Македонија
Јотова: Очекуваме влез на Бугарите во Уставoт како државотворен народ и спроведување на договорите

Се надевам дека новата бугарска влада ќе ја брани единствената бугарска позиција за Република Северна Македонија. Претходниот редовен кабинет и премиерот Кирил Петков беа на работ да ја предадат бугарската позиција. Се надевам дека премиерот академик Денков е разумен политичар. Ова го изјави потпретседателката на Бугарија, Илијана Јотова во интервју за ТВ „Бугарија он ер“.
„Претседателот Румен Радев испрати писмо до нашите европски партнери за повторно да ги потсети дека спорот со Скопје не е само за историјата, туку за европските политики, за сето она што не зближува во Европската Унија. Писмото на претседателот беше точно на време за уште еднаш да им даде сигнал на европските институции и лидери за суштината на нашите проблеми со РСМ – правата на Бугарите. Така се штити бугарскиот национален интерес“, нагласи Илијана Јотова.
Таа потсети дека шефот на државата прв го покренал прашањето за правата на Бугарите во Северна Македонија.
„Правата на Бугарите не се запишани во ниту еден документ донесен со години“, посочи потпретседателката во интервјуто.
„Сè уште ги жнееме горчливите плодови од фактот дека Бугарија со години не ја објаснуваше и бранеше својата позиција за Северна Македонија. Го знаеме трнливиот пат за влез во ЕУ, не можеме да дозволиме двојни стандарди“, рече Илијана Јотова.
„Очекуваме РСМ во својот Устав да ги вклучи Бугарите како државотворен народ како што беше напишано во т.н. француски предлог околу кој се обединија нашите европски партнери. Очекуваме Скопје да ги почитува сите заеднички преземени обврски. Бугарија внимателно ќе го следи овој процес – не само формалната регистрација на Бугарите, туку и реалното спроведување на договорите“, посочи потпретседателката.
Јотова како преседан ги дефинираше обидите, како што рече, за лобирање на Македонија кај европратениците за усвојување и отстранување на одредени текстови поврзани со говорот на омраза во подготвената резолуција на Европскиот парламент.
„И Бугарија мора многу остро да реагира на тоа што европските лидери, можеби под влијание на ова лобирање на политичарите од РСМ, велат дека Бугарија има нови барања. Не, немаме. Инсистираме на имплементација на се што е забележано и прифатено од нашите европски партнери“, нагласи потпретседателката.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Почнуваме со проектот за третата фаза од пругата кон Бугарија

„Тоа ќе биде од големо значење за нас како држава, за Македонија како целина, бидејќи на тој начин ќе ја потврдиме онаа наша цел, а тоа е да бидеме крстосница на два многу значајни паневропски коридори, коридорот 10 и коридорот 8“, вели Христијан Мицкоски претседател на Владата на Република Северна Македонија одговарајќи на новинарско прашање до каде се процесните подготовки за третата фаза од изградбата на железничката пруга.
„Третата фаза е во процес на развивање, би рекол. Битно е дека сите оние пречки коишто во минатото се случуваа, се надминати. Постигната е согласност со нашиот источен сосед. Нашиот дел, би рекол, со одлуката на Влада да се активира грантот, што значи техничка поддршка од страна на Европската инвестициона банка, подразбира дека и ние отпочнуваме со овој проект. Техничката поддршка значи ревизија на основниот проект, ревизија на целосната документација и потоа објавување на јавен повик за изградба и на третата фаза, со што практично ние ќе ја заокружиме целата делница, којашто е дел од коридорот 8, од Куманово до граница со Бугарија“, изјави премиерот Мицкоски.
„Од другата страна, исто така, процесот добро напредува, така што, со ова коридорот 8 ќе биде целосно исполнет.
Коридорот 10 знаете е дел од проектот којшто го имаме со Владата на Обединетото Кралство, и тука сме во напредна фаза. Така што убави вести, убави моменти ќе има за Македонија и граѓаните во периодот којшто следи“, нагласи Мицкоски.
Македонија
И без документи, оние што се сомневаат дека биле непотребно оперирани нека поднесат претставка, повика Клековски

Сите што се сомневаат дека биле непотребно оперирани по скандалот дека се правеле операции на срце само за да се извлечат пари, треба да пријават. Директорот на Фондот за здравствено осигурување, Сашо Клековски, вели дека и по објавата на скандалот, кај нив нема претставки за непотребни операции.
„До средата немаше ниедна пријава или претставка за евентуална непотребна операција. Ги повикуваме сите пациенти што се сомневаат, без разлика дали имаат документи или не, да поднесат претставки. Документите за операциите се чуваат во архивите на болниците“, повика директорот Клековски.
Скандалот со наводно непотребни кардиохируршки интервенции во приватни болници во Скопје го обелодени кардиологот Сашко Кедев, кој јавно обвини дека кај пациенти без медицинска потреба се вршеле операции на срце, исклучиво поради финансиски интерес.
Сомневањата ги насочи кон приватните клиники „Жан Митрев“ и „Аџибадем Систина“, кои ги отфрлија тврдењата и рекоа дека работат според утврдени медицински протоколи и дека секоја интервенција е документирана и оправдана. Клиниките посочија дека се отворени за соработка со надзорните тела и ги поддржуваат сите иницијативи за транспарентност и контрола.
По наводите за непотребни операции, Министерството за здравство формира две комисии за расчистување на случајот. Едната е интерна, составена од лекари, претставници од Фондот, правници и економисти, која има задача да ги анализира сите кардиолошки и кардиохируршки операции во земјата во периодот од јануари 2023 година со август 2025 година. Втората комисија е меѓународна, составена од тројца лекари, кои ќе извршат надзор и во приватните и во јавните здравствени установи.
Македонија
Николоски: Почнуваме со реконструкција на обиколницата кај Крива Паланка, активно се работи и на граничниот премин

Имаме рекордни инвестиции во инфраструктурата во Крива Паланка и регионот. Само преку Владата, преку двата јавни повици инвестираме преку 200 милиони денари за проекти, а денеска започнуваме и со рехабилитација на обиколница Крива Паланка, истакна при денешната посета, вицепремиерот и министер за транспорт, Александар Николоски.
Николоски, заедно со премиерот Христијан Мицкоски и директорот на ЈП за државни патишта Коце Трајановски, извршија увид во рехабилитацијата на овој патен правец како дел од Коридор 8.
Проектот се реализира преку ЈП за државни патишта, а инвестицијата е преку 65,5 милиони денари. Во продолжение интегралната изјава на вицепремиерoт Николоски:
„Денеска започнувме со рехабилитација на обиколница Крива Паланка. Тоа е логичен сплет на големиот проект кој што беше пуштен во јануари оваа година, а тоа е експресниот пат од Страцин до Крива Паланка, експресен пат кој што веќе го менува животот за овој дел од Македонија. Веќе со едно пријатно возење се стигнува од Скопје до Крива Паланка. Со рехабилитацијата на обиколницата, оние кои што патуваат кон Софија, Бугарија исто така побрзо и побезбедно ќе може да патуваат. Во таа насока би сакал да спомнам дека активно се работи на реконструкција и на Граничниот премин, активност која што ја започнавме минатата година и активност која има добра динамика и која очекувам да биде завршена набрзо и да има поголем проток на границата.
Преку Владата преку два повици еден оваа година, еден минатата година, Владата инвестира вкупно 200 милиони денари во проекти во општина Крива Паланка, што е еден историски рекорд и нешто што никогаш не е направено за овој крај и оваа општина. Секако тука се и другите општини, Ранковце и Куманово и сите кои гравитираат кон овој регион. Ќе продолжиме да работиме во периoдот кој е пред нас и да имаме други успеси”, изјави вНиколоски.