Македонија
55 години од катастрофалниот земјотрес – Скопје се разбуди со звукот на сирените

Скопје денеска се разбуди во 5:17 часот наутро со звукот на сирените во знак на потсетување на катастрофалниот земјотрес што се случи пред 55 години на 26 јули 1963 година во 5:17 часот. Група урбани уметници од Центарот за современи уметници реализираа аудио акција точно во точно 5:17 минути на пет различни локации низ градот и ги потсетија скопјани на точното време на трагичниот настан.
Со оваа аудио акција, урбаните уметници дадоа нивен оригинален придонес во оддавањето почит на жртвите од земјотресот и внесоа нова димензија во одбележувањето на оваа скопска трагедија.
Со влегувањето на звукот на сирените во домот на скопјани и будењето на граѓаните во 5:17 часот на најдобар начин кај секој жител на Скопје ќе се вреже сеќавањето на земјотресот, тажните сеќавања за трагедијата кои со тек на времето нема да бледнеат од генерација до генерација, бидејќи секој што ќе го чуе звукот на сирените ќе се потсети на катастрофата од далечната 1963 година и во својата меморија ќе го вреже датумот 26 јули.
Денеска се навршуваат 55 години од катастрофалниот земјотрес што го погоди Скопје во кој 1070 луѓе го загубија животот, а 3 000 беа повредени. Земјотресот кој го разурна градот се случи на 26 јули 1963 година во 5 часот и 17 минути, а помали потреси имаше до пет часот и 43 минути. Беа урнати 15 800 станови, а оштетени 28 000. Над 200.000 луѓе остана без покрив над глава.
Градоначалникот Петре Шилегов синоќа во Галеријата на графити во Градскиот трговски центар присуствуваше на главниот настан во рамките на манифестацијата „Скопје зборува“ (23-26 јули) која ја одбележува 55-годишнината од катастрофалниот земјотрес.
„Во само едно деноноќие на 26 јули 1963 година отсликана е сета егзистенцијална, лична и колективна драма која сведочи за трагиката на човековото постоење. Оттука, да се зборува за кобниот 26 јули 1963 година прераснува не само во носталгија по старо Скопје туку и во етички императив кој и денес е дел од животот во градот. Посакувам никогаш повеќе градот Скопје да не се бори со природни катастрофи од вакви размери, како што беше земјотресот од 26 јули 1963 година. Да шири оптимизам и да настојува во нашата средина да завладее еден поинаква перцепција на нештата кои се нераскинлив дел од развојот на овој град. Од денешна перспектива, градот Скопје е потврда на кажаново, а воедно е и голем поттик и обврска на сите нас заедно, да го чуваме и да го сакаме нашиот град“, изјави Шилегов.
По катастрофалниот земјотрес први кои им пристигнале на помош на скопјани биле граѓаните од поранешните југословенски републики, а веднаш потоа почнала да пристигнува помош и спасувачки екипи од целиот свет.
„Во реализацијата на широката програма од акции, суштествени за изградбата на Скопје, својата помош ѝ ја обзнанија сите оние домашни и меѓународни сили, хуманитарни организации, исклучителни личности кои го почитуваа Скопје, сочувствуваа со катастрофата и сакаа да придонесат разрушеното Скопје повторно да се роди. 87 нации испратиле најразлична помош и помогнале во изградбата на новото Скопје – ’Градот на солидарноста’. По земјотресот новото Скопје со својата култура, урбано-економска, географско-просторна, демографска и културолошка специфичност, станува модерен град“, нагласи Шилегов.
Во своето обраќање, Шилегов ги повика скопјани, како жители на Градот на солидарноста, да бидат хумани и да донираат помош за настраданите во соседна Грција.
Присутните граѓани во рамките на манифестацијата „Зборува Скопје“ имаа можност да ја погледнат проекцијата на краткометражниот филмски колаж на младата режисерка Дина Дума насловен како „Скопје сонува“ и перформансот „Тивка реконструција на земјотресот“ на Билјана Радиноска, како и да се забавуваат во музичката програма „Разговор со смисла“, односно во концерти на Mammoth & Yashem, Тодор Караколев, импров сесија со музичари од новата скопска сцена.
Сите настани од манифестацијата „Зборува Скопје“ се тематски врзани со скопскиот земјотрес и претставуваат извесно видување на овој настан од 26 јули 1963 година, низ очите на младите уметници и нивното реконструктивно доживување на оваа трагедија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Земјотрес рано утринава ги разбуди граѓаните на Валандово и на околината

Утрово во 5:54 часот, земјотрес со јачина од 3,3 степени според Рихтеровата скала го стресе регионот околу Валандово, информира Сеизмолошката опсерваторија при Природно-математичкиот факултет во Скопје.
Телеметриската сеизмолошка мрежа на Македонија го регистрирала потресот на неколку сеизмолошки станици ширум државата, при што е утврдено дека епицентарот се наоѓа во епицентралното подрачје Валандово, оддалечено околу 120 километри југоисточно од главниот град.
Според првичните информации од Сеизмолошката опсерваторија, земјотресот бил почувствуван во Валандово и околните населени места со интензитет од IV степени според Европската макросеизмичка скала (EMS).
Засега нема информации за причинета материјална штета или повредени лица, но локалното население на социјалните мрежи известува дека потресот бил „краток, но силен“, и ги разбудил во раните утрински часови.
Сеизмолозите продолжуваат да ја следат ситуацијата и ги повикуваат граѓаните на смиреност, посочувајќи дека ваквите потреси се честа појава во сеизмички активниот регион на југоисточна Македонија.
Македонија
Колони на границите, на „Богородица“ се чека до 40 минути, на „Табановце“ до 30 минути

Сообраќајот на државните патишта се одвива непречено и по суви коловози, но фреквенцијата на возила, особено кон граничните премини, денеска е значително зголемена, информира Автомотосојузот на Македонија (АМСМ).
Најголема гужва има на Граничниот премин Табановце, каде времето на чекање за влез и излез од државата е од 15 до 30 минути. На Богородица ситуацијата е уште поинтензивна – за излез од државата се чека до 40 минути, додека на ГП Дојран времето на задржување е 20 до 30 минути.
„Состојбата на патиштата е стабилна и коловозите се суви, но фреквенцијата е зголемена. Апелираме до сите учесници во сообраќајот да возат внимателно, со прилагодена брзина и да ја почитуваат сигнализацијата, особено на делниците каде што има опасност од одрони“, велат од АМСМ.
Посебна претпазливост се препорачува на патните правци низ котлините, речните долини и клисурите – Катланово – Велес, Маврово – Дебар – Струга, Виница – Берово и Кочани – Делчево – каде што постои ризик од појава на одрони.
На останатите гранични премини од македонска страна, нема подолги задржувања за влез и излез од државата.
Македонија
Денес сончево со ветер, од утре повторно температурата во постепен пораст

Управата за хидрометеорологија (УХМР) за денес прогнозира претежно сончево време со умерен до засилен ветер од северен правец, кој наместа ќе достигнува брзина од 60км/ч.
Минималната температура ќе биде во интервал од 11 до 20, а максималната ќе достигне од 27 до 36 степени.
Во Скопје, сончево со умерен до засилен северен ветер. Минималната температура ќе се спушти до 19, а максималната ќе достигне до 35 степени.
Од понеделник следува период на стабилно и потопло време со постепен пораст на дневнaтa температура.