Македонија
Јанушев: Настаните вo ИВЗ се директно мешање на државата во верските заедници

Последните случувања во ИВЗ ги квалификуваме како скандалозни и недозволиво и најостро ги осудуваме. Она што го видовме е директно мешање на државата во верските заедници што за Република Македонија како секуларна држава е тотално неприфатливо, изјави генералниот секретар на ВМРО-ДПМНЕ, Игор Јанушев.
„Да се потсетиме само во минатото дека потпретседателот на Заев, потпретседателот на СДСМ, даваше квалификации за челникот, односно поглаварот на ИЗВ, каде што го нарекуваше резил, зло, заштитена мечка и слично. Ваквото мешање најостро го осудувам уште еднаш и очекуваме надлежните институции, кои всушност дојдоа по нарачка и го остварија она што го гледавме вчера, дека ќе се повлечат и дека ќе ги преземат сите мерки за расчистување на овој случај“, рече тој.
На новинарско прашање дали ВМРО-ДПМНЕ се согласува со ставот на Сулејман Реџепи, кој продолжува да ја извршува функцијата претседател на ИВЗ, дека овие настани се случуваат поради лошиот резултат на изборите од страна на власта, Јанушев рече дека сè што се случува во последниот период е резултат на очајот на СДСМ.
„Ние неколкупати потенциравме во минатото дека сè ова што се случува во овој период, особено во последниот период од неколку месеци пред изборите, е очајот на СДСМ и власта во пресрет, а сега веќе и во текот на изборите. Соочени со катастрофално нискиот рејтинг, тие се обидуваат буквално со сите полуги на власта на секој можен начин, на секој еден поединец да влијаат. Притисоците продолжуваат иако апелиравме тоа да не го прават, секојдневно имаме притисоци, закани, на секој можен начин сакаат да се обидат да ги прикријат срамот и негативниот резултат и падот, како што всушност реков на овој прес, на повеќе од 300.000 гласови за неполни две години“, рече Јанушев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Фото) Сиљановска-Давкова: Мора да го искорениме плевелот на корупцијата и криминалот, време е за нова пролет на нашата македонска република

Претседателката Гордана Сиљановска-Давкова, денеска се обрати на чествувањето на 2 Август – Илинден, Денот на Републиката на Мечкин Камен во Крушево.
Во својот говор, Сиљановска-Давкова рече дека е „време за нова пролет на нашата македонска република, за навраќање на републиканските корени“.
„Што значи тоа? Македонските граѓани од својата република очекуваат барем две нешта ̶ слобода и правда. Кога зборувам за слобода, не мислам само на политичката, туку и на економската, на академската, на културната, на социјалната… Кога зборувам за правда, не мислам само на правосудството, туку и на социјалната, еколошката и на генерациската правда. Не смееме да изумиме дека предуслови за слободата и за правдата се владеењето на правото и еднаквоста пред законот“, истакна претседателката.
Таа додаде дека „мора да го искорениме плевелот на корупцијата и на криминалот“.
„Никој не смее да биде недопирлив, независно дали е поранешен или актуелен политичар или функционер, судија или влијателен бизнисмен. За правдата да биде неселективна и навремена, потребни се забрзани и длабоки реформи во правосудството, а тие почнуваат со европска правна рамка, но и со европски критериуми на регрутирање, како и со европски стандарди на функционирање и одговорност“, вели Сиљановска-Давкова.
Според неа, потребен ни е здравствен систем по мерка на здравјето на пациентите и на нацијата. За креативните умови, потребни се инвестиции во образованието и науката, во истражувањето, во развојот и дигитализацијата.
Претседателката се осврна и на пожарите.
„Деновиве, републиката ни е во пламен. За помалку шумски пожари, потребен е не само правен, туку и ефикасен институционален систем, вистински луѓе на важни позиции, вградена превентивна и волонтерска димензија, стимулативни мерки за пожарникарите, пожарникарството и за волонтерите. И овие активности се во ек. За да се заштити здравјето на луѓето и на природата, мора да ставиме крај на дивите депонии и на нивното палење, но и да имаме контрола врз палењето“, вели претседателката.
Сиљановска-Давкова истакна дека имаме потреба од длабоки и суштински реформи во секоја област по европска мерка: со заштитени слободи и права, со владеење на правото и бескомпромисна борба со корупцијата; со стратегиски партнерства со државите со заеднички вредности и интереси; со независни и функционални институции; со компетитивна економија и со капитални инвестиции; со партиципативна политичка култура.
„Ние не сме стебло без корен. Нашата слобода и нашата република се вкоренети во европската пролет на народите, во демократските и хумани визии на „Млада Европа“. И затоа, на оној што ќе ни рече „вие сте млад народ со млада држава“, ќе му одговориме дека сме чеда на Гоцевата визија за „Млада Европа“ обединета Европа, и за светот како поле за културен натпревар на народите!
Колку и да ни е тешко, не треба да се обесхрабруваме од пречките и препреките. Сме опстоиле и сме надминале и потешки проблеми. Не сме сами. Имаме пријатели – демократи кои го почитуваат нашето право на национален и културен идентитет, на граѓански дигнитет и интегритет зашто и самите го сакаат и уживаат. Верувам во нивната поддршка и помош. Тие не се плашат да укажат и да се спротивстават на двојните стандарди и на анахроните обиди за ревизија на историјата.
Ние не се откажуваме од природниот пат кон членството во ЕУ, оти отсекогаш сме дел на Европа: географски, историски и културно, зошто да не и политички. Едноставно, ние балканските народи и нации сме биле, сме и ќе останеме Европејци.
Цврсто сме решени како што беше европски зацртано да стигнеме до целта до 2030 година, европеизирани по словото на Копенхагенските критериуми!“, рече претседателката Сиљановска-Давкова.
Македонија
Филков од Пелинце: АСНОМ нека ни биде потсетник – патот на правдата бара храброст, истрајност и одговорност

Министерот за правда, Игор Филков, беше дел од владината делегација која оддаде почит по повод 81 година од Првото заседание на АСНОМ, во Меморијалниот центар АСНОМ во Пелинце.
„Денес сме овде, во Меморијалниот центар АСНОМ во Пелинце, за да оддадеме почит на државничката визија и храброста на генерациите кои пред 81 година го поставија темелот на нашата државност.
Првото заседание на АСНОМ не е само историски момент, туку жив доказ дека борбата за правда, слобода и достоинство е темел на нашето постоење како народ и држава.
Како министер за правда, должност ми е да го чувам тој завет – да се грижам за правна држава, за независни институции и за заштита на човековите права.
Нека ни биде потсетник – патот на правдата бара храброст, истрајност и одговорност. АСНОМ ни остави обврска, а ние имаме должност таа обврска да ја преточиме во дела“, истакна министерот Филков.
Македонија
(Фото) Ѓорѓиевски: Денес, ние имаме света должност – да ја чуваме, браниме и унапредуваме оваа исконска земја

Градоначалникот на Општина Кисела Вода и кандиндат за градоначалник на Град Скопје од ВМРО-ДПМНЕ, Орце Ѓорѓиевски, упати честитка по повод Илинден.
„Вечен нека биде Илинден, вечна е Македонија!
На Илинден, нашите предци ја започнаа својата борба за создавање на македонската држава, борба што ја продолжија многу знајни и незнајни јунаци кои ги положија своите животи на олтарот на слободата, за Македонија да биде дом за својот народ.
На 2 август 1903 година, нашите дедовци му покажаа на светот дека огнот на слободата што гори во срцето на Македонецот е нескротлив.
Тој пламен продолжи да гори и преку Илинденците од 1944, за да се роди современата македонска држава.
А денес, ние имаме света должност – да ја чуваме, браниме и унапредуваме оваа исконска земја.
Ние, нашата генерација.
Јас верувам во нашата генерација!
Македонија ќе живее, затоа што има горди синови и ќерки кои безрезервно ја љубат.
Честит и вечен нека е Илинден!“, стои во објавата на Ѓорѓиевски.