Македонија
Јавна расправа за Националната стратегија за сајбер-безбедност

Министерот за информатичко општество и администрација, Дамјан Манчевски, министерката за одбрана, Радмила Шекеринска, и министерот за внатрешни работи, Оливер Спасовски, денеска ја презентираа работна верзија на Националната стратегија за сајбер-безбедност на Република Македонија. На документот се работеше изминатите неколку месеци во рамките на работната група за изработка на стратешки документи од областа на сајбер-безбедноста, а стратегијата во моментот е објавена и достапна за коментари и предлози од сите засегнати страни.
Како што истакна министерот Манчевски, сајбер-безбедноста не смееме да ја гледаме само како нужно зло – таа во исто време е и поволна шанса за развој и напредување. Интернетот и понатаму останува богато поле за иновации, а глобалниот пазар за сајбер-безбедност расте – и тоа со огромна брзина. Ова се индустриите на иднината, кои на Македонија ќе ѝ помогнат да држи чекор со глобалните трендови и да постигне стабилен пораст на економијата. Генерално, сакаме да ја развиеме Македонија како следна хит ИКТ-дестинација. На таков начин ќе се отворат нови компании, со нови работни места, кои ќе нудат достоинствена плата.
Министерката Шекеринска се осврна на Стратегијата од аспект на одбраната и колку е неопходно да се има мултидисциплинарен пристап кој е во корелација со прописите на Европската Унија и НАТО. Таа истакна дека овој документ, Национална стратегија за сајбер-безбедност, е од исклучителна важност за граѓаните и институциите на оваа држава, што треба да ја гарантира нивната безбедност.
„Република Македонија е решена да стане членка на НАТО што побргу. Убедени сме дека на самитот овој јули Македонија ќе ја добие долгоочекуваната, долгозаслужената покана за членство во НАТО. Тоа значи дека нашите обврски од јули ќе станат само поголеми и ќе станат навистина обврзувачки. Токму овој период, периодот од покана до членство, е можеби најризичниот во поглед на сајбер-заканите. И во овој период Македонија ќе треба да ги покаже силата и компетенцијата на своите институции. Во тој контекст во рамките на стратегијата за која денеска дискутираме предвидено е да се обезбеди развој на сајбер-одбраната како неделив дел од сајбер-безбедноста. Предвиден е развој на единици со сајбер-капацитети во разни делови во Владата и Армијата и основна рамка за координација и комуникација при одговор на сајбер-напади на воените системи, но исто така и на критичната инфраструктура“, рече Шекеринска.
МВР во рамките на своите надлежности активно презема мерки за превенција, заштита и сузбивање на компјутерскиот криминал и злоупотребите во информатичката сферата, иако не секогаш и доволно бидејќи за ефикасна првенција и заштита во сајбер-просторот ни е потребен холистички и мултидисциплинарен пристап.
„Работна верзија на Стратегијата за сајбер-безбедност претставува чекор понатаму во реално воспоставување еден таков посакуван холистички и мултидисциплинарен пристап. Практично, овој документ по својата содржина, насоки и цели е од суштинско значење за Република Македонија во делот на сето она што значи сајбер-безбедност. Читајќи ја визијата на Стратегијата за сајбер-безбедност, точно ќе го видиме концептот на сајбер-безбедност што го поддржуваме и посакуваме. Визијата е Република Македонија да има сигурно, безбедно, доверливо и отпорно дигитално опкружување, поддржано од квалитетно изградени капацитети, висококвалификувани експерти, изградено ниво на доверба и интензивна национална и меѓународна соработка во областа на сајбер-безбедноста“, истакна Спасовски.
На јавната расправа беа презентирани главните цели на Стратегијата по што се отвори дискусија со присутната експертска јавност. Присутните изразија поддршка за оваа иницијатива земајќи активно учество во јавната расправа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Завршена регионалната програма за сертификација на службени кучиња за мириси на производи

Во рамки на проектот „Поддршка на националните власти на државата во намалувањето на ризикот од пролиферација и злоупотреба на мало и лесно оружје“, успешно беше завршен процесот на Регионалната програма за сертификација на службени кучиња за мириси на производи – значаен чекор во зајакнување на регионалната безбедност и борбата против транснационалниот криминал.
На свеченоста по повод завршувањето на обуката, директорот на Бирото за јавна безбедност при Министерството за внатрешни работи, Александар Јанев, им додели дипломи на учесниците, нагласувајќи дека оваа програма претставува симболично, но и суштинско градење на мостови помеѓу институциите од целиот регион.
„Со шест модуларни обуки и создавање тимови подготвени да бидат на првата линија во борбата против криминалот, Регионалниот К9 центар се етаблира како водечка точка за обука и сертификација. Заедно вложуваме во безбедноста, стабилноста и иднината на регионот,“ истакна директорот Јанев.
Проектот е реализиран со поддршка на ОБСЕ, ФРОНТЕКС и донаторите, чија соработка и ангажман беа клучни за успешната имплементација на програмата.
Со ваквите активности, Министерството за внатрешни работи и Бирото за јавна безбедност ја потврдуваат својата посветеност на континуираното унапредување на капацитетите за справување со организиран и транснационален криминал, како и зајакнување на регионалната безбедносна соработка.
Македонија
Времето утре: променливо облачно со сончеви периоди

Времето утре ќе биде променливо облачно со сончеви периоди. Ќе дува слаб до умерен, а вдолж Повардарието и во источните делови засилен северен ветер. Во североисточните подрачја ќе има услови за локален слаб дожд. Минималната температура ќе биде во интервал од 4 до 12, а максималната ќе достигне од 11 до 21 степен.
Во Скопје, променливо облачно со сончеви периоди. Ќе дува умерен, повремено засилен северен ветер. Минималната температура ќе се спушти до 11, а максималната ќе достигне до 19 степени.
Времето во наредните денови
До вторник времето ќе биде претежно стабилно со дневни температури малку под просекот за овој период од годината. Кон средината на следната седмица под влијание на влажна и посвежа воздушна маса ќе има услови за локални врнежи од дожд и опаѓање на дневната температура за неколку степени.
Македонија
Мицкоски: Тројната оска СДСМ-ДУИ-Левица функционира затоа што власта им е помила од се во животот

Христијан Мицкоски, претседателот на ВМРО-ДПМНЕ, денес имаше свое обраќање од народниот митинг одржан во општина Дојран, во рамки на изборната кампања 2025 која е под слоганот „Вистинскиот избор! Твојот човек! Твоето место! За твојата иднина!“, за претстојните локални избори закажани на 19 октомври. Тој зборуваше за како што вели, полуформалната коалиција на СДСМ-ДУИ-Левица за претстојните локални избори, тоа е истата таа коалиција од претходната власт која не остави никаков печат, освен грабеж и опустошување на државата.
„На овие избори имаме две опции. Трета опција нема. Едната опција е една, полуформална, на моменти неформална, а по својата длабока суштина, многу формална коалиција, во која што членуваат политички партии кои што се здружиле поради две основни цели“, рече Мицкоски.
Мицкоски истакна дека она што ја обединува желбата за власт кај оваа коалиција за претстојните локални избори е желбата за власт, по секоја цена, па дури и по цена на погазување на сопствените принципи, а како што вели тој, ја обединува и заедничката омраза кон ВМРО-ДПМНЕ.
„Првата е власта и желбата за власт. А, втората е патолошката омраза кон ВМРО-ДПМНЕ. Тоа е коалицијата СДСМ-ДУИ и политичката партија Левица. Се осојузиле Венко, Али и Димче затоа што власта им е помила од се во животот, па дури и од сопствените принципи, но и патолошката омраза која што ја имаат кон ВМРО-ДПМНЕ е толку силна што успеа да ги премости сите нивни разлики, и политички и лични, само за да се обединат и да се обидат на овие избори да направат некаков резултат. Тоа е првата опција“, истакна Мицкоски.
Како што вели Мицкоски, претходната власт, која коалицира повторно за овие локални избори, освен што ја опустоши и ограби државата, ја распродаде и потпишуваше секакви договори, не оставија никаков друг печат.
,,Втората опција е коалицијата која што ја предводи ВМРО-ДПМНЕ. Кога ќе ги анализирате овие две опции, тогаш ќе дојдете до неколку заклучоци. Првиот заклучок е дека, оваа прва опција, оваа коалиција помеѓу Венко, Али и Димче, покрај тоа што се обединиле со една цел, а тоа е власт. Тие практично со својата порака на овие избори, а тоа е, ,,Се бориме за нашиот дом“, јасно не потсетуваат дека имаа 7 години влада во Македонија, 7 години можност, да се борат за нашиот заеднички дом, нашата татковина Македонија. А, освен тоа што направија голем пустош, ја ограбија практично Македонија, ги опљачкаа граѓаните во Македонија, ја распродадоа Македонија, потпишуваа секакви договори, друг спомен, друга меморија од тие 7 години буквално никој не може да се сети“, вели Мицкоски.
Мицкоски потсети и на говорот на еден од претходните претседатели на СДСМ од собраниската говорница, што посочува како СДСМ коалицира со Левица одамна, и ова нема да им биде прв пат. Според него, ова е коалиција што државата ја враќа назад во времето.
,,Ќе ве потсетам на она излагање на тогашниот претседател на СДСМ, и тогашен претседател на владата, Зоран Заев, во македонското Собрание, кога му се обраќаше на тогаш пратеникот и претседател на Левица, Димче Апасиев и кога му рече: „Нели се договоривме јас и ти пред изборите, јас да ти обезбедам ресурси, а ти да работиш против ВМРО-ДПМНЕ и Мицкоски, и ако освоиш пратеник, после изборите да коалицираме, и на тој начин да ја спасиме Македонија од ВМРО-ДПМНЕ и Мицкоски?“. тоа го кажуваше тогашниот претседател на Владата, кон својот сокриен коалиционен партнер, Димче Апасиев, пратеник во македонското Собрание и претседател на политичката партија Левица“, кажа Мицкоски и додаде:
,,Затоа денес, било кој, ако има било каква дилема, дали оваа тројна оска функционира, не треба да има. Делата сами говорат, делата сами ни го оцртуваат патот по кој што тие би не воделе. Со еден збор, тоа е коалиција која што не враќа назад во времето. Времето на грабежот, времето на националните понижувања, времето на предавствата, времето кога граѓаните чувствуваа длабока болка, затоа што сите одеа напред, а ние не само што стагниравме, туку на моменти и се враќавме назад“.