Македонија
Димитров и холандскиот амбасадор Дирк Јан Коп разговараа за билатералната соработка
Заменик-претседателот на Владата задолжен за европски прашања, Никола Димитров, денеска оствари средба со амбасадорот на Кралството Холандија во земјава, Дирк Јан Коп, на којашто разговараа за билатералната соработка, со акцент на заедничките проекти во светло на исполнувањето на европската агенда на Северна Македонија во периодот што следи.
„Владеењето на правото и доброто владеење, институционалното зајакнување во контекст на капацитетите и ефикасноста, се заштитен знак на Холандија, еден од моделите на земјите членки на Унијата кон кои стремиме. Стремежот е дофатлив токму преку евроинтегративниот процес чија задача е усогласување не само со легислативата, туку и со европскиот стандард и подобрени услови за живот на македонските граѓани“, рече Димитров.
Во овој контекст вицепремиерот Димитров изрази задоволство од меѓусебната соработка во рамки на програмата МАТРА особено важна со оглед на нејзиниот фокус во областите на владеење на правото, добро управување и демократија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Лога: Ако играат чесно, ВМРО-ДПМНЕ нека го вратат уставното име, не очекува тежок период
Ако играат чесно, ВМРО-ДПМНЕ нека го вратат уставното име во првите денови. Ги имаат бројките со другите партии, вели министерот за правда, Кренар Лога.
„Штом ВМРО-ДПМНЕ формира 2/3 мнозинство во Собранието, со помош на пратениците на ВЛЕН, ЗНАМ и Левица, нека повелат во Собранието и со уставни измени нека го вратат старото име на државата. Не очекува тежок период.
Се чини дека е стратегија на ВМРО-ДПМНЕ – забораваат дека сега имаат одговорност и нема друга кампања. ВМРО има добиено голема поддршка од граѓаните и се чини дека се што е кажано во кампања е голема лага“, додаде Лога.
Претходно министерот кажа дека непочитувањето на уставното име на државата ја прави ништовна заклетвата на Гордана Силјановска-Давкова.
Македонија
Силјановска се сретна со италијанскиот амбасадор Силвестри
Претседателката Гордана Силјановска-Давкова денеска го прими амбасадорот на Италијанската Република, Андреа Силвестри.
На средбата амбасадорот Силвестри ѝ честита на изборот на претседателката Силјановска-Давкова и ѝ посака успешно извршување на претседателската функција.
Силјановска-Давкова истакна дека двете земји имаат традиционално пријателски односи и изрази силна подготвеност за натамошно унапредување на политичкиот дијалог и интензивирање на севкупните билатерални односи со Италија преку засилување на постојните и изнаоѓање нови можности за соработка.
На средбата беа разменети мислења за текот и натамошните чекори во однос на евроинтеграциите на земјата, при што претседателката истакна дека ќе се залага за широк општествен консензус во однос на приспособување на македонското со европското законодавство со цел доследно исполнување на реформските процеси и зголемување на кредибилитетот на процесот на проширување на Европската Унија.
Претседателката изрази благодарност за досегашната улога и пристап на Италија во поддршката за целиот регион во врска со процесот на европските интеграции и укажа на позитивниот однос на официјален Рим при надминување на споровите со своите соседи при приемот на нови членки во Унијата.
Македонската претседателка Гордана Силјановска-Давкова изрази надеж дека Италија и во иднина принципиелно ќе ја поддржува земјава во мериторниот процес на исполнување на европските критериуми, со цел забрзана интеграција на земјата во ЕУ, што претставува заеднички интерес за поширокиот регион.
Македонија
Демири пред заминување го разреши директорот Петровски од Токсикологија, но не и Илјази, од која се жалеа вработените
Министерот за здравство Илир Демири го разреши медицинскиот директор на Токсикологија, Данил Петревски.
Вработените на Клиниката соопштија дека Петровски, кој во моментот користи годишен одмор, е разрешен иако повеќето поплаки се однесуваа на економската директорка Бесија Илјази.
Вработените тврдат дека Илјази, спротивно на решението на ДСЗИ, кое изречно забранува присуство на невработени лица на Клиниката, ги поттикнува да доаѓаат на работа сите оние на кои им е истечен договорот на дело на 31 декември минатата година.
Вработените укажуваат дека разрешувањето на медицинскиот директор е за т.н. говор на омраза на етничка основа, што вработените го отфрлаат како невистинит, неоснован и недокажлив. Тврдат дека е чиста шпекулација, нарачана од поединци и реализирана преку новинар, кој во 2 часот по полноќ си дава право да упаѓа на клиниката.
Понатаму, како што се додава, и покрај напорите на вработените и членовите на Управниот одбор на клиниката за изнаоѓање модул за правилно функционирање на токсиколошката лабоработирија, тоа не е реализирано поради несоработка со организациската директорка.
Според вработените, разрешувањето на Петровски укажува на напорите за политички вработувања на договор на дело, иако е незаконски до формирањето на новата влада.
Пред речиси еден месец на прес-конференција доктори од Клиниката за токсикологија објавија дека економската директорка Илјази не дозволува вработување на двајца дипломирани биолози и еден болничар. Наместо, тоа, таа инсистира да се вработат осумнаесетмина на кои им истекле договорите за дело, а меѓу нив има лица што немаат соодветно образование.
Нико Беќаровски, кој е раководител на Одделението за интензивна нега на Клиниката, рече дека едниот од нив, болничар, вршел притисок врз лаборант – барал урина во која имало наркотици да биде сменета со урина која е чиста, ама лаборантот не прифатил.
За образованието на Илјази лекарите не знаат ништо, ниту за познавањето јазици, со оглед на тоа што македонскиот не го зборува, а Беќаровски тогаш рече дека се обидел да комуницира со неа на англиски јазик.
Министерот за здравство Илир Демири во истиот период го најави разрешувањето на медицинскиот директор на Клиниката за токсикологија, д-р Данил Петровски, но не и на економската директорка бидејќи, како што тогаш изјави, немал сознанија за прекршок. Беќаровски кусо подоцна навести дека ќе си замине од Клиниката за токсикологија порачувајќи дека е време на приватните клиники да се отвори одделение за детоксикација и клиничка токсикологија.