Владина делегација во која се заменик-претседателот на Владата Александар Николоски, министерката за финансии Гордана Кочоска Димитриеска и министерот за надворешни работи и трговија Тимчо Муцунски, денеска во рамки на Самитот за Западен Балкан – Берлински процес кој се одржува во Лондон, оствари средба со министерот за бизнис и трговија на Обединетото Кралство, Сер Крис Брајан.

По средбата, вицепремиерот Николоски изјави дека Обединетото Кралство е сериозно посветено на реализација на Договорот Влада со Влада и најави повеќе средби со високи владини претставници.

Тој информира дека делегацијата започнува дводневна работна посета во рамки на Берлинскиот процес, организиран од британскиот премиер Кир Стармер, и дека премиерот Христијан Мицкоски повторно ќе има средба со Стармер.

Николоски најави и прием кај кралот Чарлс, како и повеќе билатерални средби со британски министри и финансиски институции. Според него, првата средба со министерот за трговија и економија покажала дека Обединетото Кралство е силно посветено на реализацијата на меѓудржавниот договор, кој предвидува 6 милијарди евра за инфраструктурни проекти, вклучувајќи ја брзата пруга на Коридор 10 и изградбата на болници во Штип, Тетово и Кичево.

Во текот на утрешниот ден ќе се потпише и меѓудржавен договор за соработка во воздушниот сообраќај, со цел зголемување на бројот на директни летови меѓу Англија и Македонија.

Министерството за здравство соопшти дека, како правен субјект, нема никаква обврска или долг кон ЈП „Комунална хигиена – Скопје“, демантирајќи ги тврдењата за наводен неплатен долг од 5 милиони евра.

„Тврдењата се неточни и имаат цел да му наштетат на угледот на Министерството или да се амнестира некој од сопствените обврски“, се наведува во реакцијата.

Од Министерството апелираат до јавноста и медиумите да ги проверуваат информациите, особено кога станува збор за тврдења што можат да создадат забуна или недоверба во институциите.

Во соопштението се додава дека Министерството за здравство продолжува да работи согласно законските обврски и со принцип на транспарентност во сите активности.

Претходно денес, градоначалничката Данела Арсовска изјави дека Министерство за здравство му должи милиони Јавното претпријатие Комунална хигиена.

„Мицковски несреќо, на кого се закануваш, објави на социјалните мрежи градоначалничката нa град Скопје во заминување, Данела Арсовска, откако Владата на седница донела заклучоци со кои се задолжуваат МВР и останатите надлежни институции веднаш да извршат вонреден надзор врз работењето на Град Скопје и ЈП Комунална хигиена за отпадот во градот.

„Те велича Орце Самка Ѓорѓиевски дека си господ и си почнал да веруваш дека си семоќен? Политички прогон сакаш да правиш несреќо.

За ѓубрето низ Скопје е одговорна твојата криминална структура во Комунална хигиена на чело со Јулијана Спировска која е претседател на Управниот одбор (земи читај допис ако имаш време меѓу заканите и правење бизнис)“, му порачува Арсовска на Мицкоски

За ѓубрето низ Скопје, како што вели, се одговорни неговите градоначалници кои сред избори додава Арсовска, повикале граѓаните да фрлаат кабаст отпад.

„А немаат ни ресурси ни механизација да го собираат истото, па тоа ѓубре се мачат да го собираат вработените од КХС кои веќе се на крај на силите.

За ѓубрето низ Скопје е одговорно твоето министерство за здравство, кое милиони му должи на Комунална хигиена. Нив ќе им влезеш ли со полиција несреќо?

По корумпирана и по плитка власт од твојава не постоела, ни ќе постои некогаш во Македонија. Уствари заборавив Северна, бидејќи и името дека ќе го вратиш лажеѓе, како и за сѐ друго што лажеш денес“.