Периодот од нови 30 дена oд евентуална вонредна состојба би требало да се искористи за отпочнување подготовки за постепена нормализација на состојбата, вели професорот Марјан Ѓуровски од Факултетот за безбедност.

Тој ова го истакнува имајќи ги предвид потребите на граѓаните, работата на фабричките капацитети, економијата и државните институции.

„Верувам дека Претседателот на државата, Владата, Советот за национална безбедност ќе ги имаат во предвид сите аргументи ‘за’ и евентуално ‘против’ носењето на одлуката за вонредна состојба уште нови 30 дена, при тоа имајќи го во предвид следните четири елементи: Извештајот за превземените мерки и нивните ефекти во изминатите 25 дена, проценките за текот на справувањето со вирусот во земјава и воедно да се водат од основното начело на почитување на Уставот, функционирањето на политичкиот систем, демократските норми и состојбата со економијата“, нагласува професорот.

Ѓуровски е уверен дека одлуката на Претседателот ќе овозможи максимално искористување на ресурсите што ги има држава, со цел, како што вели, да излеземе со помали последици од кризата, и таа од здравствена да не прерасне во безбедносна и поголема економска криза.

„Рано е за одредени проценки, но верувам внимателно ќе се постапува и навремено ќе се донесат одлуките во функција на координација на институциите, искористување на ресурсите и справување со пандемијата на целата територијата на државата“, посочува професорот.

Според него, мнозинство граѓани во изминатите 30 дена манифестирале чувство на одговорност.

„Добро е што сите граѓани, нацијата се обедини и овој дух ќе го зачуваме по вториот месец од вонредната состојба со цел успешно да се справиме со ризиците по економската состојба која може да биде нарушена по пандемијата“, вели професорот од Факултетот за безбедност.