Македонија
Димитриевски од Охрид: Венко, за што ќе ја користиш златната виза од Дубаи, со една нога надвор не се станува водач

На средбата со граѓани, членови и симпатизери на Движење ЗНАМ за Наша
Македонија во Охрид, претседателот на ЗНАМ, Максим Димитриевски оцени
дека СДСМ е структура која ја изгубила врската со реалноста и денес
опстојува само преку фабрикувани скандали и ПР-трикови.
Оттука тој директно се обрати до Венко Филипче:
„Венко, за што ќе ја искористиш ’златната виза’ од Дубаи која призна
дека ја поседуваш? Човек кој добил можност трајно да се исели од
државата, не може да биде партиски лидер. Со една нога надвор од
Македонија, со мисла за бегство наместо за обнова – не се станува водач
на народ. Златна виза во џеб значи златна резерва за бегство – а не
визија за иднината на нашата татковина.“
Претседателот на ЗНАМ упати силен повик до членовите на СДСМ:
„Ги повикувам сите искрени, чесни и достоинствени членови на СДСМ – оние
кои сè уште веруваат во идејата за правда, еднаквост и општество за
сите, да станат дел од вистинската промена.
Доста беше да гледате како Вашата партија се претвора во празна обвивка
водена од лични амбиции и привилегии. Знаеме дека има луѓе меѓу вас кои
не се сложуваат со тивката капитулација пред елитизмот и корупцијата.
Време е да кажете „доста е“ и да се приклучите на движење што не ги
купува идеалите – туку ги живее.
Ова е повик до Вашата совест. Не заради нас – туку заради иднината на
оваа земја. ЗНАМ не прави разлика меѓу левица и десница – туку меѓу оние
што сакаат Македонија да успее и оние што ја користат како заложник за
лична корист. Вие, вистинските социјалдемократи, знаете што значи борба
за правда, знаете што значи солидарност. Тоа што го браневте некогаш,
денес го гуши актуелното раководство. Време е да застанете од правата
страна на историјата – за народот, а не за фотелјите.“
На теренските средби доминираа теми што вистински ги засегаат граѓаните
– блокирани инвестиции, нефункционално јавно здравство, масовното
иселување на младите, непотизам и институционална парализа.
Движењето ЗНАМ ќе продолжи со теренски средби низ целата држава.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Петрушевски: Струјата со СДС се зголеми затоа што фирми блиски до Заев и Филипче препродавале јаглен на ЕСМ за три пати поскапо од набавното

Венко Филипче трет ден молчи за испумпувањето на десетици милиони евра од ЕСМ од страна на Вице Заев и фирми кои водат и лично до него. Истражувањето на истражувачките новинари, кои го објавија овој скандал всушност покажува зошто ЕСМ е доведена во состојба на милионски долгови, изјави Бране Петрушевски, пратеник на ВМРО-ДПМНЕ.
„Вице Заев, Зоран Заев и Венко Филипче се директно виновни што струјата во нивно време се покачи за над 50%. Заев и Филипче се директно виновни што немало инвестиции во енергетиката, а немало за да има повеќе пари за во нивните џебови. За да може да профитираат Зоран Заев, Вице Заев и Венко Филипче, биле направени мрежа на фирми и посредници за ископ, транспорт и продажба на јаглен од Грција на ЕСМ. Јагленот кој од Грција се продавал кон мрежата на фирми за 30 евра бил препродаван во Македонија на ЕСМ по цена и до 82.5 евра“, рече тој.
Петрушевски обвини дека Заеви продавале скап јаглен на ЕСМ, а Филипче уживал во придобивките на милионските бизниси низ разни луксузи кои што му ги приуштувале.
„Овој скандал и афера од размери од неколку стотици милиони евра мора да има разрешница и одговорност. Очекуваме ЈО да отвори истрага, а Венко Филипче да излезе и да каже со кое лице излегува повторно во политиката и бара гласови од народот кој тој и Заев го краделе со стотици милиони евра“, рече Петрушевски.
Македонија
(Видео) Илиевски: Дали Мицкоски го штити изворот на пиротехниката што го предизвика пожарот во Кочани?

Зошто во ниту еден момент ниту обвинителот Коцевски, ниту министерот за внатрешни Тошковски, ниту премиерот Мицкоски не се осудија да го коментираат потеклото на пиротехниката која го предизвика пожарот во дискотеката Пулс кој зема 62 млади животи, а повредени беа 200 млади луѓе, праша Методија Илиевски, потпретседателот на СДСМ.
„Зошто истрагата досега не доведе до сознание кој ја внел пиротехниката во клубот? Зошто МВР на Тошковски досега не испита кој нелегално во Македонија шверцува пиротехнички средства и како пиротехнички средства завршиле во дискотеката Пулс кобната вечер? Дали доколку се дознае потеклото на пиротехниката истрагата ќе дојде до најблискиот периметар на луѓе околу премиерот? СДСМ прашува дали постои пријава во обвинителството дека потеклото на пиротехниката во дискотеката Пулс е од фирма блиска на најтесното опкружување на Мицкоски?“, праша тој.
Според Илиевски, сопственик и одговорно лиценца на фирмата е лице од блиското опкружување на Мицкоски од Струмица.
„Дали оваа компанија била задолжена за организација на партиските митинзи на ВМРО-ДПМНЕ? Дали ова е причината поради која Христијан Мицкоски ја попречува истрагата на обвинителството и не дозволува истата да го има правилниот тек?“, праша Илиевски.
Тој рече дека СДСМ нема да дозволи одговорните за пожарот во Пулс во кој животот го загубија 62 млади лица, а 200 беа повредени да останат неказнети.
Македонија
Огромен објект никнува во Охридската чаршија, секој прави што сака, алармира Охрид СОС

Чаршијата во Охрид го губи својот лик. Иако е дел од Старото градско јадро, за кое важи посебен закон, односно Закон за прогласување на Старото градско јадро на Охрид за културно наследство од особено значење, чаршијата е препуштена на стихијата и тука секој прави она што сака, без никаква регулатива, алармираат од Граѓанската иницијатива Охрид СОС.
„Ако некогаш важеше за специфичен дел на градот, исполнет со занаетчиски дуќани и стари градби, денеска оваа улица скоро сосема го изгубила својот лик и значење. Иако е дел од Старото градско јадро, за кое важи посебен закон, односно Закон за прогласување на Старото градско јадро на Охрид за културно наследство од особено значење, чаршијата е препуштена на стихијата и тука секој прави она што сака, без никаква регулатива. На прстите од една рака се бројат старите градби кои му одолеваат на времето. Денеска тука доминираат ресторани и угостителски објекти кои ја окупирале улицата и за минувачите и велосипедистите оставиле само еден тесен премин. И наместо институциите да диктираат што и како може да се гради, сведоци сме изминативе децении дека тука веќе почнаа да се градат високи објекти со нетипичен стил. Не се применува нити онаа омилена за Завод за заштита на спомениците на културата и Музеј-Охрид факсимилна реконструкција“, велат од таму.
Додека „стручната фела“ замижува и се прави наудрена, велат од Охрид СОС, деновиве кон крајот на чаршијата се подигнува еден огромен објект, кој според обемот и големината отскокнува од околните објекти.
„Минатата година, за да започнат градежни работи на овој дел, службите на Општина Охрид исекоа неколку децениски стебла, а од механизацијата е оштетено и партерното уредување. Но ништо од тоа не е важно, ако се знае дека институциите на прво место го ставаат интересот на поединците, наместо јавниот интерес. Објектот е видлив и од страната на паркингот. Додека се предлага градот да формира стручно тело кое ќе комуницира со УНЕСКО, „еден Борд кој ќе го сочинуваат архитекти и други професионалци“ неповратно го губиме културното наследство и специфичните градски четврти“, алармираат од Охрид СОС.