Денешниот ден повторно ја разоткри коалицијата СДСМ, ДУИ и Левица, кои синхронизирано и координирано повторно ги насочија сите свои сили кон мене. На пратеничките прашања СДСМ повторно со своето папагалско повторување на зборот оставка и ДУИ со своите традиционални измислени етнички прашања, а Левица со поднесувањето на нова интерпелација. Три партии, наводно различни и наводно спротивставени, денес повторно усогласени и координирани за една единствена цел, вели министерот за внатрешни работи, Панче Тошковски, за интерпелацијата што Левица ја најави против него.

Тој вели дека интерпелацијата е демократско право на опозицијата и вели дека ниту бегал, ниту ќе бега од рапсрава.

„Левица ја најави третата интерпелација против мене за помалку од две години. Како и претходните две и оваа повторно беше најавена преку режирана прес-конференција, повеќе со евтин политички настап отколку со суштински аргументи. Но, како и да е сакам една работа да биде целосно јасна. Интерпелацијата е демократско право на опозицијата и јас тоа право целосно го почитувам. Ниту сум бегал, ниту ќе бегам од расправа. Напротив, аргументите ќе ги соочам таму каде што треба, во Собранието, јавно, пред сите пратеници и пред граѓаните. Таму секој ќе има можност да каже што мисли, а одлуката нека ја донесат избраните претставници на народот, согласно сопствената совест и одговорност“, вели Тошковски.

Тој тврди дека Левица уште еднаш покажала дека, свесно или несвесно, станува најкорисниот сојузник на СДСМ и ДУИ.

„Но, исто така, не можам да премолчам нешто што одамна им е јасно на граѓаните. Левица уште еднаш покажа дека, свесно или несвесно, станува најкорисниот сојузник на СДСМ и ДУИ. Истите тие партии против кои со години градеа имиџ на алтернатива и ветуваа поинаква политика, денес практично ги бранат преку напади кон секој што се обидува да воведе ред, одговорност и функционирање на системот. Лесно е од опозициска клупа да се пишуваат интерпелации и да се држат прес-конференции. Но многу потешко е да се води институција, да се носи одговорност, да се донесуваат одлуки и да се штити безбедноста на граѓаните. Луѓе кои никогаш не раководеле со институција, не управувале со буџет и не понеле реална одговорност, денес држат лекции за тоа како се води Министерството за внатрешни работи“, вели министерот.

Тошковски вели дека оваа трета интерпелација не е израз на грижа за државата туку евтин политички обид да се закочи процесот на расчистување со криминалот, корупцијата и долгогодишната неказнивост која ја практикуваа нивните денешни партнери.

„Затоа што кога системот конечно почнува да функционира, најмногу се вознемируваат токму оние што со години профитирале од неговото нефункционирање. Не се напаѓа оној што е неважен, се напаѓа оној што менува нешто. Јас ќе продолжам да работам, ќе продолжам да се борам со аргументи и со резултати. А конечниот суд, како и секогаш, ќе го дадат граѓаните“, вели Тошковски.

За свлечиштето на градилиште во Центар што се случи во понеделникот на улицата „Теодосиј Гологанов“, во близина на Католичката црква, одговорност мора да сноси и Горан Герасимовски, изјави Филип Ѓорѓиев од ВМРО-ДПМНЕ.

Според него хаосот кој деновиве се случува во општина Центар е последица на неодговорното работење на СДСМ и Герасимовски и на тоа што се расфрлале со одобренија за градби.

„Задоцнети казни и санкции нема да го исперат неодговорното и расипничко работење на Герасимовски и СДС во Општина Центар. Луѓето што скоро цела деценија го уништуваат Центар, требаше да размислуваат пред да се расфрлаат со одобренија за градба на фирмите на Абдуљвехап Хусеини, кој според медиумите е со натоварени пријави за несовесно работење во службата или пак на Љумиал Џеладини, чија компанија има објавено непостоечки телефонски број. Што мислеа кога дадоа амин за работа на „Конструксион Груп Гостивар“, во сопственост на Исмаил Беџети, за која медиумите подоцна открија дека е со блокирана сметка!?“, праша тој.

За овие компании, вели Ѓорѓиев, Герасимовски и СДС три месеци ништо не знаеле, додека тие го раскопувале срцето на градот.

„Три месеци беа заслепени со парите од неконтролираното издавање одобренија за градба, три месеци не виделе апсолутно ништо. И дури кога се урна земјиштето, пропаднаа тротоари, кога паднаа бандери, тогаш „дознаа“ на кој сѐ даваат одобренија за градба и „итно реагираа“. Во меѓувреме, инспекторот им бил на боледување. Покрај одговорност за компаниите и нивните сопственици, одговорност мора да сносат и Горан Герасимовски и СДС, бидејќи ова не е инцидент. Ова е само уште еден доказ дека СДС ја влече Општина Центар во пропаст, заедно со себе“, рече Ѓорѓиев.

Секој студент ја има вештачката интелигенција на својот телефон. Борбата не е таа да се запре, туку човекот да го има последниот збор. Во образованието, наша задача е да поставиме рамки и начини на нејзина употреба. Нив ги определуваме со Националната стратегијата за образование 2026–2032 и повеќе други документи, со кои целиме кон создавање дигитално зрело образовно опкружување, коешто ќе им овозможи на младите одговорно и креативно да ги користат новите технологии, во функција на личниот раст, граѓанскиот ангажман и општествениот напредок.

Ова го истакна министерката за образование и наука, Весна Јаневска, на панел дискусија на Машинскиот факултет во Скопје на тема „Редизајнирање на високото образование и универзитетите: вештачката интелигенција и соработката со индустријата како едни од најсериозните предизвици на денешното време“.

„Стратешкиот пристап на Владата е целосно во согласност со последните заклучоци на Советот на ЕУ, од мај 2026, кои се однесуваат на релацијата образование – вештачка интелигенција и бараат етички, безбеден и човечки центриран пристап кон оваа технолошка иновација“, рече Јаневска, нагласувајќи дека со нејзиното воведување, улогата на наставниот кадар станува уште посуштинска.

„Вештачката интелигенција може да објасни, но не и да му пријде на студентот со емпатија. Може да сумира содржина, но не и да види дека студентот е збунет со сумирањето. Не може да види каде греши, и зошто. Така што, таа не може да го замени професорот кој го води студентот низ студиската програма. Интеракцијата професор – студент гради знаење, вештини, вредности и карактер на студентот“, рече министерката.

Говорејќи за преземените чекори во насока на имплементирање на вештачката интелигенција во образовниот систем, Јаневска потенцираше дека министерството има одлична соработка со високообразовните институции со чија поддршка е изработен Водич за примена на вештачката интелигенција и организирани се обуки за наставниците во основните и средните училишта.

Нагласи дека важно е младите да бидат дигитално писмени и особено да ја разбираат суштината и правилно да ја применуваат технологијата.

„Компаниите бараат дипломирани студенти кои се технички писмени за вештачка интелигенција и имаат знаења во одреден домен. И потребни им се истовремено и научно ориентирани кадри, но и високообразовани професионалци. Затоа со новиот Закон за високо образование воведуваме концепт на дуално образование, како модел на студирање во кој се интегрира академската настава со практична обука во компанија, со цел студентите да стекнат знаења и професионални вештини потребни на пазарот на трудот, меѓу кои и дигиталните“, додаде министерката.

Панел дискусијата е дел од дводневна меѓународна конференција посветена на градење синергија за креирање иновативни решенија во процесот на дигитална трансформација, што ја организираат Машинскиот факултет при Универзитетот „Св. Кирил и Методиј“ и Асоцијацијата на европски професори по индустриско инженерство и менаџмент