Македонија
Јанакиески усно казнет со 3 години, а писмено добил 3,6 години за ТНТ: недостигаат 248 докази, има пропусти, не се знае кој е оштетен
Ексминистерот за транспорт и врски, Миле Јанакиески, бара правда од Апелација за предметот ТНТ, кој се однесува за уривањето на објектот „Космос“. Остана на тврдењето дека не постапил незаконски и дека тоа е потврдено со 36 одлуки, пресуди и решенија. На судечкиот совет му посочи дека во пресудата на Кривичниот суд има низа пропусти, па побара да биде ослободен или предметот да се врати на повторно судење.
Прво, постои решение и 36 одлуки, пресуди и решенија на Управниот суд, Основниот граѓански суд, Врховниот суд на РСМ, со кои е утврдена законитост во постапувањето на Општина Гази Баба, т.е. дека решението за уривање е законито. Второ, дека не постои основ за штета, т.е. се одбива барањето на оштетениот за надомест на штета. Дури и Уставниот суд со одлука од 21.12.2011 утврдил дека не постои дискриминација на Фијат Цановски по основ на политичка припадност. И покрај тоа што сите претходно споменати судски одлуки се во правен промет, значи ниту се изменети ниту, пак, поништени, во обжалената пресуда Основниот кривичен суд Скопје утврдува дека решението е незаконито, дека незаконски се рушело и дека му следува штета на Фијат Цановски и неговата фирма. Имено, судот воопшто не ги анализира овие пресуди и само констатира дека тие не биле спротивни на обвинителниот акт, што е апсолутна невистина. Исто така, во целост е погрешно повикувањето на бланкетните норми, кои не се однесуваат на решение за рушење, туку за санација на покрив. За потсетување, и самиот Фијат Цановски призна дека градел спротивно на одобрението за градење, но судот процени дека треба да донесе пресуда со цел остварување лична корист на Цановски“, рече Јанакиески во Апелација.
Тој додаде дека на денот на објавување на пресудата тој бил осуден на три години затвор, а во писмено изработената пресуда е осуден на 3 години и шест месеци. Негира дека го поттикнал тогашниот градоначалник на Гази Баба, Тони Трајковски, незаконски да го урива „Космос“ посочувајќи дека немал ниту еден контакт.
„Не постои ниту еден доказ дека сум имал каков било контакт со Тони Трајковски и покрај повеќе од 80.000 незаконски снимки и над 200.000 СМС-пораки за кои СЈО на времето тврдеше дека имало во целокупниот материјал што им бил на располагање“, додаде Јанакиески.
Бурим Рустеми го нарече „незаконски обвинител“.
„Овој предмет незаконски го застапуваше обвинител, т.е, виш јавен обвинител, кој, замислете, како виш обвинител поднесе и жалба на пресудата. Каде е тука двостепеноста во постапката? Имено, цело време од одбраната се криеше фактот, но тоа го утврдивме при увид дека по влегување во сила на новиот закон за Јавно обвинителство и по именувањето на Бурим Рустеми за виш јавен обвинител, дека на 9.11.2020 година јавниот обвинител Љубомир Јовевски го овластува обвинителот Гаврил Бубевски да го води овој предмет. На одбраната не ѝ беа дадени сите докази, што е еклатантно кршење на правата на одбраната за што има став и ЕСЧП. На пример, од листинзите на мобилниот телефон на Фијат Цановски, што сам ги доставив, јасно се гледа дека во критичниот период има 9 пораки помеѓу Груевски и Фијат Цановски, а Обвинителството достави 5“, додаде Јанакиески.
Се осврна и на вештачењето од Мирослав Грчев.
„За ова вештачење има поднесок од одбраната дека неговото сведочење е незаконско бидејќи вештачел на копии, не смее и не можел да вештачи во согласност со Законот за вештачењето, бил во кумашински врски со судијата кој постапувал во прв степен во овој предмет како претседател на совет и ја донел сега обжалената пресуда и најбитно како тоа урбанист вештачи за градба, но судот спротивно на ЗКП не се произнесе по овој поднесок како што не се произнесе и за други 12 поднесоци, кои се од суштински карактер“, посочи Јанакиески.
Дециден е дека пресудата е нејасна и неразбирлива. Тврди дека не се наведени 248 докази изведени во текот на постапката.
„Не е утврдено кој е оштетен во пресудата, постојат три правни или физички лица, кои судот ги утврдува како оштетени за истата наводна штета; Во пресудата ги наведува сведоците како сведоци на Обвинителството, тие беа и на одбраната, но тоа не е нотирано во пресудата; Судот како вешти лица на одбраната ги наведува Александар Петровски, Горан Смилевски, Емилио Фришчиќ и вештите лица Павле Гацов и Насер Хоџа. Ова е погрешна утврдена состојба бидејќи ова се вешти лица на Обвинителството, а не на одбраната; Во пресудата нема наведено 248 докази што беа изведени во текот на главната расправа. Судот не извршил анализа на стручните докази (мислењата на техничките советници) предложени од одбраната наспроти опсежната анализа на стручните докази предложени од Обвинителството“, рече Јанакиески во дел од образложението.
Им посочи на судиите да ја имаат предвид поврзаноста на предметот ТНТ и предметот „Рекет 2“.
„Но, исто така, пред да ја носите пресудата, ве молам да ги имате предвид и аспектите што излегоа во јавноста во врска со тесната поврзаност на предметот ТНТ со предметот ‘Рекет 2’, а никогаш не беа расчистени и покрај поднесоците на одбраната, пред сè, за искажаната благодарност на Ардијан Амзоски ден пред повлекувањето на обвинителниот акт од страна на тогашното СЈО, кое се водеше токму за овој ист кривично-правен настан“, додава Јанакиески.
Судиите Огнен Ставрев и Осман Шабани донесоа осудителни пресуди за сите обвинети за случајот познат како ТНТ за уривањето на објектот „Космос“, сопственост на бизнисменот Фијат Цановски. Експремиерот Никола Груевски, кој се гони за поттикнување, односно злоупотреба на службената положба и овластувањето, доби девет години затвор. На поранешниот министер за транспорт и врски Миле Јанакиески му се досудени три години затвор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Силјановска: Како никој не се сети да им каже во ЕУ дека самите во член 4 гарантираат немешање во внатрешните работи и почитување на уставните структури
Како може некому да ветите дека ќе го смените Уставот, кога Уставот може да го сменат само пратениците во Уставот. Како знаете, дека вие можете однапред да ветите нешто што не е ваша надлежност?, му порача кандидатката за претседателка од ВМРО-ДПМНЕ, Гордана Силјановска-Давкова на нејзиниот опонент Стево Пендаровски во телевизиско соочување вечерва.
„Деновиве Макрон даде изјава дека ЕУ не е само територија, туку е концепција на човештвото и правото. Е, од тоа тргнувам и јас кога размилувам за ЕУ. За нејзините темелни вредности и принципи без кои таа не е политине заедница туку е само машинерија. Значи таа не е догма. Што ќе направам јас? Најпрво ќе направам регионални чекори. Штом ќе завршат изборите јас сакам да разговарам со моите соседи и заради регионалната политика и заради очекуваната поддршка од нив. Сакам да објаснам дека и кога има една преговарачка рамка не е логична заканата со вето. И дека може, дури и кога преговарачката рамка е ваква, низ интерпретација поинаква да се примени. Од типот, ако вие речете дека нема да употребувате вето за идентитески прашања, за историските дилеми и слично, протоколите, туку за Копенхагенските критериуми, јас ќе бидам сосема согласна. Значи, мислам дека е време кога ќе се смени власта, да чуе што мислиме и ние. Оти тоа е дијалогот што е нужен за добрососедски односи. Ако некој не го кажувал и ова досега, веројатно и тогаш било се во нивни раце“, рече Силјановска-Давкова.
Понатаму, како што додаде, како никој не се сетил да им каже на оние од Советот и од Европската комисија и сите останати со тоа се рушат темелните вредности на ЕУ? Бидејќи ЕУ гарантира во членот 4 почитување на уставните и политичките структури, немешање во внатрешните работи, почитување на дигнитет и интегритет, различности, неставање на билатерални спорови во рамката. Ако тоа не го кажете, вие ќе останете на прагматичните решенија.
Доаде и дека ниту еден од темелите на кои почивала програмата на Пендаровски во 2019 година не останале. Сите се урнале и ништо не е остварено.
Македонија
СДСМ за Димитриевски: Ароганција е кога човек-партија одработува против своите довчерашни сопартијци
Ароганција е кога човек-партија одработува против своите довчерашни сопартијци и во тоа нема ништо социјалдемократски ниту вредносно туку единствено и само личен интерес, реагира СДСМ по обвинувањата кои ги упати Максим Димитриевски од ЗНАМ, дека дозволиле отварање на бугарски клубови во Македонија и нивната ароганција е ненадминлива.
„За тоа кој ги отвораше клубовите со имиња како Ванчо Михајлов адресата е Белиот дворец на ДПМНЕ. Многу позната адреса каде ЗНАМ ги договара идните чекори за соработка заедно со поддршката на Гордана Силјановска Давкова.
Освен сликите на Ванчо Михајлов по штабовите на ДПМНЕ доволно говорат сликите на Мицкоски со основачите на тие клубови по манастирите низ државава за кои не слушнавме ниту збор од ЗНАМ.
Дали е тоа поради враќање на стари долгови за локалните избори 2021 година во Куманово или нови долгови јавноста ќе види многу скоро“, се вели во реакцијата на СДСМ.
Македонија
Утревечер и во петок нестабилно време со пороен дожд и грмежи
Времето утре ќе биде променливо облачно.
Од пладневните часови на повеќе места ќе биде нестабилно со пороен дожд и грмежи, локално во форма на краткотрајно невреме со засилен ветер и услови за изолирана појава на град. Услови за пороен дожд ќе има во текот на ноќта. Минималната температура ќе биде во интервал од 6 до 12, а максималната ќе достигне од 18 до 25 степени.
Во Скопје променливо облачно. Од пладневните часови во делови од котлината ќе биде нестабилно со пороен дожд, грмежи, засилен ветер и услови за изолирана појава на краткотрајно невреме. Минималната температура ќе се спушти до 12, а максималната ќе достигне до 23 степени, јавува УХМР.
Во наредните денови, следува период на променливо облачно време со повремени локални врнежи од дожд. Утре, во ноќта кон петок и во петок на повеќе места ќе има развој на нестабилна облачност проследена со пороен дожд и грмежи, локално во форма на краткотрајно невреме со засилен ветер и услови за изолирана појава на град.
Дневната температура од утре до сабота ќе биде во постепено опаѓање, а во недела ќе се покачи за 2 до 4 степени..