Македонија
Ѓорѓиевски: Не смее да има недопирливи функционери, ЗЕЛС иницираше законски измени за одговорност

Претседателот на ЗЕЛС и градоначалник на Општина Кисела Вода, Орце Ѓорѓиевски, денес присуствува на четвртиот консултативен настан за измените и дополнувањата на Законот за локална самоуправа, каде со министерот, претставници од Министерството за локална самоуправа, градоначалници, експерти, УНДП и граѓанскиот сектор се дискутира за клучните реформи што треба да ја направат локалната власт поодговорна и поефикасна.
Главното барање, кое беше иницирано од ЗЕЛС уште пред година и половина, е воведување механизам за отповикување на градоначалниците, чекор што ќе ја врати вистинската моќ во рацете на граѓаните. Претседателот Ѓорѓиевски порача дека локалната власт мора да биде ефикасна, отчетна и вистински одговорна пред оние кои им го дале мандатот и довербата. Според него, оваа законска промена е неопходна, бидејќи во моментов градоначалниците се единствените функционери во државата кои не можат да бидат отповикани, што е недозволиво во едно демократско општество.
„Мене ми е исклучително драго што ова беше иницијатива уште пред година и половина на ЗЕЛС и на која се надоврзаа сите општини и ми е драго што Министерството за локална самоуправа ја препозна нашата идеја, предлози и барања. Ова е четврта сесија на која што се разговара отворено, транспарентно за сите измени кои што треба да ги претрпи Законот за локална самоуправа. Има прашања кои долги години лебдат, не биле затворени и ова е вистинска можност силата да се врати кај суверенот, кај граѓаните, поврзано со мандатите на градоначалниците, но ние бараме да биде исто и со советниците, така што верувам дека денес ќе произлезат и нови предлози, добри предлози кои во перспектива можат да бидат имплементирани.
Она што ние од самиот почеток го побаравме, а наиде на најголем интерес кај јавноста е отповикувањето на градоначалник. Можноста, повторно суверенот-граѓанинот да ја има моќта и да го разреши оној кој го гласа и го назначува, односно градоначалникот, кој патем е единствениот функционер во моментот во државата кој не може да биде отповикан. Така што, уште еднаш ја поздравувам иницијативата на Министерството за локална самоуправа и се надевам дека на крајот на денот, сите заеднички ќе допринесеме за едно законско решение, едни законски измени кои на долг рок ќе бидат во интерес на граѓаните“, изјави претседателот на ЗЕЛС и градоначалник на Општина Кисела Вода, Орце Ѓорѓиевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Муцунски во Украина повика на итен и безусловен прекин на огнот од страна на Русија

Министерот за надворешни работи Тимчо Муцунски, на покана на украинскиот министер Андри Сибиха и високата претставничка на ЕУ Каја Калас, престојуваше во еднодневна посета на Лавов, каде што учествуваше на Министерскиот состанок за формирање на Специјалниот трибунал за злосторството агресија против Украина и на неформалниот состанок на Советот за надворешни работи на ЕУ. Муцунски беше единствениот министер од Западен Балкан присутен на настаните.
„На состаноците беше потврдена поддршката за Украина, нејзиниот суверенитет и територијален интегритет, како и за иницијативата за воспоставување правна одговорност за актите на агресија. Министерот Муцунски ја реафирмираше принципиелната поддршка на нашата држава, повикувајќи на итен и безусловен прекин на огнот од страна на Русија и на заеднички ангажман за постигнување праведен и одржлив мир“, соопшти МНР.
Во рамки на посетата, министерот Муцунски, заедно со своите колеги, оддаде почит на украинските херои на гробиштата „Lychakiv“ во Лавов.
Македонија
Во Кочани си дојдоа деца што цел живот ќе немаат раце, толку бргу ли нè заборавивте? – проговори мажот што се врза за бандера во Скопје

Мажoт, кој на скопскиот плоштад се залепи со селотејп за бандера, го направил тоа за да испрати силна порака и да го насочи вниманието на јавноста кон трагедијата во Кочани.
Тој пред собраните праша: „Па толку бргу ли нè заборавивте?“
Вели дека пред некој ден во Кочани си дошле деца што немаат прсти на рацете.
„Овие деца се пуштени од болница и ќе немаат цел живот раце. Барем да им помогнеме. Толку ли бргу нè заборавивте нас од Кочани? Зошто тој град никогаш не бил битен? Да направиме нешто за тој град. Наместо да се отвораат нелегални дискотеки, нека направат нешто во Кочани. Нека направат некој културен центар, спортски центар. Нека отворат некое кино наместо деца да одат на такви места и да се глупираат таму, нека гледаат филм“, рече човекот од Кочани.
Тој вели дека жителите на овој град не се чувствуваат добро и повика на разбирање. Ако не се преземе нешто, вели, работата ќе оди на полошо.
„Ми загинаа пет другари и некој ме прашува: нема ли да ти биде срам што ќе бидеш врзан? Јас сум секако духовно врзан. Нема што да правам, морам да живеам во тој град. Мора да направам нешто за него“, рече човекот објаснувајќи ја симболиката на врзувањето.
Рече дека донациите се намалиле, а на децата ќе им требаат многу пари.
„Само на едно дете знам дека му се потребни ракавици за рацете и за нозете. Една ракавица е 1.000 евра. Значи, ќе му требаат 4.000 евра. Како што гледаме, државата тие пари нема да ги обезбеди. Ако ништо друго, за тие деца да се соберат пари. Каков живот ќе живеат тие деца?“, рече човекот.
Тој попладнево го привлече вниманието врзан за бандера. Прашан зошто го прави тоа, одговори дека ќе каже кога ќе се соберат повеќе новинари.
Македонија
Азески и Рафуна разговараа за проблемите со камионите на македонско-косовската граница

Претседателот на Стопанската комора на Косово и претседател на Коморискиот ивестициски форум (КИФ), Лулзим Рафуна, денеска престојуваше во Комората во Скопје на разговори околу проблемите со подолго задржување на македонски камиони кои транспортираат прехранбени производи на територијата на Косово, под изговор дека задржувањето е поради чекање резултати од лабораториски анализи.
На заедничката средба со претседателот на Стопанската комора и потпретседател на КИФ Бранко Азески, по согледување на состојбите беше констатирано дека трговијата помеѓу двете земји како докажни трговски партнери, мора да се одвива непрекинато.
Исто така, констатирано е дека за конкретниот застој, да се надминат проблемите преку забрзување на протокот на камионите и наместо на меѓуграничниот простор тие да се насочат согласно законската регулатива во магацините и таму да се чека исходот од лабораториските анализи, да се примени принципот на проценка на ризик при спроведување на физичка контрола на граничниот премин, а не да се врши контрола на секоја пратка поединечно и да се иницира двете Влади преку надлежните институции (Агенциите за храна и ветеринарство), да работат на усогласување на сертификатите и нивно заемно признавање зашто е потребно усогласување со европската регулатива.
„Заеднички заклучок од состанокот на Рафуна и Азески, е дека мора да се применат конкретни активности во согласност со политиките на Европската Унија и меѓународните договори, затоа што само така и двете држави ќе покажат дека се сериозни во однос на патот кон кој се насочени, а тоа е членството во Европската Унија“, соопштија од Стопанската комора.
На состанокот, двајцата претседатели на коморите на Косово и Северна Македонија разговарале и за протокот на стоки и услуги кои со изградба на автопатната инфраструктура на Косово добија на интензитет и побрза диманика, а со зголемената функционалност на граничните премини на двете страни се потикнува зголемена ефективност.
Според Стопанска комора, останува да се заокружи уште патната инфраструктура на територијата на нашата држава, каде поради сеуште активните градежни работи се создаваат долги колони возила што го успорува протокот.