Негативната селекција и позитивната дискриминација се два главни проблеми со кои македонското општество мора да се справи доколку сака вистински напредок во политичката култура, економскиот развој и стабилноста, истакна пратеничката од ВМРО-ДПМНЕ Иванка Василевска на трибината „Жените во домашната и меѓународната политика“.

„Погледнете овие 20 години – имаме огромна инфлација на незаслужени купени академски дипломи. Треба само да се направи анализа во државната и јавната администрација – колку од овие дипломи завршиле на раководни позиции? Ова ја уништува мотивацијата, но и вредноста на самата диплома, што е јасен пример на негативна селекција“, изјави Василевска.

Во однос на позитивната дискриминација, таа нагласи дека квотите за етничка застапеност не секогаш даваат квалитетен резултат.

„Апсолутно е потребно сите етнички заедници да имаат еднаков пристап до пазарот на трудот, но мора да се воспостави систем во кој критериумите ќе бидат правични и ќе овозможат квалитет, а не вештачки баланс“, додаде таа.

Василевска ја обвини ДУИ за злоупотреба на политичката моќ и создавање на лажни закани.

„ДУИ сега лиферува закани, но тоа е само одраз на нивното владеење. Колку членови на ДУИ се вработени во администрацијата без да се појавуваат на работа? Колку од нив земаат плата од државата, а работат во странство? Ова е класична злоупотреба на моќта за личен интерес“, рече таа.

На крајот, Василевска нагласи дека ВМРО-ДПМНЕ веќе најавила укинување на балансерот за вработување во јавниот сектор, како и воспоставување праведен систем во кој сите граѓани ќе имаат еднакви можности.

Членката на Извршниот одбор на СДСМ, Лолита Ристова, на прес-конференција изјави дека партијата спровела контрола на цените низ маркетите и констатирала дека нема намалување, туку напротив, нови поскапувања на основните прехранбени производи.

„Јајцата се повторно покачени и достигнуваат до 140 денари за пакување, јогуртот со 3,2% масленост чини 72 денари, млекото е од 70 до 80 денари, а сирењето се продава од 440 до 650 денари. Кашкавалот стана луксуз за граѓаните, со цена над 600 денари. Поскапени се и шеќерот, грашокот, гравот, леќата – сè што е неопходно за домаќинствата“, изјави Ристова.

Таа оцени дека владините мерки за замрзнување на маржите немаат ефект, а најавените контроли се само „празни ветувања“ на премиерот Христијан Мицкоски.

„Владата не презема ништо за да ги спречи овие поскапувања, но затоа без проблем набавува луксузни намирници за своите функционери. Народот нема за леб, а тие јадат аспарагус, манго, папаја, октоподи, лигни и ракчиња. Апсурдноста е уште поголема ако се знае дека Владата одби предлог за минимална плата од 500 евра, а истовремено троши огромни суми на егзотични производи“, истакна Ристова.

Според неа, оваа ситуација е резултат на „неспособноста и негрижата“ на власта, која наместо да работи за доброто на граѓаните, „одработува за интересите на големите трговци“.

Коалиција ВЛЕН претпладнево преку соопштение до медиумите вети дека здравството повеќе нема да биде жртва на лошо управување и злоупотреба и ги истакна достигнувањата на Арбен Таравари, кој на функцијата министер дојде од коалицијата ВЛЕН.

„Клиниката за инфективни болести, по повеќедецениско запоставување, е реконструирана и опремена со најсовремена технологија. Со инвестиција од 1,5 милиони евра првиот кат е претворен во достоен простор за пациентите и медицинскиот персонал.

Главните иновации кои до вчера ги немаше а денес се можни на оваа Клиника. Автоматски молекуларен дијагностички анализатор – единствен во регионот за PCR, CRP и HPV. Апарат за аспирација – целосно автоматизиран, прв од ваков вид во земјата. Дополнителна опрема: ЕХО, ултразвучна еластографија, гастроскоп, бронхоскоп, генератор.

Потсетуваме дека Клиниката за инфективни болести е пример за успешно и ефикасно управување. Затоа, истото темпо на работа и посветеност ќе се применува и во другите Клиники со единствена цел на нашите граѓани да им обезбедиме најквалитетни здравствени услуги.

Здравството во нашата земја е разбудено од “клиничката смрт“ откако ВЛЕН стана дел од владата и го предводи Министерството за здравство. Но, сепак треба да продолжи да се подложува на тежок третман за целосно да се регулира овој систем.

Почетокот на спроведувањето на долгоочекуваните реформи донесе надеж. Напорот за подобрување влијаеше на пациентите, лекарите и целиот медицински персонал, како и администраторите. Здравството во текот на изминатите години ја изгуби не само својата репутација и доверба, туку и квалитетот на услугите кои се најпогодни за пациентите.

Здравството, како најважна алка во функционирањето на една држава кај нас, долго време беше осакатено. Бидејќи воопшто немаше инвестиција, се создаде систем кој лошо функционираше, каде здравството беше оставено во мизерија, а политичарите се лекуваа во странство. Оваа практика ќе заврши со новата влада, Владата на ВЛЕН, бидејќи ние сме посветени на подобрување на целиот здравствен систем.

Јавните здравствени установи ќе добијат поголем буџет од 100 милиони евра. Тоа значи дека годинава буџетот за јавните здравствени установи ќе биде околу 540 милиони евра. Но, тоа не е се. Потсетуваме дека по долги години позитивната листа на лекови е подобрена со 9 нови лекови. И, за прв пат во историјата на Северна Македонија, ќе бидат ангажирани 1.200 нови специјалисти со решенија со кои ќе се надополни медицинскиот персонал за граѓаните да добијат најквалитетни здравствени услуги“, стои во соопштениео од ВЛЕН.