Во рамките на одбележувањето 30 години од рамковниот договор ОБСЕ – ОН, претседавачот со ОБСЕ и министер за надворешни работи, Бујар Османи, ќе присуствува во Њујорк.

На покана од претседателството на Швајцарија со Советот за безбедност на ОН, на 4 мај Османи ќе се обрати пред Советот, при што ќе ги претстави активностите и приоритетите од програмата за претседавањето на Северна Македонија со ОБСЕ, а со оглед на значајниот јубилеј ќе се осврне и на соработката и партнерството на ОБСЕ со ООН и на заедничките цели за зајакнување на сеопфатната безбедност во регионот на ОБСЕ, особено во областите на спречување конфликти и управување со кризи.

Покрај тоа, Османи ќе има работен состанок со министерот за надворешни работи на Швајцарија, Игнацио Касис. Швајцарија овој месец го презеде ротирачкото претседавање со Советот за безбедност на Обединетите нации.

Во рамките на одбележување на 3 Мај, Светскиот ден на слободата на медиумите, Османи ќе има видеообраќање на настанот „Дали може да има безбедност без слобода на медиумите?“, организиран од канцеларијата на претставникот на ОБСЕ за слобода на медиуми и претседателството на Северна Македонија со ОБСЕ.

Во својство на претседавач со ОБСЕ министерот Османи ќе има состанок и со шефовите на постојаните мисии на земјите членки на ЕУ.

Османи посетата на Соединетите Американски Држави ќе ја продолжи во Вашингтон како дел од владината делегација што ќе ја предводи претседателот на Владата, Димитар Ковачевски.