Акцијата на Христијан Мицкоски и Каракачанов против Петар Богојески и Македонски концепт, со цел негово замолчување и укинување на платформата Македонски концепт, засилено продолжува, велат од оваа партија.

„Иванка Додовска, силен поддржувач на политиките на Мицкоски, ги користи добро познатите методи на замолчување често применувани од нејзината партија кон Петар Богојески. Против Богојески ќе биде поднесена тужба за клевета за изнесените ставови во дебатна ТВ-емисија доколку јавно не се извини за тоа. Во исто време еден од гласноговорниците на ВМРО-ДПМНЕ, Владимир Перев, ја води акцијата на Христијан Мицкоски против Богојески преку објавување невистини и нарачани текстови во бугарските медиуми“, стои во партиското соопштение.

Богојески и Македонски концепт ова го толкуваат како класичен оркестриран напад и обид за замолчување и затскривање на вистината.

„Господинот Мицкоски нема трошка демократија и капацитет во него јавно да се соочи со неговите опоненти. Структурите на ДПМНЕ, кои со години ја уништуваат Македонија, сега го напаѓаат Богојески. Каква е оваа демократија во која живееме? Дали ова значи дека Мицкоски и од опозиција ги замолчува граѓаните? Што ќе се случи во земјата доколку истите тие еден ден дојдат на власт?“, се дел од прашањата што ги упатуваат од Македонски концепт.

Најавите на ВМРО-ДПМНЕ дека пратениците од нивните редови ќе гласаат против потврдувањето на одлуките за прогласување вонредна состојба, само ги потврдуваат деструктивноста и неодговорноста на оваа партија, велат од СДСМ.

„ВМРО-ДПМНЕ предводена од неодговорниот Христијан Мицкоски се води единствено од евтин политички популизам и воопшто не се грижи за интересите на граѓаните и државата. Вонредната состојба беше прогласена исклучиво во интерес на граѓаните. Таа беше неопходна за брзо дејствување на Владата и институциите за поефикасна борба против коронавирусот и заштита на јавното здравје“, се наведува во соопштението.

Во време на распуштено Собрание и преодна влада со мандат за спроведување избори, велат од СДСМ, вонредната состојба на извршната власт ѝ овозможи создавање закони за поголема ефикасност во носење мерки и политики за справување со последиците од Ковид-19 и заштита на здравјето на граѓаните.

„Гласањето против одлуките за прогласување вонредна состојба е чин против интересите на граѓаните, против институциите. ВМРО-ДПМНЕ предводенa од Мицкоски останува посветени на деструкција, неодговорно и незрело однесување. За тоа се казнети од граѓаните и затоа остануваат уште долго во опозиција“, велат од СДСМ.

Антикризните мерки на Владата предводена од СДСМ обезбедуваат 44 милиони денари за надомест за сместување и превоз на студенти и средношколци, соопштија од владејачката партија.

„Владата предводена од СДСМ и премиерот Зоран Заев останува на страната на младите и обезбедува помош за студентите и средношколците погодени со здравствената и економската криза предизвиканата од пандемијата на коронавурисот. Со четвртиот пакет антикризни мерки се обезбедени 44 милиони денари за поддршка за сместување или превоз на 884 студенти и 347 ученици, кои нема да може да се сместат во студентските и ученичките домови“, се вели во соопштението.

Поради намалениот капацитет во домовите, додаваат од СДСМ, кои ќе функционираат според строго утврдени протоколи со цел да се заштити јавното здравје, оние студенти и средношколци чии барања биле одобрени, а не може да бидат сместени, ќе имаат можност да изберат месечен надомест за покривање на трошоците за приватно сместување или, пак, да изберат надомест на трошоците за превоз од местото на живеење до местото на студирање.

Истовремено, велат од СДСМ, платежни картички „купувам домашно“ од 6.000 денари ќе добијат 540 студенти, кои во претходниот пакет не ги добија овие картички.