Министерот за надворешни работи и надворешна трговија, Тимчо Муцунски, вчера во Виена учествуваше на состанокот на неформалната група „Пријатели на Западен Балкан“, одржан на покана на австриската министерка за европска и меѓународна политика, Беате Мајнл-Рајзингер.

На состанокот учествуваа министрите за надворешни работи на земјите членки на ЕУ кои се дел од групата „Пријатели на Западен Балкан“ – Австрија, Чешка, Грција, Италија, Словачка, Словенија и Хрватска – министрите за надворешни работи на земјите од регионот, како и високата претставничка на Европската унија за надворешни работи и безбедносна политика, Каја Калас.

Состанокот беше поделен во две тематски целини: работна сесија посветена на „Приоритетите во интеграцијата на Западен Балкан во ЕУ“ и работна вечера на тема „Енергетика, безбедност и интеграција во ЕУ“.

Во своето обраќање, министерот Муцунски ја истакна силната заложба на Северна Македонија за забрзување на пристапниот процес и продлабочување на политичкиот дијалог и практичната соработка со Европската унија во рамките на фазната интеграција. Тој нагласи дека процесот веќе носи конкретни резултати за граѓаните и економиите, преку спроведувањето на Планот за раст, забрзувањето на трговијата со „Зелените ленти“, приклучувањето кон SEPA и други иницијативи.

Министерот уште еднаш ја подвлече неопходноста од обезбедување предвидлива и кредибилна европска перспектива за Северна Македонија и регионот, истакнувајќи ја цврстата посветеност на државата кон Европскиот пат преку спроведување на реформите, високата усогласеност со заедничката надворешна и безбедносна политика на ЕУ, континуираниот придонес кон европската безбедност и поддршката за Украина. Тој оцени дека овие резултати ја потврдуваат зрелоста на земјата како доверлив и предвидлив партнер на Унијата. Воедно укажа дека политичките блокади кои не се засноваат на европските критериуми го поткопуваат кредибилитетот на проширувањето и се спротивни на основите на европскиот проект.

Муцунски истакна дека е неопходно суштинско забрзување на процесот преку подобра синхронизација на пристапните преговори со фазната интеграција, поинтензивно вклучување на кандидатите во секторски политики на Унијата и намалување на административните бариери. Тој оцени дека комуникацијата со европската јавност мора значително да се подобри, особено во делот на информирањето за придобивките од проширувањето и неговата важност како инвестиција во заедничката безбедност, економскиот раст и долгорочната стабилност.

Во делот на енергетските теми, министерот ја нагласи важноста од заеднички пристап кон енергетската безбедност, диверзификација на изворите, пристап до обновливи енергии и подлабока интеграција на земјите од регионот во европскиот енергетски пазар, посочувајќи дека ова е клучно за економската конкурентност и стратешката отпорност на континентот.

Триото Заев, Филипче и Николовски во ек на криза функционирало како врзан систем на крвни садови, креирале коруптивна шема и директно ја загрозиле националната безбедност со игрите со стоковите резерви, со отписот па со купувањето на прескапа пченица, велат од ВМРО-ДПМНЕ.

„Заев, Филипче и Николовски директно ја загрозиле националната безбедност во услови на криза а намалувањето на стоковните резерви претставува директно загрозување на националната безбедност и не смее никој да се дрзне да отпишува 2.000 тони пченица во криза.

Во секој потег на Заев, Филипче и Николовски од нивната шема се отвара сомнеж за сериозни злоупотреби, корупција и огромен профит. Од отписот на жито, прескапата набавка до доделениот грант.

Отпишале 2.000 тони пченица, отвориле 2 тендери за 20.000 тони жито што го платиле 1,3 милиони, по поскапа цена и како гратис услуга Николовски издејствувал 1,4 милиони грант за „Мамас“ на кланот Заеви“.

Николовски во 2022 година, појаснуваат од владејачката партија, направил набавка на 20.000 тони жито, по отписот на кусокот што го потпишале Заев и Филипче но набавките за житото биле поскапи за цели 1,3 милиони евра.

Според ВМРО-ДПМНЕ, 20.000 тони пченица државата ја чинело 532 милиони денари или 8,6 милиони евра, односно еден тон жито бил 26,625 денари, а килограм 26,6 денари.

„Но, пченицата била набавена од Србија, цената на берзата во Нови Сад била 20,5 денари, дополнително трошоци за транспорт од 1,5 до 2 денари по килограм се доаѓа до цена од 22,5 денари, што е за цели 4 денари помалку од оние кои државата ги платила поради Љупчо Николовски, Заев и Филипче, или 1,3 милиони евра повеќе пари биле потрошени на граѓаните.

Николовски да каже зошто државата платила 1,3 милиони евра поскапа сума за житото во стоковите резерви? Кој се ќарил од набавката на жито и колкав процент? Дали грантот за Тргопродукт од 1,4 милиони евра е подарок и контра услуга на Заев“.

ВМРО-ДПМНЕ бара ЈО и ДКСК да отворат постапки и сериозно да го истражат случајот.

„Симптоматично е што Мицкоски, во народот познат како „мали Вучко“, вчера зборуваше повторно за избори. Во исто време објавува и лажни анкети за рејтингот на партиите. Само неколку часа претходно, во Србија, Вучиќ најавува избори. Што се случува тука? Познато е дека Мицко го имитира Вучиќ, а тоа трае веќе подолго време“, велат од СДСМ.

„’Вчера’ започна реконструкцијата на Владата, на јавноста одамна позната како обично шминкање. Модел кој Вучиќ го користи со години. По реконструкцијата, со некакви чудни дополнителни објаснувања, следат најави за избори и нивно распишување. Овој српски, „Вучиќ модел“ денес го гледаме во Македонија.

На пролет Унгарија ја очекуваат избори. Вертикалата поврзана преку политичките партии, ФИДЕС на Орбан, СНС на Вучиќ и ДПМНЕ на Груевски, со години функционира на иста линија, оттука е и азилот за Груевски. На оваа вертикала ѝ се придружува и една хоризонтална линија, Словачка и нејзиниот премиер Фицо.

Сите сме сведоци на големите протести во Унгарија, Словачка, а особено во Србија против политиките што се водат. Што е тоа што ги поврзува овие протести и што доведе до нив? Токму КОРУПЦИЈАТА!

Нашите најблиски соседи, граѓаните на Србија, веќе цела година протестираат поради корупцијата која доведе до падот на настрешницата, во која загинаа 16 луѓе. Српското независно обвинителство смета дека само при реновирањето на Железничката станица во Нови Сад (каде што падна настрешницата) исчезнале 115 милиони долари поради наместени тендери и корупција. Сите слушнавме во каква енергетска криза се наоѓа Србија поради невоведување санкции кон Русија.

Паралелно со ова, пред два дена американскиот претседател Д. Трамп ја обвини српската фирма „Roaming Networks“ (позната и како „Dot Networks“, со седиште во Белград) дека преку своите сервери учествувала во наместување на изборите во САД во 2020 година, а која е во сопственост на бизнисмени блиски до СНС и самиот Вучиќ.

Во српските медиуми со години се спомнува „СКАЈ“ преписката (енкриптирана комуникациска апликација), обезбедена од ЕВРОПОЛ, која сега за првпат се користи и како судски доказ за вмешаност на криминални групи што водат и кон Црна Гора, каде веќе се применува во низа процеси.

Во Србија се најавува дека наскоро ќе се објави кој во СКАЈ преписките е означен како „Оскар“, организатор на криминални активности во Србија, но и пошироко на Балканот.

Кај нас барем е лесно, ние сите знаеме кој е македонскиот „Оскар“. Имаме и мал и голем „Оскар“.

Пред неколку дена беше уапсена поради корупција поранешната шефица на европската дипломатија Могерини, позната по тоа што учествуваше во дијалогот меѓу Белград и Приштина.

Доколку во Србија има избори напролет, тоа ќе ја очекува и Македонија. Грујо, Мицко и ВМРО-ДПМНЕ немаат луксуз да го дочекаат падот на српскиот режим, затоа што ќе се откријат сите сите нивни поврзаности со ДПМНЕ и вмешаноста во многу приказни.

На Груевски азилот му зависи од изборите во Унгарија и затоа по секоја цена мора да обезбеди власт во Македонија под негова контрола, како резервна опција за своето престојувалиште.

Ученикот Мицко мора внимателно да ја следи ситуацијата, да реагира, да најавува и по потреба да распише избори напролет, доколку тие бидат закажани и во Србија.

Сервери, прислушување, тендери, корупција… Звучи познато? Изгледа дека и соседите имаат „бомби“. Ја доживуваат нашата 2015 година. Не грижете се, ние повторно сме „двојно подобри“. Кај нас верзија 2.0 штотуку почна да работи.

Повторно е време, како што вчера рече Мицко, да минеме низ „катарза“. Еднаш не ни беше доволно. Изгледа дека е време за нов лист во цела Европа. Затоа: Нова сила, нова енергија, нов тим и вистински правец: Европа. Работата не е завршена!“, се наведува во соопштението на СДСМ.