Претседателот на Унијата на европските федералисти на Македонија – УЕФМ и промотор на Македонскиот концепт, Петар Богојески, имаше средба со шефот на делегацијата на ЕУ, Дејвид Гир.

Од Македонскиот концепт информираа дека на средбата се разговарало за европската перспектива на Македонија во пресрет на новите предизвици, особено појавата на засилен европесимизам кај младите.

„Македонија не е сама на патот кон ЕУ. Портите за интеграција се широко отворени, а билатералните проблеми ќе се разрешат во духот на европските вредности“, е заклучокот од средбата.

УЕФМ е партнер на ЕУ во промоција на можностите за образование на младите во земјите на ЕУ.

Демократскиот сојуз на првиот ден од почетокот на пописот ги повикува Македонците што живеат во дијаспората, а имаат македонско државјанство, матичен број и адреса во Македонија, да ја искористат можноста што им се нуди со Законот за пописот и масовно да се попишат преку онлајн-апликацијата во периодот од 1 март до 31 март оваа година.

Од партијата велат дека попишувањето на Македонците што живеат на сите континенти е од исклучителна важност за добивање вистинска слика за етничкото потекло на сите македонски државјани.

„Демократскиот сојуз предупредува дека отпорот против попишувањето и тивкиот бојкот што се заговара од некои политички партии во Македонија може да произведе неверодостојни податоци за бројот на етничките Македонци и да го доведе македонскиот народ во нерамноправна положба во сопствената држава. Истовремено, ги повикуваме и роднините на нашите Македонци иселеници, што живеат во Македонија, да ги потсетат своите блиски на оваа обврска и да им го објаснат значењето на пописот и попишувањето“, се наведува во соопштението.

Петре Шилегов нема направено ниту еден проект. Нема тунел под Калето, нема нови булевари, освен булеварите што што му ги остави Коце Трајановски, само менува имиња на улици, а Заев ќе го кандидира пак, велат од советничката група на ВМРО-ДПМНЕ во Град Скопје.

Според нив, Шилегов е најнеуспешниот градоначалник на Скопје и со самиот факт што за Заев е фаворит, тоа уште еднаш потврдува дека целото работење на Шилегов е по насока на Заев, а тоа е целосна неработа и раздавање тендери.

„Шилегов не оствари ниту 10 % од својата изборна програма. Нема никакви резултати од областа на екологијата, борбата против загадувањето и комуналната хигиена. Скопје за овие 4 години стана еден од најзагадените градови во светот. 4 години ‘Вардариште’ е дива депонија и проблем за Аеродром и Гази Баба. Диви депонии има насекаде во околината на Скопје и во самиот град. Мерните станици на загаденоста на воздухот често покажуваат и по 10 и 20 пати зголемена канцерогеност на воздухот“, велат советниците од ВМРО-ДПМНЕ.

Тие обвинија дека Шилегов не се грижи за зеленилото, граѓаните немаат доволно вода за пиење, а нема ни инфраструктурни проекти.

„Шилегов вети и не ја направи Универзалната сала. Шилегов вети и не направи забавен парк. Шилегов вети и не направи тунел под Калето. Шилегов вети и не направи нови мостови и булевари. Петре Шилегов ќе остане само познат по потрошените 100.000 евра за новогодишна журка, ливадата на плоштадот Македонија, продажбата на градската куќа, обезличување на Скопје и како најнекултурен градоначалник на Скопје, кој ги навредува сите неистомисленици со многу погрдни зборови“, велат од советничка група на ВМРО-ДПМНЕ во Град Скопје.