Туристичките агенции најавија протест што  ќе се одржи во текот на утрешниот ден, поради, како што велат, молкот на институциите по нивните барања за спас на секторот.

Протестот ќе се одржи утре со почеток во 16 часот.

„Сведоци сте на нашата борба во изминатите пет месеци за опстојување на нашиот сектор, поради кризата со Ковид-19, како и барањата кои во повеќе наврати ги упативме кон сите надлежни институции, Министерство за економија, Министерство за финансии, со цел помош на туристичките агенции, водичи и превозници, но досега останаа неми за нашите апели и ниту еднаш не добивме никаква надеж дека истите воопшто ќе бидат разгледани“, велат организаторите од туристичкиот сектор.

Додаваат дека на протестот се пријавени повеќе од 700 учесници кои ќе се движат по одредена рута и автобуси што ќе ги следат. Почетокот на протестот ќе биде симболично пред Дрводекор, местото од каде што некогаш почнуваа реализациите на нивните тури, а ќе продолжи кон Кочо Рацин, 11 октомври, Димитрие Чуповски, Васил Главинов, булевар ВМРО, булевар Илинден, до Владата.

Планирано е повторно обраќање на дел од учесниците, со цел повторно да се напомене дека пет месеци немаат никакви примања, ниту можност за одржување на функционалноста на нивните сектори.

„Доколку државата не ни даде помош, ќе бидеме принудени веќе во наредните денови да ставиме катанци на нашите врати. Овој протест нема никаква политичка позадина и строго се оградуваме од каква било поврзаност. Бидејќи истиот се одржува во време на пандемија, уверуваме дека ќе се придржуваме до мерките за заштита, како носење маски и дистанцирање“, велат од туристичкиот сектор.