Општество
Дискусија: Потребни се итни мерки за решавање на проблемите на младите
„Младински изборни муабети“, настан кој е дел од кампањата #ИЗБОРИСЕ на Национален младински совет на Македонија (НМСМ), се одржа во среда во Кино Култура во Скопје.
На настанот учествуваа младински претставници на политички партии, односно коалиции чии имиња се наоѓаат на кандидатските листи за пратеници на претстојните парламентарни избори.
На говорниците им беше овозможено пред младите и пред пошироката јавност да ги претстават нивните идеи за решавање на најгорливите прашања на младите во Македонија, како младинска невработеност, иселување на младите од Македонија и младинско учество. Покана за учество прифатија Хасан Синани (ДПА), Елмедина Дервиши (ДУИ); Стефан Богоев (Коалиција за живот во Македонија), Александар Илиевски (Коалиција за промени и правда), Нурџан Асановска (БЕСА); Андреј Јованчевски (Левица).
Говорниците потенцира дека се потребни итни мерки и реформи за решавање на клучните младински проблеми, како невработеност, иселување и недоволното учество во креирањето на политиките и повикаа младите да излезат на претстојните парламентарни избори и да го остварат нивното право на глас кое единствено може да доведе до нови промени со состојбите во државата.
По излагањето на говорниците, подиумот им беше препуштен на младите во публиката кои имаа можност да поставуваат прашања до кандидатите за пратеници и одблизу да ги запознаат нивните потенцијални претставници во Собранието на Република Македонија.
Настанот го отвори директорот на Националниот демократски институт за меѓународни работи (NDI), Крис Хеншоу заедно со Претседателот на НМСМ, Дамјан Николовски.
Крис Хеншоу ја поздави иницијативата на НМСМ што ги собра на едно место подмладоците на политичките партии и ги пофали партиите за тоа што препознаа дека има заеднички сериозни теми кои треба да бидат адресирани, како што се младинската невработеност и иселувањето на младите од Македонија.
Исто така, тој го пофали почитувањето на Кодексот за фер избори што го потпишаа лидерите на подмладоците пред две недели. Посветеноста на тоа, како и досегашното однесување и подготвеноста да се соработува дава надеж за иднината. За крај тој го повика НМСМ да го продолжи дијалогот и по изборите со цел да се најдат заеднички решенија за сериозните предизвици.“
„Младите заслужуваат и мораа да бидат во центарот на програмите на политичките партии. Воедно, заслужуваат да имаат можност директно да се соочат и разговараат со оние кои ќе ги претставуваат, да знаат што содржат програмите на политичките партии и да ги покренат горливите прашања, пред да одлучат за кого ќе го дадат својот глас. Токму затоа НМСМ, преку декларацијата која ја потпишаа подмладоците на политичките партии, бара централно место и подобрена клима за младинските политики, а преку овој настан кој е дел од поголема кампања на НМСМ, бара доближување на политичарите до младите.“ – истакна Претседателот на НМСМ, Дамјан Николовски.
Оваа активност на Националниот младински совет на Македонија се реализира во рамките на програмата на Националниот демократски институт за меѓународни работи (НДИ) во Македонија, финансиски поддржана од Националната фондација за демократија (НЕД). /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Годишен извештај на Народниот правобранител: Помалку претставки од граѓаните за работата на јавните обвинителства
Во извештајната 2023 година, во областа која се однесува на работата и постапувањето на обвинителствата во Република Северна Македонија поднесени се 63 претставки што е за 24 помалку во однос на 2022 година, се констатира во Годишниот извештај за степенот на обезбедувањето почитување, унапредување и заштита на човековите слободи и права во 2023 година што го објавува Народниот правобранител на Република Северна Македонија.
Согласно објавените податоци, бројот на претставки на граѓаните на годишно ниво се намалил за повеќе од 38%, што претставува резултат на заложбите на Јавното обвинителство за зголемување на ефикасноста на постапките и континуираните напори за подобрување на довербата на граѓаните во работата на јавните обвинителства.
Во најголем број од претставките граѓаните бараа интервенција во врска со постапки пред основните јавни обвинителства (51), потоа пред Основното јавно обвинителството за организиран криминал и корупција (4), постапка пред Јавното обвинителство на РСМ (3), пред вишите јавни обвинителства (2), друго (2) и една претставка се однесуваше за постапка пред Совет на јавни обвинители. Ваквиот сооднос е очекуван со оглед на обемот на предметна работа и фактот што токму јавните обвинителства со основна надлежност го прават првиот директен контакт на граѓаните со институцијата.
Доколку се има предвид вкупниот обем на работа на јавните обвинителства кои активно постапуваат по поднесени кривични пријави за над 40.000 сторители на кривични дела во текот на годината, поднесените 63 претставки до Народниот правобранител претставуваат околу 0,1% од таа бројка. Притоа, граѓаните во посочените предмети изразувале незадоволство поради непостапување по поднесена пријава на кривично дело, одолжување на постапката или поради незадоволство од донесена одлука. Од тие причини Народниот правобранител, меѓу останатите препораки во извештајот, во делот на Јавното обвинителство препорачува основните јавни обвинителства да ги доставуваат јавнообвинителските одлуки до странките и да им се овозможи правото да ги обжалат до повисоките јавни обвинителства, да постапуваат поажурно и навремено да преземаат дејствија, да го почитуваат рокот од 3 месеци доколку не донесат јавнообвинителска одлука да го известуваат повисокиот јавен обвинител и пријавителот, за да нема сомневање и страв дека гонењето ќе застари.
Сите овие забелешки Јавното обвинителство ги зема предвид, детално ги анализира и ќе продолжи да презема активности за дополнително зголемување на ефикасноста, на транспарентноста и на отчетноста за постапките што ги води. Ваквите заложби на Јавното обвинителство се веќе воспоставен начин на работа при што уште во извештајот за 2022 година омбудсманот констатираше дека за разлика од претходните години, сега јавните обвинителства, особено издвојувајќи ги Основното јавно обвинителство Скопје и Основно јавно обвинителство за гонење на организиран криминал и корупција, постапуваат по барањата на Народниот правобранител, даваат суштински и целосни одговори за бараните информации од постапките, се вели во соопштението од Јавното обвинителство.
Македонија
Денеска со зајдисонце за муслиманите започнува месецот Рамазан
Денеска со зајдисонце за муслиманите започнува месецот Рамазан, при што се поттикнуваат добри дела, молитви и читање Куран чие објавување започна токму во месецот Рамазан пред повеќе од 1.400 години.
Рамазан е деветтиот месец од муслиманскиот лунарен календар, благословен и свет месец во кој верниците од исламска вероисповед ширум светот постат во текот на дневните часови.
Целта е да се излезе од Рамазан подобар, поздрав, со простени гревови.
Првиот ден на постот е во понеделник на 11 март, а последниот на 9 април.
Рамазан е месец на прочистување на духот, умот и телото во кој муслиманите се откажуваат од храна, пијалок и други телесни задоволства, не прават неморални дела и избегнуваат гнев.
Добротворноста е многу важен дел од исламот и уште поважно е за време на Рамазан кога муслиманите се потсетуваат на великодушноста и ги зголемуваат своите добротворни активности.
Секоја година, Рамазан започнува 10 до 12 дена порано бидејќи исламскиот календар е всушност лунарен хиџри календар каде месеците имаат 29 или 30 дена.
Бидејќи лунарната година е пократка од сончевата година за 11 дена, во 2030 година ќе има два Рамазани – првиот ќе започне на 5 јануари, а вториот на 26 декември.
Постот завршува со Бајрам.
Македонија
Народната банка со поддршка за борбата против семејното насилство
Вработените во Народната банка организираа хуманитарна акција, преку која изразија поддршка за борбата против семејното насилство. Донацијата на вработените за „Кризниот центар за згрижување на жени жртви на семејно насилство-Надеж“, кој 20 години нуди поддршка и помош на жените кои поминуваат низ тешки животни искуства, ја врачија гувернерката на Народната банка, Анита Ангеловска-Бежоска, вицегувернерката Ана Митреска и претставници на Синдикатот на вработените во Народната банка.
При посетата на Кризниот центар, тимот на Народната банка се запозна со предизвиците со кои се соочува здружението и активностите кои ги преземаат за помош и поддршка на жените жртви на насилство. На средбата беше истакната потребата од понатамошно јакнење на свеста на сите општествени чинители за предизвиците со кои се соочуваат овие жени и долгиот процес и улогата на општеството во нивната рехабилитација.
„Потребата од натамошно подобрување на состојбите треба да е и причина да размислиме што и каде може да се унапреди за да се направат промени. Треба да посветиме должно внимание и да упатиме гласни пораки дека со економско зајакнување, жените жртви на семејно насилство многу полесно ќе го прекинат кругот на насилство и помалку ќе бидат жртви. Потребна е многу поголема сензибилност во однос на пристапот до работа на оваа ранлива категорија на жени. Тоа подразбира креирање мерки за нивно вработување, врз основа на реалните потреби на жените, или нивна стручна преквалификација, доквалификација што ќе придонесе за нивно интегрирање и задржување на пазарот на трудот“, истакна гувернерката Ангеловска-Бежоска, при посетата на Здружението „Кризен центар за згрижување на жени жртви на семејно насилство-Надеж“.