Демократскиот сојуз не го поддржува Законот за добивање правен статус на бесправно изградени објекти и бараме претседателот Стево Пендаровски да не го потпишува законот со што ќе се спречи беззаконието во државата и да се привилегираат оние кои ги кршат законите и се директно одговорни за градежниот хаос, потенцираат од оваа партија.

Според нив, постојат објекти изградени во заштитени зони, што е спротивно на деталните урбанистички планови и објекти кои ја попречуваат реализацијата на урбанистичките планови.

„Ставањето во нерамноправна положба на граѓаните е спротивно на принципот на владеење на правото и еднаквост на граѓаните пред законите. Чесните граѓани подготвуваат проекти, бараат дозволи за градба, плаќаат комуналии и ги почитуваат сите прописи. Додека оние што градат бесправно и узурпираат земјиште, диво се приклучуваат на водоводните мрежи, електричната енергија, ги кршат сообраќајните решенија и слично, не смеат да бидат и натаму мотивирани и лош пример за во иднина“, реагираат од ДС.

Демократскиот сојуз има разбирање за социјалните аспекти, но никако не се за градежен хаос и легализација на хациенди, деловни објекти, куќи со базени итн, децидни се од оваа партија.

Пратениците на ВМРО-ДПМНЕ со своето деструктивно дејствување во Собранието продолжуваат да нанесуваат директна штета на граѓаните и државата. ВМРО-ДПМНЕ ги блокира измените и дополнувањата на Законот за служба во Армијата со 2.000 амандмани, истакнуваат од владејачката СДСМ.

Со оваа блокада, како што велат од таму, ВМРО-ДПМНЕ покажува дека е против олеснување на условите за пензионирање, против отпремнини за припадниците на Армијата.

„ВМРО-ДПМНЕ се противи војниците, луѓе кои се заштитници на татковината, кои се подготвени да го дадат својот живот, кои за целото времетраење на пандемијата со коронавирусот се дел од првите борбени редови, да имаат право на избор, се противи војниците да имаат можност да добијат и 20.000 евра отпремнина по навршување на 45 години возраст, ВМРО-ДПМНЕ е против дополнителните поволности при пензионирање. ВМРО-ДПМНЕ не ја поддржува можноста за стипендирање на дефицитарните кадри во Армијата и натамошно јакнење на капацитетите на Армијата. Партијата предводена од Христијан Мицкоски глуми лажен патриотизам, партија која не го честиташе членството во НАТО, партија која опструираше значајни процеси во одбраната“, реагираат од СДСМ.

Според нив, ВМРО-ДПМНЕ е истата партија која за целото 11-годишно режимско и деструктивно владеење недоволно вложуваше во одбранбениот сектор, партија чии погубни политики, според СДСМ, ја девалвираа Армијата.

Опозициската ВМРО-ДПМНЕ оценува дека Македонија е без почеток на преговорите со ЕУ. Од таму велат дека политиката на Заев доживеала дебакл.

„Заев ветуваше почеток на преговорите со ЕУ, две години тие само што не почнале, а лажеше дека и поглавја се отвораат. Политиката на Заев е една огромна лага и погазување на државата. Заев го погази идентитетот. Тој тврдеше дека македонскиот и бугарскиот народ се едно исто, дека имаат заедничка историја и дека македонската историја почнува по 1945 година. Сѐ што можеше да се осквернави, Заев го осквернави. Сакаше и тргуваше со јазикот, идентитетот и историјата“, реагираат од ВМРО-ДПМНЕ.

Позициите на Македонија се темелно нарушени, додаваат од опозициската партија и, според нив, за таквата ситуација виновен е лично Заев.

„Понижувањето на државата е плод на политиката на свиткан грб на Зоран Заев. Попусти се сега сите обиди да се вади од калта. Наместо тоа, потребна е оставка веднаш. Сите политики на Заев се поразени“, посочуваат од ВМРО-ДПМНЕ.