Актуелната пратеничка од Левица и кандидат за Градоначалник на Струга, Јована Мојсоска, обвини дека власта води црна кампања против Левица, токму затоа што, како што вели, Левица бележи раст и сѐ поголема поддршка од граѓаните.

„Токму преку Левица во изминатиот мандат беа поднесени бројни иницијативи до Советот на Општина Охрид. За жал, како што се случува и во Собранието поради теснопартиска суета, голем дел од нашите иницијативи беа одбиени и тука во Советот на општина Охрид“, изјави Мојсоска за време на народниот собир во Охрид викендов.

„На овие избори очекуваме дека Левица ќе порасне со бројот на советници и ќе биде фактор, без кој нема да може да се состави мнозинство во советот. На тој начин, единствено ние можеме да истуркаме повеќе проекти кои се дел од програмата на Левица и од интерес на граѓаните на Охрид“, додаде Мојсоска.

Според неа, додека власта води негативна кампања против Левица, на локално ниво, во Советот на Охрид, може да се види дека ВМРО-ДПМНЕ соработува со советниците од ДУИ.

„Додека власта води црна кампања против Левица, тука во советот на Охрид сведочиме како ДПМНЕ е во коалиција токму со советниците од ДУИ, ние сведочиме како градоначалникот Пецаков делеше тендери на локалните шерифи од ДУИ. Но, ваквата црна кампања покажува дека власта се плаши и само го докажува нашиот раст, кој мислам дека ќе кулминира и на овие локални избори“, рече таа.

Кандидатот за Градоначалник на општина Охрид од редовите на Социјалдемократскиот сојуз на Македонија, Асен Шајн, на вечерашната граѓанска трибина на која присуствуваше и лидерот на СДСМ, Венко Филипче, рече дека реалноста во Охрид е далеку од сликата која оваа општина ја заслужува и дека е време за промени и вистински проекти.

„Граѓаните се разочарани и со право. Многу се ветува, а ништо не се исполнува. Комуналниот развој е запоставен, градот е нечист, нема проекти, нема никаков развој. Младите заминуваат, економијата стагнира, а граѓаните живеат од денес за утре. Туризмот, кој треба да биде носечки столб на еден ваков туристички бисер, е сведен на неколку месеци хаос, а остатокот од годината живееме со истите и нерешени проблеми“, истакна Шајн.

Тој додаде дека Охрид станал лична своина на градежни инвеститори, кои со амин на локалната власт, на охриѓани приредија страшна урбана девастација.

„Штетата зазема непоправливи размери, ги загрозува природните и културните богатства и комплетно ја уништува околината. Дишеме загаден воздух, нема каде да паркираме, а јавните површини се уништени. Се навикнавме на сето она што не треба да биде нормално, нагласи кандидатот за градоначалник Шајн.

На граѓанската трибина на СДСМ во Охрид, Шајн истакна дека нема да зборува за минатото, туку за иднината, бидејќи заедно со кандидатите за советници има реални идеи, нов концепт и конкретен план.

„Урбанистичкото планирање ќе има нова димензија, ќе воведеме нови еколошки практики, а на крајбрежјето на Охридското Езеро, уредување, согласно препораките на УНЕСКО. Културата и спортот ќе добијат нова енергија, а туризмот ќе го градиме на одржливи темели, со грижа кон природата, историјата и локалните потреби“, истакна Шајн.

Нагласи дека инфраструктурата е негов приоритет и дека ќе води општина која нема да заборави никого.

„Секоја улица, секое мало, секое населено место ќе го добие потребното внимание. Ќе го слушаме гласот на месните и урбаните заедници, тие ќе бидат наш вистински партнер и сојузник во работата. Одлуките ќе се носат со народот, а не без него“, рече Шајн, додавајќи дека СДСМ е партија што досега покажала дека знае да инвестира во капитални проекти и трајни вредности.

Тој напомена дека е време е да се врати Охрид, на охриѓани и дека нема да бидат заборавени ниту социјалните семејства, пензионерите, лицата со попреченост, а за учениците вети дека ќе учат во модерни училници.

„Нашите ученици ќе се образуваат во модерни училници, а дечињата ќе добијат услови за згрижување по сите стандарди. Нашата цел е младите да ја гледаат својата иднина тука, во своето родно место“.

Увери дека тој и кандидатите за советници имаат капацитет и дека ќе работат чесно, домаќински, транспарентно и пред се, човечки, повикувајќи ги граѓаните на 19-ти октомври да ја дадат поддршката за него.

Генералниот секретар на ВМРО-ДПМНЕ, Ѓорѓија Сајкоски на денешниот митинг во Битола во рамките на изборната кампања за локалните избори 2025 година со слоган „Вистинскиот избор! Твојот човек! Твоето место! За твојата иднина!“ истакна:

„Сите имаме иста цел, да продолжи заедничката работа и во иднина со актуелниот, но и иден градоначалник на Битола, Тони Коњановски. Кога зборуваме за континуитет зборуваме за континуитет на проекти, работи. Затоа можеме да веруваме дека Коњановски ќе испорача дупло повеќе проекти од претходниот мандат“, кажа Сајкоски.

Сајкоски укажа дека во иднина дополнително во развојот на Битола ќе придонесе и Владата.

„Соработката на локалната власт со централната е многу важна тоа се виде од претходната година кога Владата ги поддржуваше проектите на општините, а претходно најде средства за тоа“, вели Сајкоски.

Според Сајкоски треба да се стави крај на оние кои се независни, а се зависни од мал број на луѓе.

„Затоа треба масовно да излеземе и да гласаме за Тони Коњановски и за советничката листа на ВМРО-ДПМНЕ. Една кандидатка бара поддршка од ДУИ. Патот го бираме ние и вие, а ние ќе го одбереме патот на проекти и работа. Затоа треба масовно да се излезе и да се гласа за континуитет кој подразбира работа“, заклучи Сајкоски.