Градоначалничката на Град Скопје, Данела Арсовска во своите јавни настапи посочи дека Христијан Мицкоски имал детали кои не би смеел да ги има од сомнителниот тендер од 136 милиони евра за пречистителна станица.

Со таквите тврдења, оценуваат од СДСМ, Арсовска имплицира на директна вмешаност на Мицкоски во спорниот тендер.

„Затоа е важно, надлежните институции да го расчистат овој случај, да ги истражат сите аспекти и одговорните да се соочат со соодветни санкции. Самата Арсовска, кандидатка и градоначалничка на Мицкоски потврди дека ВМРО-ДПМНЕ не е мрдната ниту милиметар од режимската и криминална матрица“, потенцираат од СДСМ.

Мицкоски, како што додаваат е ист како и неговиот ментор и претходник Никола Груевски, нему му се важни само личните и бизнис интерсите на одредена група луѓе.

Тоа, велат од СДСМ, граѓаните го гледаат, затоа Мицкоски и ВМРО-ДМНЕ изгубија на последните предвремени избори, затоа секогаш ќе губат од граѓаните.

Министерството за земјоделство водостопанство и шумарство премолчи и пак не кажа колкав дел од архивата е достапен после наводниот хакерски напад, велат од опозициската ВМРО-ДПМНЕ.

Според нив, министерството и министерот Љупчо Николовски молчат и кријат дека проблемот е далеку поголем.

„Тие не демантираа дека се недостапни голем дел од документите од архивата, како на пример електронски податоци од фарм регистарот, регистри за откупувачи за вино, за земјоделските задруги, за органско производство, преглед на сите важечки договори за закуп на земјоделско земјиште, вклучително и листа на должници. Ова се важни документи, за кои Министерството не кажува дали се зачувани или изгубени во целост или делумно“, се потенцира во дописот од ВМРО-ДПМНЕ.

Нејасните и нецелосни одговори на министерството, како што посочуваат од оваа партија, отвораат сомнежи и прашања.

„Дали наводниот сајбер напад трајно уништил документи и податоци? Колкава штета ќе имаат земјоделците од ваквата хаварија? Дали од ваквата хаварија некој има ќар бидејќи на тој начин се прикривани злоупотреби и криминали?“, прашуваат од партијата на Мицкоски.

„Антимакедонската СДС се што фати запусти. Тоа мора да престане. За сите дубари на власта на СДС мора да има одговорност“, се наведува во нивното соопштение.

Лицемерната влада бара од граѓаните да штедат, а тие аздисуваат со набавки на морски плодови. Службата за општи и заеднички работи при Владата среде криза ќе потроши над 20 илјади евра за морска храна. Ова е спротивно на најавите што ги имаа во Владата дека ќе ги редуцираат луксузирањата, се вели во соопштението од ВМРО-ДПМНЕ.

Да потсетиме дека милиони од народните пари беа потрошени среде криза за режено цвеќе, кафиња, набавки на службени возила, миење службени возила, витрини, позлатени чинии, виљушки, лажици и ножеви. Самата власт призна дека иако знаеле за кризата, во буџетот предвиделе 100 милиони евра непродуктивни трошења, велат од ВМРО-ДПМНЕ.

Од партијата наведуваат дека клептоманите на власт, предводени од дезертерот Ковачевски, може имаат ужасно ниска реализација на капитални инвестиции, ама затоа се махери за луксузирање. Оттука, македонската економија пропаѓа, а народот тоне во сиромаштија. Ги имаме убедливо најлошите параметри на Балканот, најниска стапка на странски инвестиции, најниска стапка на раст на БДП, највисока инфлација, половина милион граѓани во сиромаштија и рекорден износ на задолжување.

Но, Владата мува не ја лази што народот нема за леб, штом СОЗР набавува октоподи за министрите, се вели во соопштението.