Македонија
Oсмани на средба со надбискупот Галагер: „Ватикан и Скопје се развиваат блиски, пријателски и искрени меѓусебни односи“

Министерот за надворешни работи, Бујар Османи, денеска оствари средба со секретарот за односи со државите на Светата Столица, надбискупот Пол Ричард Галагер, кој е во возвратна посета на нашата земја.
Заемно беше изразено задоволство од успешниот развој на билатералните односи меѓу двете земји, втемелени врз значајни историски врски, споделени културни вредности и заеднички духовни традиции.
„Сакам да го истакнам фактот дека меѓу Ватикан и Скопје се развиваат блиски, пријателски и искрени меѓусебни односи. Тие почиваат на нашата традиционална поврзаност, олицетворена во Гонџe Бојаџиу, родена овде во Скопје, нашата Мајка Тереза, која со својата хуманост и милосрдие, длабоко се вкорени како светица во римокатоличкиот систем на вредности. Враќајќи се наназад ќе дојдеме и до светите апостоли Кирил и Методиј, кои исто така претставуваат столбови на културниот образец на Европа, и цврст мост кој ги поврзува Северна Македонија и Ватикан“, истакна Османи.
Заблагодарувајќи се за учеството на надбискупот Галагер на тукушто одржаниот Преспа Форум Дијалог во Охрид, министерот Османи го информираше својот хомолог за најновите состојби и предизвици во процесот на интеграција на Северна Македонија во Европската Унија.
“Мислам дека имавме плодна дискусија, со навистина значајни теми, особено фактот што доминираше низ текот на целиот форум, дека Западниот Балкан, недвосмислено припаѓа во Европската Унија, а Северна Македонија доби поддршка практично од сите учесници за отворање на преговорите со Унијата уште за време на Француското претседателство”, изјави Османи.
Надбискупот Галагер ја реафирмираше поддршката на Светата Столица на нашиот пат кон Европската Унија, цврсто верувајќи дека од интеграцијата на државата во европското семејство, полза ќе има не само Регионот, туку и целиот континент.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Делови од Карпош и Сарај денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 09.00 до 13.00 часот, корисниците од ул. Пелистерска 4-1/8. (општина Карпош)
– во периодот од 09.00 до 14.00 часот, корисниците од улиците бр. 3 и бр. 5 како и околните објекти во нивна близина во Сарај.(општина Сарај)
Македонија
Без вода дел од Центар

Од ЈП Водовод и Канализација известуваат дека денеска поради дефект на улицата Димитрие Чуповски бр.10 без вода ќе останат корисниците од улицата Никола Вапцаров лоцирани на потегот од Министерство за правда до Плоштад Македонија, општина Центар.
Водоснабдувањето ќе биде прекинато во периодот од 08.00 часот па се до отстранување на дефектот.
Македонија
Променливо облачно со повремени локални врнежи од дожд

Времето денеска ќе биде променливо облачно со повремени локални врнежи од дожд. Ќе дува умерен до засилен ветер од северен правец (локално над 60 km/h). Минималната температура ќе биде во интервал од 5 до 11, а максималната ќе достигне од 9 до 16 степени.
Во Скопје, променливо облачно со повремен локален дожд. Ќе дува умерен, во делови од котлината повремено засилен ветер од северен правец. Минималната температура ќе се спушти до 9, а максималната ќе достигне до 13 степени.
Времето во наредните денови
До среда ќе преовладува променливо облачно време со повремени локални врнежи од дожд. Ќе дува умерен до засилен северен ветер (локално над 60 km/h), а температурата ќе се задржи под просекот за овој период од годината. Од четврток времето ќе биде стабилно и суво со пораст на дневната температура.