Заменик-претседателот на Владата на Северна Македонија, задолжен за политики за добро владеење, Арбен Фетаи, оствари протоколарна средба со новоименуваниот амбасадор на Италија во Скопје, Паоло Палминтери.

За време на средбата, заменик-претседателот на Владата, Фетаи, му честиташе на амбасадорот Палминтери за новата функција и му посака успех во неговата дипломатска мисија. Тој ги оцени билатералните односи како одлични и изрази благодарност за постојаната поддршка на Италија за интеграцијата на Западен Балкан во Европската Унија.

Исто така, Фетаи му се заблагодари на италијанскиот амбасадор за драгоцената помош во лекувањето на повредените пациенти во трагедијата во Кочани.

Двајцата соговорници се согласија да го продлабочат меѓусебното партнерство, со посебен фокус на борбата против корупцијата, финансиските истраги и конфискацијата на нелегално стекнат имот.

Извршени се 116 вонредни надзори врз основа на Законот за угостителска дејност, пришто во делот на прекршочна санкција, решенија за привремена забрана им се изречени на 10 фирми – кафулиња и клубови, истакна портпаролката на Владата, Марија Митева.

Утврдено е дека 15 угостителски објекти од вкупно 23 коишто имаат активна лиценца не ги исполнуваат минимално технички услови. Кај нив ќе бидат изречени две мерки, прво решение за забрана за вршење на дејност, и второ предлог до Министерството за економија за одземање на лиценцата.

Кај шест правни субјекти кои немаат активна лиценца или им е истечена, а утврдено е дека во изминатиот период работеле, издадени се решенија за забрана за вршење на дејност.

Во однос на идните чекори, во координација со МВР, Државниот пазарен инспекторат почнува со инспекциски надзори во објектите за организирање на прослави и настани со посебен акцент на утврдување на минимално техничките услови.

„За жал бројките зборуваат сами за себе, но ја потврдуваат потребата од решително и одговорно дејствување. Посветени сме на транспарентност и секоја неправилност да се санкционира. Наша цел е да создадеме систем кој ќе им служи на граѓаните“, рече Митева.

Инспекциите се случуваат по пожарот во дискотеката во Кочани во којшто загинаа 59 лица, а која имала фалсификувана лиценца.

Вонредните инспекциски контроли, кои почнаа мината недела по пожарот во кочанската дискотека со 59 загинати, ќе продолжат со проверка на безбедноста во сите станбени згради во земјата. Ќе ги прават општинските инспектори заедно со инспекторите од сите државни институции надлежни за безбедност. Претседателот на Заедницата на локалните самоуправи (ЗЕЛС) и градоначалник на Кисела Вода вели дека во неговата општина ваквите проверки се веќе почнати.

„Во мојата општина 27 станбени згради биле подложени на проверки изминатите неколку дена. Од тие 27, најчесто оние што се најгласни и кои ги утврдуваат аномалиите на системот, е утврдено дека баш во тие згради нема хидранти. Имаме случаи каде што цревата за хидрантите се продаваат, биле украдени. Секој треба да си одговара. Ова не е операција во која главниот збор го има локалната или централната власт, или Орце индивидуално или кој и да е. Во ова треба, луѓе, да учествуваме сите. Ова зависи и од одговорноста на секој поединец во нашето општество. Не требаше да дозволиме да се случи пожарот во Кочани за да утврдиме дека во зградата во која живеат 400 станари триесет години нема хидрант“, вели Ѓорѓиевски и нагласува дека тоа не е одговорност и надлежност на Општината, но мора да постапуваат оти утврдиле дека ниту станарите ниту управителите на зградите не си ја завршиле обврската.

Ѓорѓевски јавно побара Инспекторатот за домување посоодветно да си ја врши работата и рече дека како ЗЕЛС дале препораки општинските инспектори да стапат во контакт со управителите на сите станбени згради, кои треба да постапат по забелешките што ќе бидат утврдени при инспекциските надзори, во кои главен збор ќе има Дирекцијата за заштита и спасување, која постапува во делот на постоење соодветна хидрантска мрежа, противпожарни апарати и сѐ она што претставува безбедност во зградите.

Ѓорѓиевски смета дека на угостителите треба да им се даде рок од еден месец за отстранување на спорните делови и на забелешките од инспекторите направени изминатиов период оти контролите покажале дека најголем проблем, генерално, во целата држава е урбаната опрема за кафулињата, каде што се констатирани најмногу неправилности.