Македонија
Јован и Лилјана се годинешните младенци, кои ќе прават Галичка свадба

Од 11 до 13 јули живописниот Галичник повторно ќе заживее со звукот на зурлите, тапаните и традицијата – ќе се одржи Галичката свадба, една од најавтентичните и најпрепознатливи културни манифестации во земјата.
Овој уникатен настан, кој претставува живо сведоштво за македонската традиција, култура и обичаи, повторно ќе го привлече вниманието на домашните и на странските посетители, кои сакаат да ја доживеат автентичната свадбарска приказна од мијачкиот крај.
И оваа година, Пивара Скопје, заедно со СКОПСКО, е главен спонзор на „Галичка свадба“, продолжувајќи го партнерството кое датира од самите почетоци на манифестацијата и трае повеќе од половина век.
Годинешните младоженци, Јован Филипоски – потомок на старото галичко семејство Филипоски, и Лилјана Михајлоска, велат дека учеството во манифестацијата за нив претставува исполнување на животниот сон.
„Уште како дете сонував еден ден да бидам дел од Галичка свадба. Тоа се многу повеќе од свадбарски обичаи – тоа е љубов, идентитет и исконска гордост“, вели Јован.
„Чувството кога облекуваш автентична носија и чекориш на истите патеки по кои чекореле генерации пред тебе е неописливо. За нас, ова е завет и голема чест“, додава Лилјана.
Во текот на тридневната програма гостите ќе бидат сведоци на целосната свадбена церемонија, исполнета со традиционални обичаи, носии, песни и ора, кои Галичката свадба ја прават единствена на Балканот и пошироко.
Организатор на манифестацијата е месната заедница „Галичник“. Честитајќи им на годинешните галички младоженци, нејзиниот претседател Огнен Караѓозовски изјави: „Продолжуваме со посветеност да ја чуваме жива оваа ретка традиција. Радува фактот што секоја година се зголемува интересот кај младите генерации да бидат дел од Галичката свадба. Tоа за нас претставува најсилен доказ дека обичаите и културното наследство се темел на нашиот идентитет, сегашност и иднина. Благодарни сме им на институциите и на големиот број компании, чија поддршка има пресудно значење за организирањето и одржувањето на атрактивноста на манифестацијата“.
Поддршката и партнерството на „Пивара Скопје“ со манифестацијата трае непрекинато од нејзините почетоци.
„Чест ни е што и оваа година сме дел од Галичката свадба – симбол на љубовта, заедништвото, автентичната традиција и културата. Повеќе од половина век ја делиме оваа приказна со генерации младоженци, нивните семејства и големиот број посетители на овој настан, со кои нè врзуваат исти вредности: почитување на културното наследство, меѓусебна поддршка и создавање искуства што зближуваат. На Јован и Лилјана им посакуваме многу здравје, среќа и бериќет – нека нивната љубов биде долготрајна како и нашето партнерство со Галичка свадба“, изјави Марија Мининчиќ, менаџерка за партнерства со заедницата во „Пивара Скопје“.
И оваа година покровител на манифестацијата е Претседателката Гордана Сиљановска-Давкова, а поддршка пристигна и од Министерството за култура и туризам, со што се потврдува значењето на Галичка свадба како национално културно богатство, кое заслужува институционална поддршка и меѓународна афирмација.
За време на одржување на манифестацијата организаторот најавува посебен сообраќаен режим во селото, а беше повторен и апелот за одговорно однесување, особено во поглед на пиењето алкохол и грижата за природата.
Програмата на Галичка свадба 2025 – традиција преточена во спектакл
Годинешната Галичка свадба ќе се одвива во три дена, исполнети со богата програма, која ја оживува вековната традиција на мијачкиот крај. Тридневната манифестација ќе почне в петок, 11 јули, со премиерна изведба на монодрама во чест на 150 години од издавањето на Тријазичникот на Ѓорѓија Пулески, што ќе биде изведена на мијачки дијалект. Потоа ќе следува забава со диџеј-сет за помладите посетители.
В сабота, на 12 јули, почнуваат свадбарските обичаи, со пречек на тапаните, китење и поставување на свадбениот бајрак, симболичното фрлање пушка од куќата на зетот и изведбата на свекрвиното оро. Особено впечатлив момент ќе биде изведбата на ората што ги симболизираат печалбарството и непокорот на луѓето од овој крај – „Невестинското“ и „Тешкото“ – од страна на националниот фолклорен ансамбл „Танец“, на платото пред прочуената чешма Упија. Во вечерните часови невестата придружувана од свадбарите, со борини и факли в рака, ќе оди да полни вода од прочуените три чешми во селото: Секуличе, Динговиче и Упија – обичај поврзан со семејната среќа.
В недела, 13 јули, денот ќе почне со традиционалните обичаи – канење на мртвите, канење на кумот, бричење на зетот и тргнување по невестата, во чии рамки е и прочуениот обичај гледање низ прстен. Потоа следуваат испраќањето на невестата и дарувањето, како и венчавањето во храмот „Св. апостоли Петар и Павле“. Настанот ќе заврши со свеченото испраќање на тапанџиите и зурлаџиите, кое го означува симболично затворање на свадбената церемонија.
Целата програма, која ги вклучува сите традиционални свадбарски обичаи, ќе биде емитувана преку видеоекран поставен на централното плато во селото, а ќе биде емитувана во живо и на социјалните мрежи, со што манифестацијата се доближува и до оние што немаат можност да бидат физички присутни на настанот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Пронајдени двете девојки од Португалија кои се изгубија во реонот на Водно – Матка

Денес околу 17.00 часот од страна на Центарот за управување со кризи бевме известени за две изгубени туристки во реонот од врвот на Водно кон Матка, извести директорот на ДЗС, Стојанче Ангелов.
Како што информираше Ангелов, Дирекцијата за заштита и спасување итно извршила мобилизација на тимот за спасување на планина од Тетово и истиот веднаш бил упатен во пребарување на теренот.
Во 18.40 двете девојки од Португалија беа пронајдени и однесени до ресторанот Матка каде ги пречека Конзулот на Република Португалија, додава Ангелов.
Македонија
Дел од Ѓорче Петров утре без струја

Од ЕВН Македонија АД известуваат дека утре без електрична енергија ќе останат:
– во периодот од 09.00 до 15.00 часот, корисниците од улиците Веле Марков, Ибе Паликуќа, Воин Драшковиќ, Рафаел Батино. (општина Ѓорче Петров)
Македонија
Меџити прими жители од Страчинце: Анализите на експертите јасно покажаа дека отворањето на каменоломот ќе има сериозни последици врз животната средина

Првиот заменик-претседател на Владата и министер за животна средина и просторно планирање, Изет Меџити, денес ги прими во својот кабинет жителите од селото Страчинце, со кои одржа отворен состанок за одлуката за одбивање на барањето за отворање на каменолом во оваа скопско село.
Министерот Меџити ги информираше жителите за професионалните и институционалните причини што доведоа до оваа одлука. Анализите на експертите јасно покажаа дека отворањето на каменоломот ќе има сериозни последици врз животната средина, ризик од поплави и негативно влијание врз јавното здравје, велат од Министерството.
На состанокот беше истакнато дека приоритет е заштитата на животот и благосостојбата на граѓаните над секој економски интерес.
Меџити истакна дека следниот чекор е конечно поништување на концесијата во Влада, со што ова прашање ќе добие трајно решение.
Жителите на Страчинце се заблагодарија за одлуката и за приемот што го оствари министерот Меџити, нагласувајќи дека овој состанок е пример за владеење со отворен дијалог и чесна соработка со граѓаните.