Колективните права на Албанците зависат од бројките и тоа го вели Уставот, а, пак, Заев не е над највисокиот правен акт, реагира Алијансата за Албанците откако денеска премиерот Зоран Заев изјави дека пописот нема да влијае врз законот за употребата на јазиците или правата на Албанците.

„Премиерот Зоран Заев одамна го загуби допирот со реалноста и неговите изјави не само што не можат да се земат како точни, туку претставуваат вознемирувачки аларм за тајните планови на Владата на СДСМ-ДУИ“, велат од Алијансата.

Од партијата на Зијадин Села додаваат дека во меѓувреме, Артан Груби веќе докажал колку е лесно да се пазари на сметка на Албанците и тој најмалку има право да зборува за унапредување на правата.

„Ваквите изјави на двајцата владини лидери и лиферувањата со бројки дополнително предизвикаа сомнежи за тоа што се случува со пописот. Владата и Државниот завод за статистика мора итно да дадат оттчет и објаснување за тоа што се случува со страницата и базата на податоци за пописот, каква штета е направена од сајбер напаѓачите, дали е влијаено и над податоците од дијаспората и кој ќе биде одговорен за какво било мешање во бројките“, додава партијата.

ВМРО-ДПМНЕ продолжува со деструкции, блокади и кочења на важни законски измени, обвинуваат од СДСМ.

„Вчера на седницата на Комисијата за труд и социјална политика, ВМРО-ДПМНЕ го опструираше носењето на измените и дополнувањата на Законот за работни односи. Со овие измени кои треба да стапат на сила на први октомври, недела станува неработен ден за сите оние кои сакаат да бидат со своите семејства.

Наместо да работат за она што се платени, да им служат на граѓаните и државата, пратениците на ВМРО-ДПМНЕ на најподмолен начин ги злоупотребуваат чувствата на граѓаните, тераат политиканство заради лични и партиски интереси.

Со ваквиот однос јасно е дека им следува нов седми пораз од граѓаните, кои одново ќе ги поразат ваквите погубни и неодговорни политики на ВМРО-ДПМНЕ и неговите пратеници“, порачаа од владејачката партија.

ЈП „Водовод“ преку соопштенијата и прес-конференциите кои ги прават призна дека Душко Весковски сторил кривично дело и дека најпрвин ја реализирал реконструкцијата на водоводната мрежа на ул. Варшавска во месец август, па дури потоа на први октомври согласно документите коишто тие ги испратија како демант распишале тендер за да ја исплатат фирмата која го вршела градежниот зафат, соопшти ВМРО-ДПМНЕ.

„Душко Весковски прави сè за да го сокрие Шилегов. Еден во редицата докази дека Весковски и Шилегов направиле криминал е и барањето за надзор за изградбата на водоводната мрежа на од 24 јули 2020 година, односно неколку месеци пред да се распише тендерот за изградба.

Најголем доказ дека фирмата работи без тендер е тоа што јасно надзорот кажува дека нема договор со изведувачот. Надзорот исто така наведува дека на 20 август водоводот се завршува и потоа отпочнала со реконструкција на канализациската мрежа.

Весковски и Шилегов се фатени во криминал. Работеле без тендер, а потоа распишувале тендери за да го покријат сработеното од фирмите. Весковски со паничните прес-конференции само сака да го прикрие и спаси Шилегов од сè поизвесниот пораз кој го очекува.

Криминалното работење на Шилегов како градоначалник фрла сомнеж за тоа како го стекнал својот имот во тек на функцијата што ја извршува, а за кој нема легално финансиско покритие.

Јасно е од каде е имотот на Шилегов, јасно е дека работеле криминално. Само уште Весковски да сфати дека не треба да прави нови криминали да го прикрива првиот на шефот“, се вели во соопштението на партијата.