета дека ако и лидерите на опозицијата и лидерите на сите партии зборуваа во еден глас дека мислиме вака и и вака, ова е добро решение, сигурно поинаку ќе се однесуваат кон нас.
„Ама да слушате вие вака, вака јас слушнав аргументација – побараа или предложија уставни измени со одложено дејство, не им ги прифатија. Како да се работи за некој не знам каде. Еве јас одговорно тврдам дека првиот човек на Европската Унија, господинот Кошта, за измените со одложено дејство рече дека се извонреден потег. Зарем мисли некој дека ние ќе предложиме уставни измени со одложено дејство ако за тоа нема уставен основ? Па и првите уставни измени беа со одложено дејство. Па и последните, преспанските, беа со одложено дејство. Дејството се определува со уставен закон. И првиот уставен закон што го донесовме ’91 за спроведување на уставот беше дека Уставот стапува во сила во моментот на донесувањето освен ако со уставен закон не е поинаку определено. Значи то ами е мене чудно. Уште почудно ми е второто тврдење – побараа да се почитуваат одлуките, пресудите на судот во Стразбур, но и тоа не им го прифатија“, рече претседателката.
Таа упати прашање до Советот на Европа, чуму ни е судот во Стразбур ако неговите пресуди не важат за сите држави.
„Јас мислев дека пресудите на судот се конечни, извршни и важат за сите држави. Какви се тое пресуди кои не важат? Каков е тој суд чии пресуди не важат? Значи крајно време е да седнат сите да се договорат како ќе настапуваат надвор. Зборуваме за нас, зборуваме за најинтерниот акт, зборуваме за највисокиот акт, Уставот. Не знам како да објаснам, студенти ќе разбереа. Многу убаво во Уставот пишува дека предлагач овластен на уставни измени се 150 илјади граѓани, Владата и претседателот на државата. Не читам јас Европската Унија, не читам соседите. Така е со сите устави“, вели Сиљановска – Давкова.
Македонија
На 26-годишнината од формирањето на Бригадата на Југоисточна Европа – SEEBRIG, Мисајловски укажа на нејзиното значење за регионалната безбедност

Денеска (3 септември) во касарната „Боро Менков“ – Куманово со свечена церемонија се одбележаа 26 години од формирањето на мултинационалната бригада SEEBRIG како дел од Процесот на соработка меѓу министерствата за одбрана на Југоисточна Европа (SEDM) – две клучни иницијативи кои го зацврстуваат регионалниот одбранбен дијалог и безбедносната соработка во Југоисточна Европа.
Министерот за одбрана Владо Мисајловски во своето обраќање пред присутните високи претставници од земјите-членки, меѓу кои и началникот на Генералштабот, генерал-мајор Сашко Лафчиски и началникот на Генералштабот на романските вооружени сили, генерал Георгита Влад, нагласи дека SEEBRIG како една од најуспешните проекти во рамки на SEDM, во изминативе 26 години се докажа како најдобар инструмент за меѓусебно разбирање и развој на капацитетите на земјите членки.
„Работејќи заедно, рамо до рамо во регион кој секогаш се стреми кон мир, сигурно можеме да бидеме уште поефикасни во обезбедувањето безбедност и просперитет за нашите граѓани“, рече Мисајловски. Тоа што во изминативе пет години Командата на Бригадата на Југоисточна Европа е лоцирана во Куманово, додаде тој, е јасен показател за нашата цврста верба во регионалната соработка која гради мостови и ги поврзува нашите вооружени сили.
Мисајловски истакна дека сите земји кои се дел од Бригадата имаат исти вредности –мир и просперитет, особено важно денес во време на геополитички промени и неизвесност. „Мораме да одиме напред, да продолжиме да ја градиме нашата отпорност, нашите капацитети и нашето заедничко разбирање. Ја градиме нашата подготвеност, како гаранција дека реалноста на денешницата ќе биде наша реалност утре“, потенцира министерот Мисајловски.
Министерот Мисајловски упати благодарност до Симона Кожакару за нејзината посветеност како досегашен Претседавач на Секретаријатот на SEDM и на Политичко-воениот управувачки комитет и му посака успех на амбасадорот Елефтериос Ангхелопоулос кој ќе биде на оваа позиција во наредните 2 години.
Бригадата на Југоисточна Европа беше формирана во 1998 година во Скопје, каде беше потпишан Договорот за формирање мултинационалната мировна сила Југоисточна Европа. Командата на Бригадата досега на ротациона основа беше сместена во Пловдив, Констанца, Истанбул, Трнавас, Лариса и Куманово. Во 2026 година командата повторно ќе биде лоцирана во Истанбул, Турција. Во текот на изминатите 26 години, Бригадата учествуваше во бројни мировни мисии, меѓу кои и во ISAF мисијата во Авганистан, каде ја презеде командата над Кабулската мултинационална бригада. Исто така, организирани беа 14 биенални вежби „Seven Stars“, кои се најзначајни во регионот и вклучуваат учество на повеќе од 200 војници од девет земји.