По којзнае којпат ВМРО-ДПМНЕ покажа дека е криминална и антидржавна партија преку нeјзиниот последен обид да издејствуваат ЕУ да не ѝ додели датум за почеток на преговори на Северна Македонија, истакна на денешната прес-конференција портпаролот на СДСМ, Костадин Костадинов.

„Партијата на Мицкоски на средби моли меѓународни претставници и европратеници да не се додели датумот за преговори затоа што нивната режимско-криминална матрица е така кодирана да ја уништува државата, да ѝ ја блокира европската иднина и повторно да ја окупира“, посочи партискиот портпарол.

Ваквите постапки Костадинов ги оцени како антиевропски, антидржавни и антизападни.

„Крајната цел на ВМРО-ДПМНЕ е Северна Македонија никогаш да не стане членка на НАТО и на ЕУ само за да си го спасат криминалот и одговорноста за тоа што ја покрадоа државата“, кажа тој и додаде дека СДСМ останува посветена на реализација на стратешките интереси на државата.

Законот за Јавно обвинителство е гаранција за воспоставување правна држава и како партија тврдиме дека со законот нема никаква скриена амнестија, порача на денешната прес-конференција портпаролот на СДСМ, Костадин Костадинов.

Тој истакна дека Законот за Jавно обвинителство е ефикасен и применлив против сите кои сториле криминал.

„Продолжуваат предметите на СЈО кои се во фаза на судско постапување и нема законска пречка да им се суди на партиските криминалци од редовите на ВМРО ДПМНЕ. Затоа го повикуваме судот да престане со бескрајното одложување на процесите и конечно да создаде услови за секојдневни судења. Продолжуваат истрагите и предистрагите на СЈО кои беа запрени со mислењето на Врховниот суд, иницирано од судијата Јово Вангеловски, кој важеше за судски заштитник на криминалот на ВМРО-ДПМНЕ“, нагласи партискиот портпарол додавајќи дека ВМРО-ДПМНЕ не сака да се соочи со фактите затоа што целото нивно постоење и функционирање почива врз криминал и корупција.

Изминатите години успеавме да создадеме можност за вработување на околу 25.000 административни службеници Албанци и ја зголемивме правичната застапеност од 2 во над 20%, изјави на прес-конференција Адем Авзиу од ДУИ.

Тој порача дека грижата за административните службеници продолжува со законските измени, со кои се олеснува можноста за унапредување и признавање на високото образование за административните службеници вработени со средно образование, кои во меѓувреме завршиле факултет.

„Секој административен службеник кој две години е на работно место на исто ниво и имајќи ја предвид и последната просечна оценка при оценувањето, ќе може да премине од пониската во повисока позиција на тоа работно место“, објасни Авзиу.

Тој нагласи дека почнувајќи од 1 декември годинава, административните службеници ќе имаат можност да поднесат барање до раководителите на институциите, за обезбедување на вреднување на адекватното ниво на образованието во основната компонента на плата.