На неколку фронтови во здравството се работи и се вложува, а треба да се вложува уште многу повеќе од ова коешто сега се прави, бидејќи за жал многу малку е направено во минатото, вели премиерот Христијан Мицкоски.

„Деведесет милиони денари сепак не е малку, не е ни многу, имајќи предвид дека речиси ништо не е правено, со години, со децении, само приказни се кажувани.
Како Влада сериозно се зафативме со овој проблем. Заедно со министерот, во периодот којшто следи ќе имаме еден подолг ресорен состанок на којшто ќе ги определиме чекорите за понатаму. Ќе има сериозни реформи, и структурни, но и квалитативни, и убеден сум дека за неколку години од денеска ќе имаме комплетно нова претстава во здравството. Бидејќи често пати зборувам, ќе го повторам тоа и денеска, дека како Влада одвојуваме за здравството повеќе од една милијарда евра. Нешто што досега никогаш не било ни приближно толку направено. Да речеме само во годината за време на ковидот таа бројка била некаде околу 500-550 милиони евра. Значи сега сме, би рекол, два пати повеќе. И повторно имаме проблеми. И тоа е нешто коешто нас не вознемирува.

Луѓе алармираат, даваат одредени индиции, за одредени појави коишто не се добри, кај одредени лица, но никако да дојдеме до реализација и до доказ. Тоа е она коешто за мене претставува, како прв човек на Владата, сериозен предизвик“.

Убеден сум, нагласи Мицкоски дека во периодот којшто следи надлежните ќе дојдат и до сериозни докази за постоечките индиции коишто луѓето ги кажуваат.

Г„и повикувам да се охрабрат за да можеме заеднички, имаме ние алатки како тоа да го направиме, за да докажеме девијантно однесување. Во спротивно ќе бидеме неуспешни“.

Многу скоро од денеска, најави тој, секој еден граѓанин ќе може да почувствува дека јавното здравство нуди услуги коишто се конкурентни и квалитетни.

Им честиташе на луѓето кои се дел од јавното здравство за тоа што го прават.

„Затоа што прават вонсериски напори, вложуваат вонсериски напори, и вие самите констатиравте дека овде конкретно луѓево се за Гинис.

Затоа мора да направиме една координирана акција, како за оној персонал и за медицинските работници да обезбедиме соодветни услови, но од друга страна оние здравствени мешетари кои што го разрушуваат имиџот да ги пронајдеме и да ги санкционираме.

Затоа не можам секогаш да се сложам со луѓето коишто го напаѓаат јавното здравство затоа што тоа не е вистина. Затоа што во јавното здравство, работат луѓе коишто даваат се од себе. И јас како претседател на Владата, ќе сторам се што можам да помогнам, колку можеме во рамките на нашите можности, да направиме едно јако, силно јавно здравство“.

Иако Македонија е мала држава и по територија и по население, издвојува значителни средства за правосудниот систем. Дури 0,39% од БДП се дава за правосудството. Тоа е повеќе од Франција со 0,20%, Германија издвојува 0,30%, Грција 0,26%, соседна Албанија 0,29%, Молдавија 0,35% и Грузија 0,23%. Во превод, државата вложува најмногу, а добива најмалку, истакна Валентин Манасиевски, член на ЦК на ВМРО-ДПМНЕ.

„Наместо независно и ефикасно судство, граѓаните гледаат бавни постапки, нерешени предмети, одложувања без основ, политички влијанија и недоверба. Судниците се претвораат во места каде што правдата се чека, но речиси никогаш не се добива.

Судството треба да биде стожер на правдата, а не алатка во рацете на поединци и политички групи. Граѓаните плаќаат, а за возврат добиваат нефункционален систем кој не ја штити вистината, туку ја одложува. А понекогаш, таа воопшто не ни стигнува“.

И токму затоа, додава тој, иако Македонија процентуално издвојува најмногу средства од БДП за правосудството во регионот и Европа, судиите кои земаат и до три просечни плати, а некои и повеќе, сепак бараат уште. А резултати нема. Нема ниту правда, ниту квалитет, ниту реформи. Плаќаме најмногу, а добиваме најмалку.

Клучното прашање, како што вели. е дали овие луѓе заслужуваат повисоки плати. „Реформи мора да има“.

На денешната собраниска комисија, пратениците од владејачкото мнозинство го отфрлија амандманот по предлог-Буџетот за 2026 година, со кој се предвидува зајакнување на противпожарната заштита, соопштија од Левицата.

Пратеникот од Левица, Реџеп Исмаил Хактан, во своето излагање истакна дека во овој предлог-Буџет се предвидени само 16 милиони евра за противпожарна заштита, иако опремата со која располага Македонија не само што е застарена, туку дел од противпожарните возила имаат повеќе од 40 години старост.

Со амандманот на Левица, додаваат од партијата, се предвидуваше зголемување на средствата во оваа ставка за 3.2 милиони евра, имајќи го во предвид и фактот дека и бројот на вработени пожарникари е драстично под потребниот законски минимум.
„Пратеникот од Левица потенцира дека додека власта одвојува 100 милиони евра за НАТО, Македонија секоја година има огромни загуби поради слабости во справувањето со пожарите – нема центар за обука за пожарникари, нема соодветна противпожарна опрема, нема системи за детекција.

Со дрското одбивање на овој амандман од страна на власта на Мицкоски, очекувано е дека и наредната година државата нема да има капацитет да се справи со пожарите и повторно последиците ќе се милионски штети по шумскиот фонд. Сето ова е резултат на погрешните приоритети на власта кои се отсликуваат и во овој предлог буџет, каде повторно се издвојуваат недоволни средства за зајакнување на капацитетите за противпожарна заштита, која единствено функционира со донации за опрема и возила“, се наведува во информацијата од оваа партија.