Власта на Заев во овие три години чекори во тактот на криминалот, корупцијата и рекетот, се наведува во соопштение од ВМРО-ДПМНЕ.

Од таму порачуваат дека со Заев нема европска иднина за Македонија затоа што, како што велат, тој е заштитник на организираниот криминал и капо ди тути капи на сите рекетарски мрежи.

„Веќе е јасно како ден. Јавноста виде и слушна дека со правдата се тргувало во замена за милиони евра со амин на Заев. Милиони евра биле рекетирани и префрлани со торби, кои, според сведоштвото, завршувале кај Заев. Контроверзен проруски бизнисмен правел дилови со Владата на Заев и за таа цел исплатил 300 илјади евра. Ден Дончев е еден од првите соработници на Заев, кој го виде целата јавност како става снопчиња со пари во својата торба. Слушнавме сведоштво дека рекетари палеле возила на неистомисленици по наредба на Вице Заев. Слушнавме како се договарале трас-трас одлуки и како се диктирале решенија на истражните органи директно од страна на Заев“, стои во партиското соопштение, во кое се додава дека поради Заев, Македонија е хибриден режим и на врвот на листата по корупција.

Од ВМРО-ДПМНЕ се уверени дека народот ќе го казни Заев на 15 јули.

„Обновата ќе значи европеизација на Македонија, напредок, но, пред сè, одговорност пред законите на сите, вклучително и за Зоран Заев“, порачуваат од партијата.

Европските зелени даваат силна поддршка на сестринската партија ДОМ и нејзините зелени политики за претстојните парламентарни избори, објавија од партијата Демократска обнова на Македонија.

„Во пресрет на изборите копретседателите на европските зелени, Евелин Хојтебрук и Томас Вајтц, се обратија до македонските граѓани. Европратеникот Вајтц истакна дека европските зелени се залагаат нашата земја што побргу да ги почне пристапните преговори со ЕУ“, се наведува во партиското соопштение.

Во него се додава дека европските зелени ја ценат посветеноста на ДОМ во борбата за заштита на животната средина и климата, за социјална правда и еднакви можности за сите.

„Тие ќе продолжат силно да ги поддржуваат ДОМ и Македонија во спроведувањето на зелените политики, како премин од јаглен кон обновливи извори на енергија, енергетска ефикасност, борба со загадувањето. Или како што во својата порака на македонски јазик истакнува Хојтебрук – ‘Иднината е зелена’“, нагласуваат од партијата.

Шекеринска не направи ништо од ветените капитални инвестиции од 600 километри нов автопат што ги ветуваше во 2016, велат во соопштение од ВМРО-ДПМНЕ.

Од таму и обвинуваат дека актуелната министерка за одбрана времето наместо за интересот на граѓаните, го трошела, како што велат, на седенки и состаноци со обвинетите и веќе осудени за случајот „Рекет“, токму во периодот кога се случувало тоа.

„Дали Шекеринска била консилиере и советодавач? Или можеби контролор на тоа до каде е целата операција? Логични се овие прашања, со оглед на тајните средби кои таа ги имала“, се наведува во партиското соопштение.

Во него се повикуваат граѓаните на 15 јули да стават крај на, како што се вели, свивањето ‘рбет и да одберат обнова за Македонија.