Македонија
Џафери: Не е точно дека тројца пратеници се држат заклучени во Собранието

Претседателот на Собранието, Талат Џафери, ги демантира информациите изнесени од лидерот на Единствена Македонија, Јанко Бачев, дека претставници од американската амбасада, по налог на американскиот амбасадор, Џес Бејли, држат тројца пратеници заклучени во Собранието.
„Се работи за класична дезинформација со цел да му се нанесе штета на угледот на Собранието и на процесот на ЕУ и НАТО-интеграциите на Република Македонија. Во Собранието на Република Македонија секој пратеник одлучува сам, според своето убедување и нема, ниту ќе има притисоци врз народните избраници и нивното движење е слободно“, се вели во писмената изјава на Џафери.
Во неа се додава дека 75. седница на Собранието се одвива според воспоставениот ред, како и за секоја друга седница.
Седницата за уставните измени, која беше закажана за 13 часот, па одложена, денеска може и воопшто да не се одржи. Неофицијално, се остава простор за уште еден обид за постигнување договор на премиерот Зоран Заев со Беса на Биљаљ Касами кога претпладнево не успеале да најдат решение за прецизна формулација на државјанството, како што бараат од оваа албанска опозициска партија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Во повеќе градови почнува бесплатен скрининг за детектирање на болести на црниот дроб

Министерството за здравство, заедно со Хепар Центар-Битола и клиниките за гастроентерохепатологија и инфективни болести, по повод Светски ден за борба против хепатитисот, почнуваат заедничка национална кампања за бесплатен и анонимен скрининг за хепатитис Б, хепатитис Ц и ХИВ, како и еластографија за хронични црнодробни заболувања.
По тој повод, денеска од 10 до 13:00 часот ќе биде поставена мобилна единица на плоштад „Македонија“ во Скопје од каде почнува бесплатниот и анонимен скрининг за навремено детектирање на болести на црн дроб.
Националната кампања ќе се реализира во 10 градови во државата.
Целта е подигнување на свесноста за црнодробните болести, како што се црнодробен карцином, замастување на црниот дроб од алкохолна и неалкохолна природа, цироза и ретки болести на црн дроб.
СПИСОК НА ГРАДОВИ КАДЕ ЌЕ СЕ ВРШИ БЕСПЛАТЕН СКРИНИНГ
28 јули | Скопје: 10:00–13:00 / Куманово: 18:00–20:30
30 јули | Тетово: 10:00–12:30 / Гостивар: 18:00–20:30
01 август | Струга: 10:00–12:30 / Охрид: 18:00–20:30
04 август | Битола: 10:00–12:30 / Прилеп: 18:00–20:30
06 август | Штип: 10:00–12:30 / Гевгелија: 18:00–20:30
Македонија
Од утре изменет сообраќаен режим на мостот „Влајко“

Општина Карпош ја информира јавноста дека утре, вторник (29.07.2025) година со почеток во 07:30 часот ќе започнат работните активности за статичко испитување на надземниот премин „Влајко“ (во населбата Влае). Поради изведување на стручните мерења, ги известуваме сите граѓани дека ќе биде воведена времена измена на сообраќајниот режим, која ќе се реализира во две фази.
Имено, во првата фаза се предвидува затворање на дел од сообраќајницата, односно булеварот „Партизански одреди“, по принципот лента по лента, во насока исток – запад, поточно во правец кон населбата Ѓорче Петров. По завршување на првата фаза, ќе следи затворање на сообраќајот во насока запад – исток, (кон Центар), исто така по принципот лента по лента.
Во оваа пригода локалната самоуправа посочува дека во текот на изведување на работите, сообраќајот на тој потег ќе се одвива непречено, согласно сообраќајната сигнализација и опремата која ќе биде времено поставената, на која ќе биде означено прописно ограничување на брзината на движење од 30 km/h. Се предвидува овие активности да се одвиваат во период од седум работни дена, а по нивното завршување да биде воспоставен првобитниот режим на сообраќај.
Општина Карпош апелира до сите учесници во сообраќајот да го почитуваат и да се прилагодат кон времениот сообраќаен режим, за што однапред им благодари на разбирањето и соработката.
Македонија
АМСМ: Зголемена фреквенција на возила, но на граничните премини без гужви

Сообраќајот на државните патишта утрово се одвива непречено, по суви коловози, информира АМСМ.
Интензитетот на сообраќај на патните правци надвор од градските средини е умерен. Поради летните одмори се бележи зголемена фреквенција на возила, но на граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.