Македонија
Шукова: Се грижиме за граѓаните и им помагаме на општините во Полошкиот Регион изложени на зачестени поплави

Министерката за животна средина и просторно планирање, Каја Шукова, постојаниот претставник на УНДП, Армен Григорјан, и градоначалникот на општина Јегуновце, Димитар Костадиноски, денеска беа во теренска посета на локацијата во селото Туденце, каде што почнуваат работите за санација и регулација на коритото на горниот тек на реката Вардар во општина Јегуновце.
Во своето обраќање министерката Шукова потенцира дека Полошкиот Регион е подрачје што е исклучително ранливо на временските непогоди, како што се поплавите, кои многу често имаат катастрофални последици за жителите.
„Од таа причина, применувајќи интегриран пристап со поддршка и соработка на сите вклучени страни, како што се донаторите, Владата, локалната власт и заедниците, им помагаме на локалните заедници во зголемување на отпорноста кон ваквите природни непогоди“, истакна таа посочувајќи дека санацијата на речните корита, пред сè, подразбира чистење на природното корито од градежен шут, комунален и кабаст отпад, како и вегетација од самото корито што го попречува текот на реката.
Постојаниот претставник на програмата за развој на Обединетите нации во Северна Македонија, Армен Григорјан, оцени дека поплавите во горниот тек на Вардар, во општина Јегуновце, се честа закана за домовите и земјоделскиот имот на жителите на селата во овој регион, што се потврди и во текот на јуни кога двапати дојде и до излевање на реката и до поплави.
„Корист од оваа интервенција директно ќе имаат околу 3.000 жители на општината Јегуновце и околу 10.000 жители на градот Гостивар преку засилувањето на отпорноста и намалувањето на ризиците од поплави“, изјави Григорјан.
Проектот „Подобрување на отпорноста кон поплави во Полошкиот Регион“, во чии рамки ќе се спроведуваат активности за санацијата и регулација на коритото на горниот тек на реката Вардар, ќе се спроведуваат на две локации, во општината Јегуновце, како и во општината Гостивар, во вкупна должина од 17,2 километри и стабилизирање на 12-те најкритични речни делници со вкупна должина од 1,8 километар.
Проектот е дел од пошироката програма за намалување на заканите и ризиците од природни катастрофи, пред сè, од поплави во Полошкиот Регион, и негова цел е да поттикне трансформациска промена во управувањето со ризикот од поплави во регионот, што ќе ја подобри севкупната отпорност на поплави во Полошкиот Регион и ќе помогне во усогласувањето на системот за управување со поплави на ниво на земја со ЕУ и други современи концепти и пристапи. За реализација на овие два зафата Швајцарија преку двете агенции: Швајцарската агенција за развој и соработка (SDC) и швајцарскиот државен секретар за економски прашања (SECO) за интервенција на реките Вардар Гостивар и Вардар Јегуновце одвои 1,5 милион долари, а контрибуцијата на Министерството за животна средина и просторно планирање изнесува 220 илјади долари. Проектот се спроведува во партнерство со УНДП.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Граѓаните плаќаат за чиста средина, а не за депонии и ѓубришта: Митески најави кривична против ЈП „Комунална хигиена“доколку не реагира за отпадот

Комуналните служби на Општина Аеродром само денеска собраа над 10 тони отпад (50м3) кои завршија во „Дрисла“, соопшти в.д. градоначалникот на Општина Аеродром, Дејан Митески.
„Ова не е еднократна акција – ова е наша секојдневна работа. Нашите општински служби се на терен, додека Градското комунално претпријатие кое треба да ја изврши оваа работа, е неажурно и немо. Доста е“.
Граѓаните, додава тој, плаќаат за чиста и уредна средина, а не за депонии и ѓубришта. Напоменува дека никој нема право да го загрозува здравјето и иднината на децата.
„Од утре продолжуваме уште поинтензивно.
Ако нема веднаш реакција од ЈП „Комунална хигиена“, како градоначалник ќе поднесам кривична пријава за загрозување на животната средина согласно член 218 од Кривичниот законик, и секојдневно ќе барам постапување од Обвинителството и МВР“, објави Митески.
Ова, како што истакна, не е политика, туку прашање на достоинство, здравје и иднина.
Македонија
Мицкоски: Народот е обединет и сплотен, не очекува убедлива победа за подобро и поубаво Сопиште

Лидерот на ВМРО-ДПМНЕ и премиер Христијан Мицкоски денеска присуствуваше на промоцијата на кандидатурата на Јане Мицевски за градоначалник на Општина Сопиште, како и на кандидатите за советници од ВМРО-ДПМНЕ и коалицијата.
„Народот е обединет и сплотен, не очекува убедлива победа за подобро и поубаво Сопиште.
Ветуваме реализација на многу проекти кои ќе ја подобрат инфраструктурата, ќе создадат нови можности за младите и ќе придонесат за економски развој и модернизација на општината. Заедно, со посветеност и транспарентност, ќе изградиме Сопиште какво што сите го посакуваме.
Јане Мицевски е вистинскиот избор за Сопиште“, објави Мицкоски.
Македонија
Николоски во Атина: во фокусот економската соработка меѓу двете земји и подобро регионално поврзување

Заменик претседателот на Владата и министер за транспорт Александар Николоски од денеска е во дводневна работна посета на Атина, каде ќе оствари работни средби со високи претставници на Владата на Грција.
Во рамки на посетата, планирана е средба со вицепремиерот Костис Катзидакис, министерот за инфраструктура и транспорт Христос Димас, како и со алтернативниот министер за инфраструктура и член на Парламентот, Константинос Киранакис.
Исто така предвидена е средба и со менаџментот на пристаништето Пиреа.
На средбите предвидено е да се разговара за економската соработка меѓу двете земји, како и за подобро регионално поврзување.
Ќе се разговара и за изградбата на брзата пруга на коридорот 10, што многу ќе приоднесе за развој на трговијата и размената меѓу двете држави, а ќе преставува и главен крвоток за поврзување на грчките пристаништа со Централна Европа.
Во рамки на средбите планирано е да се отворат теми за унапредување на сообраќајот на Коридор 10 и 10 -д, зголемување на ефикасноста во патниот и железничкиот транспорт, за промовирање на ависообраќајот, како и унапредување на регионалната соработка.