Седуммина полицијаци блиски до Наќе Чулев и Христијан Мицкоски синоќа ја прекршија забраната за јавни собири, посочи портпаролот на СДСМ, Костадин Костадинов.

Како што рече тој, наместо да го обезбедуват почитувањето на мерките и задолженијата, полицајците на Чулев директно ја прекршиле забраната.

„Еве, фотографија на ‘домаќинот’ на забавата сликан во пријателска атмосфера со Мицкоски и со Игор Јанушев“, посочи Костадинов и додаде дека јавноста била сведок и на друго прекршување на забраната за собири од страна на припадници на МВР, во Крушево.

Како што рече партискиот портпарол, таму забраната ја прекршил заменик-командирот на полициската станица, Благојче Димсоски, за кој посочи дека е кадар на Наќе Чулев.

„Ваквите случаи директно ја поткопуваат довербата во полицијата и МВР. Наместо во обезбедување на почитување на мерките и задолженијата, Чулев злоупотреби полициски службеници за снимање на пропагандни спотови. Наместо ред и дисциплина, Чулев јавно кажа дека полицијата нема да ги казнува оние кои ги прекршуваат забраните“, истакна Костадинов и додаде дека ВМРО-ДПМНЕ освен по терористичкиот напад на крвавиот четврток ќе остане обележана и како партија која направила здравствен пуч.

Неспособноста на надлежните и владејачката структура да воспостават соодветен систем за заштита на здравјето на граѓаните доведе до тоа Македонија да е на врвот по црниот биланс во однос на коронавирусот, изјави на прес-конференција Боро Илиевски од ВМРО-ДПМНЕ.

Според него, Зоран Заев докажал дека здравјето на граѓаните ниту му е приоритет, ниту го интересира.

„Тој зборува само за избори и тера кампања додека раководството на неговата партија или е инфицирано или е во самоизолација“, рече претставникот на ВМРО-ДПМНЕ кој додаде дека владејачкиот  СДСМ станува носител на Ковид-19 во државава.

Според Илиевски ситуацијата е алармантна, а Македонија го доживува вториот пик на коронавирусот, кој првично беше најавуван за наесен.

Поради неодговорноста и неспособноста на Петре Шилегов, во Скопје се случува сериозна хаварија, велат од Советничка група на ВМРО-ДПМНЕ во Советот на Град Скопје.

„Секој ден стотици скопјани чекаат ред по неколку часа за субвенции на велосипеди и тротинети во услови кога се случува најсилниот пик на заразата со корона“, се наведува во соопштението.

Од Советничката група на ВМРО ДПМНЕ сметаат дека субвенциите за тротинети и велосипеди се корисен проект, но, според нив, максимално штетен е хаосот со начинот на аплицирање и колоните редици.

„Во 21 век Шилегов наместо да овозможи аплицирање по електронски пат, тој го строи народот во колони и редици директно изложувајќи го на закана на коронавирусот. Шилегов со редиците од неколку стотина метри и хаосот со субвенциите ризикува Скопје да стане нов корона-кластер“, се нагласува во соопштението во кое Советничката група бара веднаш да се смени начинот на аплицирање и документите да можат да се достават по електронски пат или по пошта.