Македонија
Ѓорчев во Стејт департментот во Вашингтон

Пратеникот и меѓународен секретар на ВМРО-ДПМНЕ, Влатко Ѓорчев, е во неколкудневна работна посета на Соединетите Американски Држави. Во рамките на неговата посета Ѓорчев оствари средба со претставници на Стејт депарментот, а се сретна и со Даниел Твининг, претседател на Меѓународниот републикански институт (ИРИ) од Вашингтон, информираат од партискиот Центар за комуникации.
Ѓорчев на средбата во Стејт департментот се сретна со Дејвид Костеланчик, новиот директор на одделот за јужна и централна Европа, заменик-директорот Мајкл Константино, како и Џил Дитрих од канцеларијата за Македонија, кои ги информира за актуелните политички состојби во Македонија.
„ВМРО-ДПМНЕ ќе продолжи да ги развива силните билатерални односи на Македонија со САД, како и стратешкото партнерство базирано на договорот од 2008 година. Македонија ќе биде активна членка на НАТО, заедно со нашите сојузници од евро-атлантската заедница“, изјави Ѓорчев.
Тој ги информира соговорниците и дека ВМРО-ДПМНЕ подготвува сериозна и конкретна програма за привлекување инвеститори и нови фабрики на компании од САД во Македонија.
„Со напорна работа и економските политики на ВМРО-ДПМНЕ ќе настојуваме да донесеме уште повеќе инвеститори од САД, како и Германија, Велика Британија, Франција, Италија, Холандија, Белгија, Австрија и други земји“, посочи Ѓорчев.
На средбата со претседателот на Меѓународниот републикански институт (ИРИ), Даниел Твининг, беше констатирано дека ВМРО-ДПМНЕ и ИРИ ќе продолжат интензивно да соработуваат во делот на политичките обуки, кампањи, комуникација со гласачите, надворешната политика и другите аспекти на политичката соработка.
„ВМРО-ДПМНЕ и ИРИ соработуваат со години. Лично се сеќавам кога заедно со Борис Трајковски ја почнавме таа соработка во 1998 година со првиот претставник на ИРИ за Македонија, Кент Патон. Денес, ИРИ во Скопје има одличен тим и канцеларија, а тоа е гаранција дека ќе продолжат добрите проекти и нашата заедничка соработка и партнерство“, заклучи Ѓорчев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Доаѓа невреме – силен ветер, пороен дожд и град ќе ја погодат Македонија

Управата за хидрометеоролошки работи информира дека под влијание на влажна и нестабилна воздушна маса, во понеделник и вторник на повеќе места ќе биде нестабилно со пороен дожд и грмежи.
„Процесите ќе бидат поинтензивни особено во текот утрешниот ден кога локално ќе бидат во форма на невреме со пообилен пороен дожд за кратко време (над 15л/м2), силен ветер (над 60км/ч) и изолирана појава на град“, велат од УХМР.
Според најавите, од среда ќе преовладува претежно стабилно и потопло време со пораст на дневната температура.
Во Скопје, утре и во вторник времето ќе биде променливо облачно и нестабилно со пороен дожд и грмежи. Во делови од котлината ќе има појава на невреме со пообилен пороен дожд, силен ветер и изолирана појава на град.
Од УХМР препорачуваат во случај на појава на електрични празнења се препорачува поголема внимателност, да не се престојува на отворен простор и под осамени дрвја.
Македонија
ЦУК: Четири активни пожари во Македонија, 2 под контрола

Центарот за управување со кризи информира дека на територијата на Македонија се евидентирани вкупно 15 пожари на отворен простор, од кои: 4 се активни, 2 се под контрола, а9 се изгаснати.
Активни пожари: 4
1. Општина Чашка – над Богомила (мешана шума)
2. Општина Куманово – с. Слупчане (нискостеблеста шума)
3. Општина Студеничани – с. Дречавица (шумски пожар во планински терен)
4. Општина Македонски Брод – с. Грешница (деградирана нискостеблеста шума)
Под контрола: 2
1. Општина Долнени – с. Стровија, позади место викано Гајдарец-Клепало (нискостеблеста шума)
2. Општина Желино – с. Церово (мешана шума)
Изгаснати се пожарите во Берово, Брвеница, Струмица, Гевгелија, Куманово, Крушево, Долнени, Струга и Студеничани.
Македонија
(Видео) Избувнаа повеќе нови пожари – „Во Македонија има многу граѓани кои не ѝ мислат добро“, вели Михаилов

Попладнево низ повеќе делови од Македонија се појавија нови пожари, откако претпладне беше стабилизирана состојбата на теренот.
Надлежните институции реагираат со интервенции на копно и од воздух.
Информации објави заменик-директорот на ЈП „Национални шуми“, Кире Михаилов.
„Дефинитивно во Македонија има многу граѓани кои не и мислат добро, друго објаснување за ова кое се случува јас немам!
Пожаров кој го гледате е над село Ваксинце, општина Липково и избил пред 30 тина минути, а истиот ветерот многу бргу го шири накај Стража!
Таму се две екипи на ЈП “Македонски Шуми” Куманово и ТППЕ Куманово!
Откако ја стабилизиравме целосно состојбата и со добра координација на Главниот Штаб на Македонија до пладне го решивме и последниот активен пожар кај Долнени, во текот на попладневните часови веќе имаме пријава за неколку нови пожари!
После пладне е пријавен нов пожар во близина на село Богомила, општина Велес каде веднаш од страна на Главниот Штаб беа упатени сили на ЈП “Македонски Шуми” , екипи на МВР и месно население, а таму на помош беше пратен и делуваше од воздух еден хеликоптер.
Во 14 часот, во исто време се појавија два пожари, едниот во близина на село Милетино во општина Брвеница кој по брзата интервенција од копно беше локализиран и пожарот во општина Желино, во близина на село Церово на кој во моментов во координација со Главниот Штаб делуваат копнени сили составени од ТППЕ и ЈП “Македонски Шуми” и двата ЕР Трактори на ДЗС!
Исто така, нашите копнени сили кои сеуште се наоѓаат високо на пожарот во Долнени над селото Стровија попладнево ни пријавија појава на дури четири нови чадења или нови пожари кој во моментов службите ги проверуваат и пристапуваат на гасење на истите!“, напиша Михаилов на ФБ.