Соопштенија
Левица: Заев е директно одговорен за бегството на неговиот побратим Мијалков

Левица го обвини премиерот Зоран Заев дека е виновен за бегството на ексдиректорот на УБК, Сашо Мијалков.
„Бегството на главниот и одговорен организатор на криминалите од времето на Груевски и ексдиректор на УБК, Сашо Мијалков, воопшто не изненадува. Напротив, ова е само уште една потврда за јавната тајна дека власта на чело со премиерот Заев и СДСМ се во тесна врска со сите првообвинети од случаите, кои СЈО ги отвори како резултат на ‘бомбите’, кои, пак, Заев селективно ги објавуваше од опозиција за време на т.н. шарена револуција“, велат од Левица.
Од таму додаваат дека повеќе од јасно е дека ова не е пропуст на Министерството за внатрешни работи кое го води Спасовски. Очигледно е, додаваат од партијата, дека и во овој случај, како што беше случај и со претходните бегства на осудени криминалци, раководните структури на МВР се директни соучесници во исполнување на ветувањата кои премиерот Заев ги даде на криминалците од претходниот режим.
„Да се потсетиме, токму зборовите на Заев беа дека од него ‘зло нема да видат ни Сашо, ниту пак Груевски’.Без криминалниот дел на ВМРО-ДПМНЕ не ќе беше реализирана и неуставната промена на името, за што Заев во изјава потврди дека Мијалков разговарал со осумте пратеници и ги охрабрувал да гласаат за преспанскиот договор. Очигледно слободата за Сашо Мијалков е награда од заевизмот за устоличувањето на Северна. Кога станува збор за заштита и унапредување на криминалот и корупцијата, СДСМ и Заев како предводници на власта, покажаа дека сè што ветија – исполнија и реализираа. Но, кога се работи за ветувањата со кои ја прелажаа пошироката јавност, од нив останаа само слоганите и флоскулите со кои се служат само уште ситно поткупените партиски поттрчковци и лукративни бивши шарени револуционери“, се наведува во соопштението.
Од „живот за сите“ и „нема правда, нема мир“ – додаваат од партијата, видовме само семејни тендери и партиски вработувања; тесна соработка со највисоките криминални структури; лично богатење на функционерите од власта и „бројчаникот“ кој Зоран Заев, како тогашен лидер на опозицијата, го ветуваше на партиските митинзи како регистар на украдените народни пари, кои требаа да бидат вратени во буџетот на државата.
„Сега остана само истиот бројчаник да се надополни со украдените пари од времето на заевизмот како надградба на груевизмот. За надминување на политичката криза во која се наоѓа државата не е доволна само оставката на Владата, туку и кривична одговорност на функционерите од истата и формирање преодна влада која ќе спроведе фер парламентарни избори“, велат од Левица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Соопштенија
СДСМ: Мицкоски ги злоупотребува заболените од коронавирус, пописот ќе се спроведе во согласност со сите мерки за заштита

Без срам и перде Мицкоски ги злоупотребува заболените од коронавирус во своите деструктивни политики, пописот ќе се спроведе во согласност со сите мерки за заштита, реагираат од СДСМ, на изјавата на лидерот на ВМРО-ДМНЕ, Христијан Мицкоски.
„Претстојниот попис на населението и на домаќинствата ќе се спроведе по сите светски стандарди и со почитување на сите протоколи и мерки за заштита на здравјето од коронавирусот. По 19 години, државата ќе спроведе попис со кој ќе се добијат релевантни, прецизни и точни податоци, важни за креирање и спроведување долгорочни, одржливи политики и стратегии. Христијан Мицкоски одново бара алиби, како што бараше алиби за да побегне од локалните избори во Штип“, велат од СДСМ.
Потрчкото на Сашо Мијалков и Никола Груевски, Христијан Мицкоски, човекот што прв ги кршеше мерките за заштита од коронавирусот, додаваат од партијата, денеска без срам и перде ги злоупотребува заболените и починатите од коронавирус во своите деструктивни политики на штета на граѓаните и државата.
„Тоа е Мицкоски, кога не шири лажни вести, кога не брани криминал, тогаш злоупотребува човечки несреќи во обид да ќари некаков политички поен во обид да си ја зачува фотелјата во белиот дворец. И додека тој бара одлагање на пописот глумејќи загриженост за здравјето на граѓаните, неговите соработници организираат јавни собири собирајќи потписи за спас на неговата фотелја во белиот дворец. Мицкоски не е загрижен за здравјето на граѓаните ниту, пак, сака државата да спроведе попис по цели 19 години. Сè што тој прави е само за да го спречи напредокот на општеството, државата да остане без попис и целосни податоци, но тој филм нема да го гледа. Граѓаните одамна го знаат тоа и затоа Мицкоски шест пати е поразуван, затоа е во опозиција и затоа уште долго ќе остане таму“, се навеува во реакцијата.
Соопштенија
СДСМ: Мицкоски и ВМРО-ДПМНЕ да ги повикаат граѓаните да се попишат

Мицкоски и ВМРО-ДПМНЕ да го споделат повикот за ангажирање попишувачи, апелираше преку соопштение СДСМ.
„Скандалозно е свесно и намерно да блокираш попис кој треба да се спроведе по цели 19 години, како што тоа го прават ВМРО-ДПМНЕ и Христијан Мицкоски. Наместо конструктивност, ВМРО-ДПМНЕ и Мицкоски уште еднаш се ставаат на спротивната страна од интересите на граѓаните и државата“, реагираат од партијата на власт.
Преку соопштение, СДСМ испрати повик до сите граѓани, сите заедници, сите партии, сите да се вклучат во споделување на повикот за попишувачи објавен од Државниот завод за статистика.
„Потребни се попишувачи кои ќе се пријават на јавен, отворен, транспарентен и државен повик. Мицкоски и ДПМНЕ да ги повикаат граѓаните да се попишат, наместо да собираат нелегитимни потписи за внатрепартиска употреба, наместо да коваат планови за бојкот за кои и самите знаат дека нема да им успеат“, стои во соопштението на СДСМ.
Соопштенија
СДСМ: Правдата е тука и ќе ја има сè повеќе и сè почесто

Правдата е тука и ќе ја има сè повеќе и сè почесто, истакнуваат од владејачкиот СДСМ и, според нив, во иднина сè почести ќе бидат одговорите на институциите, како оној за обезбедување присуство на Сашо Мијалков, кон сите кои, како што велат, се ставаат над законот и се обидуваат да си играат со владеењето на правото.
„Преку силен одговор на државата, бегалецот Мијалков беше спречен да ја напушти државата и принуден да се предаде. Обезбеден е неговиот притвор“, стои во соопштението од оваа партија.
Ова, според СДСМ, не значи и ослободување од одговорност на лицата поради кои се случи тој да биде недостапен за органите.
„Очекуваме брза и ефикасна истрага која ќе ги лоцира пропустите кои довеле до можноста за бегство на Мијалков и секако санкции за одговорните за кои ќе се утврди дека сториле свесни и намерни пропусти. Со овој случај падна во вода единствената улога на Мицкоски, поради која и беше поставен од Мијалков и Груевски на чело на ВМРО-ДПМНЕ“, напоменуваат од СДСМ.
„Мицкоски, кој претходно ги призна сите криминали на ВМРО-ДПМНЕ за кои се водат судски процеси, одново е поразен, му пропаднаа лажните обвинувања за ‘политички монтирани процеси’, исто како што не му успеа ниту блокирањето на Законот за Јавно обвинителство и преземање на предметите од СЈО“, додаваат од партијата на власт.
- Книги2 месеци
Македонски лекар ја објави последната исповед на Јосип Броз Тито
- Македонија3 месеци
МЖСПП: Мечкиното грозје важен ресурс, кој треба грижливо да го собираме
- Црна хроника3 месеци
Млада девојка од Штип пронајдена мртва во нејзиниот дом
- Македонија3 месеци
(Видео) Отстранети два нелегално изградени објекта во општина Центар
- Македонија2 месеци
Возачот на „бентлито“ што „влета“ на плоштад казнет со 45 евра, објавена фотографија од записникот
- Регион2 месеци
(Видео) Прекината прес-конференција на градоначалникот на Бања Лука: „Луѓе ова е сериозен земјотрес“
- Регион2 месеци
(Видео) Снимен моментот на потресот во Петриња – луѓе не можат да се задржат на земјата
- Свет4 недели
Поради примање мито во Кина погубен поранешен државен функционер