Бугарскиот претседател Румен Радев им ги врачи бугарските лични документи на Љубчо Георгиевски и на Благој Шаторов – претседателот и секретарот на затворениот бугарски клуб од Битола „Иван Михајлов“.

„За мене е привилегија да доделам бугарски лични документи на двајца наши сонародници, чија патриотска активност и храброст ја потсети цела Бугарија дека железниот светилник на бугарскиот патриотизам никогаш не бил згаснат во соседна Република Северна Македонија, дека илјдагодишната бугарска култура и историското наследство во Македонија се неизбришливи и ќе продолжат да ги будат умовите и срцата на Бугарите“, рече Радев.

Претседателот, како што пишуваат бугарските медиуми, им вети дека државата ќе ги заштити нивните животи, достоинство и правда.

Шефот на бугарската држава повторно кажа дека вклучувањето на Бугарите во Уставот на Македонија рамноправно со другите народи е практично гаранција за нивната рамноправност и неопходно барање на ЕУ за почеток на преговорите за членство и им заблагодари на европските лидери за прифаќањето и разбирањето на нивниот став.

„Да работиме заедно во името на граѓаните во Бугарија и Северна Македонија, народот од двете страни на границата, со убедувањето дека споделуваме не само заедничка вековна историја, туку и заедничка иднина во обединета Европа“, рече Радев.

Претседателот на затворениот клуб „Иван Михајлов“, Љубчо Георгиевски се заблагодари за документите и кажа дека претседателската институција во Бугарија прва го слушнала нивното барање за помош, како и дека проблемот на Бугарите допрел до европските институции и држави.

„Мислам дека ќе бидеме дојстојни граѓани на Бугарија, како што сме и на Македонија“, рече тој.

Бугарскиот клуб „Иван Михајлов“ пред два месеци беше избришан од Централниот регистар со одлука на Министерството за правда.

Клубот имаше рок да се преименува, во согласност со измените во Законот за здруженија и фондации, поради спорното име. Комисијата за употреба на имиња на личности тогаш образложи дека именувањето на клубот „Иван Михајлов“ претставува провокација за националните чувства на македонскиот народ, со оглед на тоа што се работи за личност блиска со фашистичка идеологија, кој со своето дејствување ја негирал посебноста на македонскиот народ, а истовремено предизвикува нетрпеливост, нетолеранција и омраза во македонското општество.