Претседателот на Владата Христијан Мицкоски на седницата на Собранието посветена на пратенички прашања ги коментираше своите посети на Вашингтон и Минхенската конференција. Тој истакна дека во периодот се остварени низа контакти и тие контакти ќе се продлабочуваат, а Македонија мора да го фати чекорот со промените кои се случуваат во светот. Тој посебно се осврна на Минхенската безбедносна конференција и говорот на американскиот потпретседател Венс, за кој оцени дека е историски.

„Според мене, говорот на потпретседателот Џеј Ди Венс беше инспиративен историски говор. Сакале ние да признаеме или не, тој говор, а и настаните кои следат, ќе го сменат светот. Дали на некој тоа му се допаѓа или не му се допаѓа, дали тие промени ќе бидат по теркот на очекувањата на поединци или не, не знам, но останува фактот дека светот се менува. Новата американска администрација е предводник на тие промени. Наеднаш немаме офанзивна реторика во светот, без разлика дали станува збор за Украина, Израел, Газа, Блискиот Исток, други конфликти, гледаме дека реториката која сите сега ја прифаќаат и која е предвесник на тие промени, е мир. Така не беше до пред неколку месеци“, рече Мицкоски и посочи дека предолго време светот е заложник на двојни стандарди и на правилото, големите прават што можат, а малите што мораат, бидејќи долго време поединци беа безгласни и молчеливи, чекајќи милост.

Мицкоски истакна дека потпретседателот Венс на Минхенската конференција на многу едноставен начин кажа дека не можеме да зборуваме за заеднички споделени вредности кога има двојни стандарди.

„Нас ни е потребно еднаш за секогаш да се соочиме за вистината и со реалноста, да најдеме решение и да одиме напред. Тоа беше главната порака која ја кажа и според мене, оваа година Минхенската конференција беше токму таква. Понатаму да зборуваме отворено, следниот ден присуствував на обраќањето на претседателот на Украина, Володимир Зеленски, кој многу точно и прецизно рече, “да формираме заеднички безбедносни воени сили кои што ќе ја штитат границата на источното крило на Европа“. Не слушнав некој од публиката да рече ние даваме 10 илјадни војници. Никој не рече, ниту пак тие што претходниот ден негодуваа на реториката на потпретседателот Венс. Ниту пак кога зборувавме за обединување на Европа, не слушнав некој да рече во ред, Европа ги отвора вратите. Не мора ние Македонија, еве ние имаме билатерални проблеми, еве на Украина да ѝ речеа повелете дојдете ве примаме сега во моментот“, рече Мицкоски и дополни: „светот се менува и ние мора да го фатиме чекорот со тоа како малку броен народ“.

Министерот за надворешни работи и надворешна трговија, Тимчо Муцунски, денеска на средба ја прими амбасадорката на Кралството Холандија во Република Северна Македонија, Узлем Џанел.

На средбата беа потврдени одличните билатерални односи меѓу двете земји, кои се темелат на пријателство, доверба и заеднички вредности. Муцунски се заблагодари за принципиелната и континуирана поддршка од Холандија за евроинтеграциите на државата и ја нагласи посветеноста на Владата во спроведување на реформите неопходни за напредок во овој процес.

Како НАТО сојузници, соговорниците ја поздравија соработката меѓу двете земји во рамките на Алијансата и ја потврдија подготвеноста за натамошна координација во пресрет на претстојниот Самит на НАТО, кој ќе се одржи во јуни 2025 година во Хаг, Холандија. Во разговорите беа разменети мислења за актуелните меѓународни и регионални предизвици, како и за зајакнување на соработката во мултилатералните формати, со цел зачувување на безбедноста и стабилноста на европскиот континент.

„Првиот повик е завршен, вториот повик е во тек, проектите во вредност од 6 милијарди денари веќе до општините се пренесени по различни програми, дел од општините ги завршија тендерските постапки и почнуваат со реализација на тие проекти“, вели Христијан Мицкоски, претседател на Владата одговарајќи на денешната седница за пратенички прашања.

Мицкоски вели дека не може во 21 век да се зборува за вештачка интелигенција, а граѓаните да немаат пристојни услови за живот.

„Огромен е интересот на граѓаните и буквално има состојба каде што излегуваат од куќите да се заблагодарат, бидејќи ниту имале канализација, ниту имале асфалт, дел од нив ниту вода имале. Сега добиваат основни услови за живот. Тоа е она кое што секоја Влада и локална самоуправа треба да го обезбеди, луѓето да имаат основни услови за живот“, дециден е тој.

„Не може во 21 век ние да зборуваме за вештачка интелигенција, за напредна технологија, а дома имаме примери каде што луѓето газат кал, при првиот дожд се поплавени дома и немаат вода за пиење“, рече премиерот.

Мицкоски додаде дека овој проект бил потребен и според информациите кои што ги има, до сега во вториот повик имаат аплицирано 34 општини или вкупно 179 проекти.

„Ова беше потребно, да инвестираме во капитални проекти за да ги подобриме условите за живот на нашите сограѓани. Заклучно вчерашниот ден имаме 34 општини кои што поднеле предлог проекти за финансирање кои ќе бидат дел од вториот повик, таа бројка беше 179 проекти“, истакна Мицкоски и додаде:

„Со овие 15 милијарди денари кои се обезбедени на различни потпрограми во буџетот на различни министерства, ние доаѓаме до 21 милијарда денари само од овој проект, плус дополнителни програми кои си ги имаат министерствата“.