Од политичката партија Алијанса за Албанците реагираат дека строгиот полициски час, со кој Владата забрани движење во општина Куманово во текот на целиот викенд, попладнево предизвикал хаос во општината бидејќи, како што велат, оваа мерка ја зголемила загриженоста кај граѓаните.

„Препораките за одржување на оддалеченост воопшто не се почитуваат од напнатоста на граѓаните во последен момент да ги обезбедат основните потреби за храна за наредните денови како резултат на ад хок повикот на Владата за полициски час, што создаде паника и конфузија“, велат од политичката партија.

Владата попладнево воведе построг полициски час кој се однесува само за Куманово, односно целосна забрана за движење за викендот, со почеток од 21 часот (денеска) до 5 часот наутро во понеделник.

Од паријата на Зијадин Села апелираат до граѓаните да бидат трпеливи и без паника да се приджуваат до заштитните мерки.

Потсетување, ваквата одлука на Владата следува откако денеска беше соопштено дека заболени со коронавирус се 11 доктори од тамошната болница, при што од новозаразените 46 лица за кои беше информирано денеска, половината, односно 23 се од Куманово.

Во работните денови, од понеделник до петок, забраната важи секој ден во периодот од 16 до 5 часот.

Во време кога компаниите ги отпуштаат вработените, кога граѓаните се соочуваат со огромна економска неизвесност, Општина Ѓорче Петров расипнички ги троши парите на граѓаните. Општина Ѓорче Петров на чело со градоначалникот Александар Наумоски во екот на епидемијата донела одлука да потроши пари за кетеринг, обвини Бојан Стојаноски, претседател на ОК Ѓорче Петров на ВМРО-ДПМНЕ.

„Имено, Општина Ѓорче Петров на 19.3.2020 донела одлука за избор на најповолна понуда за набавка на угостителски услуги во проценета вредност од 500.000 денари, без ДДВ.
Наместо да се алоцираат средствата за подобро справување со кризата од вирусот, Општина Ѓорче Петров ќе потроши безмалку 10.000 евра на јадење и пиење“, рече тој.

Според Стојаноски, оваа набавка е уште една, како што рече, од низата непродуктивни трошење во кризен период, како што беше онаа за привремени вработувања, исто така склучена во екот на кризата во март во вредност од речиси 11 милиони денари.

„Меѓутоа, и оваа набавка ја потврдува неспособноста на локалната власт за менаџирање со локалниот буџет. Очигледно е дека СДСМ нема намера да се откаже од своите навики за расипничко трошење, а одговор за ваквите навики секако треба да дадат градоначалникот и Општина Ѓорче Петров“, рече тој.

Претседателот на Единствена Македонија, Јанко Бачев, на денешната прес-конференција зборуваше за, како што рече, најновата срамна кавга меѓу Зоран Заев и Христијан Мицкоси за тоа дали треба или не треба да се стопира исплатата на пари од буџетот за партиите во 2020 година.

Според него, стара практика на ВМРО-ДПМНЕ и СДСМ е секогаш кога земјата е во криза да се расправаат меѓу себе за сè и сешто.

„Кај народот владее страв и паника од коронавирусот, се бара начин како животот на луѓето да се врати во нормала, само Зоран Заев и Христијан Мицкоски три дена се расправаат дали да се стопираат парите за финансирање на партиите за 2020 година“, истакна претседателот на Единствена Македонија.

Според него, расправијата во која Заев божем бара, а Мицкоски божем не се согласува со откажувањето од парите за партиите, е само евтин пропаганден трик и навреда на интелегенцијата на народот.

„Прашањето е што ќе покрие Заев со 1,5 милион евра во кризата кога и самиот рече дека му требаат дури 2 милијарди и 200 милиони евра, а не е лошо да потсетиме дека Заев на изборите во 2016 потроши фантастични десет милиони евра во кампањата, а сега и на изборите што следуваат, ќе потроши десетици милиони евра“, посочи Бачев.

Единствена Македонија бара Заев да каже од каде ќе ја финансира кампањата, штом се откажува од легални пари од буџетот и порачува дека коалицијата „Никогаш северна – само Македонија“ на конкретен начин покажува дека секогаш е со народот со секојдневното предлагање мерки за борба против коронавирусот.