Скриен зад своите партиски портпароли, во прескапата бела палата, Мицкоски повторно се обидува да маневрира и да го избегнува повикот на јавна ТВ-дебата пред македонскиот народ со претседателот на Обединети за Македонија, Љубе Бошкоски, велат од партијата и обвинија дека Мицкоски продолжува со лицемерно однесување.

„Го разбираме стравот поради недостиг на факти, па затоа да го потсетиме дека во периодот меѓу 2017 и 2019 година имаме 741 милиони евра странски директни инвестиции. Ова е рекорд на странски инвестиции во Македонија во споредба со периодот од 2013 до 2015, кога имаше 457 милиони евра, а во периодот од 2015 до 2017 – 555 милиони евра странски директни инвестиции. Според Светската трговска организација, учеството на странски инвестиции во домашниот бруто-производ во 2018 е 5,8 %, за разлика од 2012 година, кога е 1,5 %“, велат од ОМ.

Ако толку го интересира господинот Мицкоски кои фирми се донесени во периодот додека претседателот на Обединети за Македонија, Љубе Бошкоски, е советник, додаваат од партијата, нека ја прифати фрлената ракавица, нека се охрабри и појави на ТВ-дебата, а не да се крие зад партиски портпароли и да се служи со ниски престрелки.

Неодговорното однесување на ВМРО-ДПМНЕ го кочеше опремувањето на болниците, го кочеше и носењето нови мерки за заштита од коронавирусот, обвини СДСМ.

„Опозициската ВМРО-ДПМНЕ од почетокот на пандемијата на коронавирусот глуми дека се грижи за здравјето на граѓаните, се однесува неконструктивно, прави опструкции и ги критикува и кочи сите напори за справување со најголемата здравствена и економска криза што го зафати целиот свет. Ако на ВМРО-ДПМНЕ ѝ беше важно здравјето на граѓаните, немаше со недели да го кочи донесувањето на новите мерки за превенција на ширењето на смртоносниот вирус. Со одолжување на мерките, кои се исти и слични како во голем број држави, ВМРО-ДПМНЕ го загрози здравјето на сите граѓани. Ако на Христијан Мицкоски и на ВМРО-ДПМНЕ им беше важно здравјето на граѓаните, немаше преку заменик-министерката за финансии во техничката влада да го кочат заемот од Светската банка за опремување на болниците. Да не беа нивните блокади, досега болниците ќе беа подобро опремени и подготвени за есенскиот бран“, велат од СДСМ.

Лицемерниот Мицкоски, додаваат од партијата, глуми загриженост за здравјето на граѓаните, а постојано организира јавни собири, кои се опасни за јавното здравје и на кои масовно се кршат мерките за заштита од коронавирусот.

„Губитникот Мицкоски и ВМРО-ДПМНЕ го доведуваат во опасност јавното здравје и не нудат конкретни решенија за надминување на здравствената криза. Граѓаните знаат дека ВМРО-ДПМНЕ не им нуди ништо, освен режим, заштита на криминалот, шпекулации и невистини и затоа ги казнија во три последователни изборни циклуси. Затоа, ВМРО-ДПМНЕ уште долго ќе остане во опозиција“, се наведува во соопштението.

ВМРО-ДПМНЕ бара Комисијата за заразни болести и министерот за здравство, Венко Филипче, да си дадат оставки.

„Македонија со Венко Филипче на чело на здравството соборува негативни рекорди. Бројката од 870 заболени за само еден ден е директно негова вина. Филипче преспа цело лето, иако знаеше дека доаѓа есенски бран на Ковис-19 не се подготви. Бројот на починати е исто така алармантен, 14 вчера, а веќе неколку дена бројката е двоцифрена. Болничките капацитети се исполнети, Филипче цело лето не направи ниту една болничка просторија повеќе. Вакцини против сезонскк грип нема. Хронично болните се на удар“, велат од партијата.

Според ВМРО-ДПМНЕ, медицинскиот персонал не е целосно обучен и иако можело да се примени систем на ротација, тоа не се направило.

„Венко Филипче не направи ништо со што ќе го спречи енормното ширење на заразата. Дополнително, проблем е и загадувањето за кое власта 4 години нема решение иако тврдеа дека ќе го решат проблемот со загадениот воздух веднаш кога ќе дојдат на власт, 4 години потоа воздухот е позагаден од кога било претходно. Комбинацијата од загадениот воздух и Ковид-19 влијае фатално за лицата со хронични болести, а проблем е и за трудниците, затоа ВМРО-ДПМНЕ бара нивно ослободување од работа. Здравјето и животот на граѓаните нема цена. Филипче, покажи минимум емпатија со народот и дај си оставка“, велат од ВМРО-ДПМНЕ.