Македонија
(Видео) Ѓорѓиевски најави повратен удар: Арсовска не си ги знае ингеренциите

Неспособноста и агресивноста на Арсовска кулминира во последните 24 часа. Освен тоа што на очиглед на целата јавност може да се забележи дека таа нема капацитет, некадарна е и неспособна за водење на градот Скопје, со последната нејзина активност и обидот да се пише казна по џебот на граѓаните на Кисела Вода, покажува дека ниту си ги знае своите надлежности ниту си ги знае своите ингеренции и што е најстрашно – не знае која е територијата што истата ја администрира, обвини на денешната прес-конференција градоначалникот на Кисела Вода, Орце Ѓорѓиевски.
Во неделата неколку градоначалници со камиони со отпад беа попречени да го одложат во „Дрисла“.
„Како општини и градоначалници излеговме со наши колеги од соседни општини од Македонија да се справиме со проблемот што го создаде Град Скопје, Данела Арсовска, ‘Комуналната хигиена’. Со денови не знаеше да го реши. Токму затоа се самоорганизиравме, почнавме сами да си ги чистиме улиците. Откако неколку камиони беа наполнети со отпад, се упатија кон ‘Дрисла’, каде што за одлагање нема потреба од никаков договор, одлуката е донесена од 2005 година. Сите општини може да одлагаат отпад во ‘Дрисла’ за тоа да им се изработи фактура и да се наплати“, рече градоначалникот.
Тој обвини дека лажат оти нема договор и приложи влезни фактури до Општина Кисела Вода.
„Додека се спречуваше камионите од Кисела Вода и Сопиште да одложат отпад во ‘Дрисла’, возила со италијански регистарски таблички, селективно, но и други возила, се пуштаа да одлагаат отпад. Замислете, возилата на граѓаните на општина Кисела Вода, сопственост на Општината, биле попречувани да го одложат отпадот во ‘Дрисла’. Само нашите камиони беа задржани еден и пол час. По неколкупати повикување на разум од наша страна да го внесеме отпадот во ‘Дрисла’, немавме друга опција, освен да го одложиме пред јавното претпријатие ‘Дрисла’. Втората опција беше отпадот да го вратиме во Кисела Вода. Отпадот го одложивме пред ‘Дрисла’. Со ова Арсовска покажа дека, освен тоа што не си ги врши работите, туку и нè попречува ние да си ги завршиме работите за кои таа не е способна да ги изврши“, додаде тој.
Градоначалникот објасни дека депонијата „Дрисла“ се наоѓа дел од Сопиште и дел од Студеничени, општини надвор од ингеренциите на Град Скопје.
„Сакам да ја прашам Арсовска дали ги знае своите надлежности кога испраќа инспектори од Град Скопје да казнуваат надвор од границите на градот. Дали оваа постапка значи дека Арсовска може да влезе во филм дека е министер за внатрешни работи, па да почне да казнува народ на улиците и да ги апси. Госпоѓата не знае кои ѝ се надлежностите и ингеренциите. Таа нема капацитет за водење на институцијата, не знае да се справи со ниеден проблем. Ниту ги знае своите ингеренции ниту ја знае територијата со која администрира“, рече тој.
Ѓорѓиевски праша зошто новото раководство на „Комунална“ две години ги штитело луѓето што не оделе на работа, а примале плата.
Во однос на казната, градоначалникот објасни дека нема никаков основ, а правниот тим на Општината ќе постапи против неа.
„За оваа казна нема ниту еден денар да биде потрошен од буџетот на Кисела Вода, за оваа казна нема основ. Во која било ситуација во иднина, доколку се појави проблем, а не е во моја надлежност, никогаш нема да бидам нем набљудувач. Нашиот правен тим ќе постапи против казната, не е стигната, а имаме информации дека е изречена од Град Скопје. Казната е за одлагање отпад во неделата. Изречени се казни и за Општина Сопиште и 86 илјади евра на Кисела Вода за одложување отпад на јавна површина. Ингеренциите се на Општина Сопиште и на Општина Студеничани“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.