Бобан Стефковски, кандидатот на ВМРО-ДПМНЕ за градоначалник на Гази Баба, е осудено лице и бивш затвореник, обвини Билјана Муиќ, портпаролка на СДСМ Гази Баба.

„Во 2002 година Стефковски е осуден на казна затвор од три месеци поради сторено кривично дело неовластено производство и пуштање во промет наркотични дроги, односно продажба на дрога“, рече портпаролката, која ја приложи и пресудата со која се потврдува кривичното дело на Стефковски.

Тоа што Стефковски пред десет дена извадил уверение и покрај тоа што ова народски се вика уверение за неосудуваност, всушност е уверение дека во моментот на издавање на уверението против лицето не се води кривична постапка, што не значи дека порано не бил осудуван, објасни Муиќ.

Според неа, ова е уште еден доказ дека во ВМРО-ДПМНЕ нема никаква промена, односно дека тоа е, како што рече, истата криминално режимска матрица од времето на Никола Груевски.